1 Crónicas 28 - Dios Iwene

David Salomonnö weina, Dios eju otidobö

¹ Ja̧danö, Davidma okobe deinö israel niji luwedönö weinobe, Jerusalen comunidadtjö tjo̧ko̧kokwobö, israelsasokwena luwedönöbi, ölakwabikwawa jojodö bakwasokwena luwedö milbedö tjuluwedönöbi, cienbedö tjuluwedönöbi, itea niji teada̧lakwawa luwedönöbi, ajwimunö teada̧lakwawa luwedönöbi, itji̧munöbi, ölakwabikwawa jojodötjö inesö juluwadönöbi, ju'wedö ölakwabikwawa jojodötjö jwiinö juluwadönöbi weinobe, Jerusalenbe ichibö tjo̧ko̧kwobö.

² Ja̧danö, öba a'o tjichibiökwe, tjöba a'o a̧la̧ibö öjamatinobe Davidma, ja̧danö jobadönö yöawinobe baikwö: —Chömöledö chömöayedö israel jojodö, baikwö yötawaduwakwö: Ötjöma Isabenö Jo̧ eju, wei̧ wȩyukwaba döbölataja a̧ja̧pjo ja̧kweju chotidobö chösödijatö, jejuma ba̧kwelöjatebö duluwo̧ Dios ömasapiya wanawemidanö ja̧kobetjö̧. Ja̧danö, jobekwö omukwatö jeju chotidakwa̧ abönö jawa chotidijatö.

³ Jo̧kwaijayonö, jobekwö chotidobö jö̧ta̧liökwe, baikwö yöawinobe Diosma ötjönö: –David, ökwöma ötjö Isabenö Jo̧nö otiwanö omukwatakwaweju kwotidobö jwibo̧ja, ökwöma ölakwabikwawa jojo kwö̧jobetjö̧, ja̧danö kwöpöjojodökwö ölakwabikwawö, ba̧jȩkwadö tjökwösobu ebawinö kwölakwabikwawinobetjö̧, –jö̧ba̧lö yöawinobe Diosma ötjönö.

⁴ —Jo̧kwaijayonö, eju chotidobö weinököjayonö, Isabenö Jo̧ Israel jojodö tjösödökwe Diosma, okobe deinö chabe'do ömöledötjö, ötjönöda omudawö ujuninobe, ötjöbi, chitji̧mu tupadanö jojodöbi ba̧kwelöjatebö israel jojodötjö inesö la'aka luwedö dö̧jakobetjö̧. Jau chömöledö kwöwaisaduwa, israel jojodö bakwasokwena jojodötjö, Judasaso omudawö ujuninobe Diosma, Judasaso jojodötjö bakwo̧ iteda ömöledö israel jojodötjö la'aka luwo̧ baibakobetjö̧, jö̧tö? Ja̧danö, okobe deinö Judasaso jojodötjö, chabe'do ömöledönö omudawö ujuninobe, ja̧danö okobe deinö chabe'do itji̧mutjö, ötjönöda omudawö ujuninobe, okobe deinö israel jojodötjö ötjöda inesö la'aka luwo̧ batibakobetjö̧.

⁵ Ja̧danö, Isabenö Jo̧ma ötjönö iyinobe, chi̧tji̧mu ba̧jȩkwadönö 'yatebobö chömöledö, ja̧danö okobe deinö chi̧tji̧mutjö, bakwo̧nöda, Salomonnöda omudawö ujuninobe Isabenö Jo̧ma, chö̧jajemi Salomonda Isabenö Jo̧ ömöledö Israel jojodötjö inesö la'aka luwo̧ ö̧jakobetjö̧.

⁶ Ja̧danö, jobekwö omudawö junajo̧, Diosma baikwö yöawinobe ötjönö: –David, ötjöma kwitji̧ Salomonnö omudawö chujunajabe, ötjöda chitji̧ baibanö, ja̧danö ötjöma jo̧ba abe'do chö̧jakwo̧sa. Jo̧kwajabetjö̧ jo̧ba Salomonda ötjö chejubi, cheju a̧petu jawabi otidakwo̧ma.

⁷ Ja̧danö baikwö yötawakwö kwitji̧ Salomonnö: Babe a̧ja̧kwö ö̧ji̧danö, ja̧bö kwö̧jaduwobö weti̧bi, ju'wi weti̧bi tupakwö bajalenö a̧ja̧kwö ö̧jitjö̧ma, jo̧ba itji̧mu tupadanö jojodönö chujunocha, ba̧kwelöjatebö 'dö̧bibajökönö israel la'aka luwedö tjö̧jakobetjö̧, –jö̧ba̧lö yöawinobe Diosma ötjönö.

