१ युहन्ना 1 - पश्चिम तामाङजीवन्की फ्रोइ 1 गोदोब्न्हङ् ङोन्ग्यम् य्हङ्से मुबे, ङ्यीमाचे थ्ये:बतेङ् ङ्यीमाकी मी:चे म्रङ्बे ओसेम् ङ्यीमाचे च्याबतेङ् ङ्यीमाकी र्हङ्की याचेनो छुबे जीवन न्हङ्बे फ्रोइकी बारेरी ङ्यीमाचे ब्रीटीबल मुब, 2 हुजु जीवन् म्रङ्खजेत्ज्यी, ओसेम् ङ्यीमाचे म्रङ्ज्यी, ङ्यीमाचे हुजुइ गबाही पीन्ब, ओसेम् एङ्यीमातएनो हुजु खेमेएनो अबेबे जीवन्की बारेरी स्येत्प, हुजु अपतेङ् मुबल ओसेम् ङ्यीमाज म्रङ्खजेत्ज्यी। 3 एङ्यीमाकी सङ्गती ङ्यीमातेङ् तखइ पङ्ज्यीम् ङ्यीमाचे ता म्रङ्बतेङ् थ्ये:ज्यी हुजु एङ्यीमात स्येत्प। ङ्यीमाकी सङ्गती अपतेङ् थेङ्की ज येसु ख्रीस्ट्तेङ् बक्च्य मुब। 4 ङ्य्हङ्माकी तङ्ब टोप तखइ पङ्ज्यीम् ङचे चु तम् ब्रीटीबल य्हीन्ब। पर्मेस्वर् य्हल् य्हीन्ब 5 ङ्यीमाचे पर्मेस्वर्की ज ग्यम्से थ्येःबे सम्तर् चुनो य्हीन्ब, ओसेम् एङ्यीमात स्येत्प, पर्मेस्वर्नो य्हल् य्हीन्ब, ओसेम् थेङ्री गदेएनो म्हुन्दुङ् अरे। 6 ङ्य्हङ्माचे थेङ्तेङ् सङ्गतीरी मुब पङ्ब तर ङ्य्हङ्मा म्हुन्दुङ्रीनो ब्रसम् ङ्य्हङ्माचे भ्यु पङ्ब ओसेम् देमेन्री अब्र। 7 तर थेङ् य्हल्री तब र्हङ्ले ङ्य्हङ्एनो य्हल्री ब्रज्यी पङ्सम् ङ्य्हङ्माल गीःचे गी:तेङ् बक्च्य सङ्गती तब, ओसेम् पर्मेस्वर्की ज येसुइ काचे ङ्य्हङ्मात जम्मनो पाप ग्यम्से चोखो स्य्हेङ्ब। 8 ङ्य्हङ्माचे र्हङ्तेङ् पाप अरे पङ्ज्यी पङ्सम् ङ्य्हङ्माचे र्हङ्चे र्हङ्त लुब, ओसेम् ङ्य्हङ्मातेङ् देमेन् अत। 9 तर ङ्य्हङ्माचे र्हङ्की पाप पर्मेस्वर्की ङ्होन्सङ् स्वीकार लज्यी पङ्सम् थेङ्चे ङ्य्हङ्माकी पाप क्षमा न्हङ्जेत्स्ये मुब, ओसेम् जम्मनो अज्यबे तम्मा ग्यम्चे चोखो स्य्हेङ्पीन्जेत्स्ये मुब, तलेपङ्सम् थेङ् बीस्वास् योग्यतेङ् धर्मी मुब। 10 ङ्य्हङ्माचे पाप स्य्हेङ्बल अरे पङ्ब पङ्सम् ङ्य्हङ्माचे थेङ्त भ्यु तनलब, ओसेम् थेङ्की फ्रोइ ङ्य्हङ्मातेङ् अत। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.