⁸ —Jau chömöledö, jobekwö yöawinobe Diosma, jo̧kwajabetjö okobe deinö duluwo̧ Isabenö Jo̧ ömöledö israel jojodö tjöba a'otjöbi, duluwo̧ Dios öba a'otjöbi, baikwö wetaduwakwö chömöledö: Teada̧lönö okobe jwiinö kwuluwo̧duwi Isabenö Jo̧ Dios wei̧ a̧ja̧kwö kwö̧jaduwo, ja̧danö jwaikwöda wei̧danö ja̧bö kwö̧jaduwobö kwisakwaduwo. Jobekwö kwö̧jaduwitjö̧ma, bemi niji ökwödönö iyina nijinö otiwanö kwö̧jaduwakwedöja, ja̧danö kwitji̧mu tupadanö jojodöma bemi niji tjomudawakwedö, ba̧kwelöjatebö bemi israel nijinö otiwanö tjö̧jakobetjö̧.

⁹ Ja̧danö, ökwö chitji̧ Salomonnö baikwö yötawakwö: Ötjö kwabe'dö chösödökwe Diosnö otiwanö kwöwaisobö kwisakwo, ja̧danö jwaikwöda okobe jwiinö kwomajadenö, öpöjödökönö jo̧ba wei̧ ösödö a̧ja̧kwö kwö̧jo. Jau chitji̧, Isabenö Jo̧ma okobe deinö tjomajade okwanö tjomukwati̧ edö waiso̧, ja̧danö okobe jwiinö omukwatö tjujuni̧ jawama, öwawinö edö waiso̧. Ja̧danö, jo̧banö kwisakwitjö̧ma, kwöbadekwajobö weakwo̧ chitji̧, jo̧kwaijayonö jo̧batjö 'da̧bachibö kwi̧'yitjö̧ma, ökwönö kabatibö ikwö loakwo̧, ba̧kwelöjatebö loawa baibanö.

¹⁰ Jo̧kwajabetjö̧ obökönö, otiwanö bi̧ya jawa omukwatö kwö̧jo chitji̧. Jau chitji̧, Isabenö Jo̧ma ökwönöda omudawö ujunajabe, iteda ö̧jakweju baibanö o̧do kwotidakobetjö̧. Jo̧kwajabetjö̧, kwujuluwachibanö ja̧nö, o̧do kwotido chitji̧, —jö̧ba̧lö weinobe Davidma.

¹¹ Ja̧danö, jobekwö yöba̧lajo̧, Davidma itji̧ Salomonnö iyinobe, o̧do otikwa wȩyukwa'yema. A̧dekwanö Dios ejubi, o̧do teachakwawȩko̧bi, ju'wi Dios eju ö'öbö ejubiyabi, mikwawi̧ jawa lödawa ȩkijubi, mö ȩkijubi, okwa ȩkijubi, inesö okwasȩko̧, Dios iteapjo jojodönö lȩlöjinö edi̧ i̧sȩkwapi̧ möchekwapi̧ ja̧kwȩko̧bi otikwa wȩyukwa'ye Salomonnö iyinobe.

¹² Davidma ida̧ökö omukwatinobe, —Dios eju bejenö dotiditjö̧ma, otiwo jö̧a̧lena, —jö̧ba̧lö, ja̧danö okobe jwiinö ja̧ omukwatina jawa wȩyukwa'ye itji̧ Salomonnö iyinobe, Isabenö Jo̧ eju a̧petu jawabi, ö'öböseju ȩkiju jawabi, Dios eju mikwawi̧ jawa lödawȩko jawabi, jojodö tjiyi̧ jawa lödawȩko jawabi.

¹³ Ju'wibi Davidma Salomonnö yöawinobe, Diostjö jojodötjö ö'weje pjabatadö tjotidawakwena jawabi, ju'wedö Levisaso jojodötjö sasokwena tjotidawakwena jawabi, otiwanö Isabenö Jo̧ ejutjö, Isabenö Jo̧ wei̧ otidö tjö̧jakobetjö̧. Ja̧danö jobe tjotidonö, ja̧ otikwa dȩjapi̧ya jawa tjotidakwa̧ jawabi yöawinobe, otiwanö Diosnö ösödö tjotidakobetjö̧.

¹⁴ Ju'wibi Davidma Salomonnö Dios eju dȩja̧piya jawa otikwa yöawinobe. Jweinö yöawinobe, —Dȩjapiya kwotidenama, bejenö ömöki̧nö orotjö kwotido, ja̧danö bejenö ömöki̧nö platatjö kwotido

¹⁵ ja̧danö dȩju̧wa'yu o̧'di̧ju̧ ja̧kabi, dȩju̧wa'yu̧bi kwotidenama, bejenö ömökinö orotjö kwotido, ja̧danö bejenö ömökinö platatjö kwotido. Ju'wi jawa dȩju̧wa'yu bejenö, ju'wi jawa dȩju̧wa'yu bejenö, jö̧ba̧lö.

¹⁶ Ja̧danö mesasöte Diosnö iyawa pan wanawöte kwotidenama, bejenö ömökinö orotjö kwotido, ja̧danö otidajo̧, Dios eju okwa, bena kwujuno. Ja̧danö ju'wi Dios eju mesa ötebiya kwotidenama, bejenö ömökinö platatjö kwotido, —jö̧ba̧lö jweinö yöawinobe Davidma, itji̧ Salomonnö.

¹⁷ Okobe jwiinö Dios eju otikwa jawa jweinö yöawinobe, orotjö otidenama, dokwa nöinö orotjö otidakwojobö jö̧ba̧lö, Diosnö iyawa itebiya ökiya jawabi, dȩja̧piya jawabi, deja'di̧ju jawabi. Ja̧danö platatjö otikwa jawa dejapi̧yabi, dokwa nöinö platatjö otidakwojobö jö̧ba̧lö jweinö yöawinobe.

¹⁸ Ja̧danö Dios öba a'otjö omewi̧ jawa juwawöte orotjö otikwöte otidakwa̧bi yöawinobe, dokwa nöinö orotjö otidakwojobö jö̧ba̧lö. Ja̧danö bajaleapo, Dios iteapjo wame tjö̧jakwedö, tjö̧wa̧ja̧piya debatadö querubines ötjabawö tjo̧'wo jawa otidakwa̧ wȩyukwa'ye iyinobe Salomonnö.

¹⁹ Okobe jwiinö ja̧ otidakwa̧ jawa wȩyukwa'ye Salomonnö iyö yöawinobe: —Salomon, Isabenö Jo̧ma iteda eju jawa ötjönö i̧sȩbinobe, ja̧danö otiwanö chöwaisachibanö pjaatinobe, bejenö otiwanö wȩyukwa'yenö wȩyudö, ökwönö chiyakobetjö̧. Jo̧kwajabetjö, kwotidenama bi'ye laebi̧danö kwotidobö jo̧be, Diosda jobekwö kwotidakwa̧ jawa weinobetjö̧, —jö̧ba̧lö.

²⁰ Ja̧danö wȩyukwa'ye Salomonnö iyajo̧, tupakwö yöawinobe Davidma: —Chitji̧, kwujuluwachibanö yebabökönö ja̧nö kwotido. Yebabökönö ja̧nö, dakwö ja̧takwajö jö̧ba̧lö omukwatökönö kwö̧jo, ötjö chösödökwe Dios, Isabenö Jo̧ Dios ökwökwö ö̧jobetjö̧. Kwö̧jelö 'da̧bachibökönö, ökwönö le'dedö loökakwo̧ chitji̧, isabenö ökwökwö pjabatö ö̧jakwo̧, okobe jwiinö iteda eju, Isabenö Jo̧ eju, kwotido jö̧ka̧lidanö otidö kakatakwawenanö baibanö.

²¹ Ja̧danö chitji̧, Dios ejutjö tjotidakwedö, sasokwena jojodö, Diostjö jojodötjö ö'weje pjabatadöbi, ju'wedö Levisaso jojodöbi ida̧ökö jobe tjotidobö tjuju̧kwobe. Ja̧danö okobe deinö otikwa waisadö ökwönö pjatjatobö tjö̧jakwedö, okobe jwiinö ja̧ o̧do kwotidakwa̧ jawa pjatjatakobetjö̧. Ja̧danö jojodötjö luwedöbi, jojodöbi kwömöayedö ja̧nö, okobe jwiinö weköbi̧ otidö tjö̧jakwedö, otiwanö Dios eju kwotidakobetjö̧, —jö̧ba̧lö yöawinobe Davidma, itji̧ Salomonnö.