1 Crónicas 26 - Dios Iwene

Apjude teada̧ladö tjimibiya wȩyukwa'ye

¹ Levisaso jojodötjö Dios eju apjudebiya teada̧ladö sasokwena jojodöma bidö: Coresaso jojo Abiasaf itji̧ tupadanö jojo bakwo̧ma Meselemias mikwo̧.

² Ja̧danö Meselemias itji̧muma bidö: Abönö pöe Zacarias mikwo̧bi, Jediael mikwo̧bi, Zebadias mikwo̧bi, Jatniel mikwo̧bi,

³ Elam mikwo̧bi, Johanan mikwo̧bi, Elionai mikwo̧bi.

⁴ Ja̧danö Obed-edom itji̧mubi apjude teada̧ladö tjö̧jinobe. Obed-edom itji̧muma bidö: Abönö pöe Semaias mikwo̧bi, Jozabad mikwo̧bi, Joa mikwo̧bi, Sacar mikwo̧bi, Natanael mikwo̧bi,

⁵ Amiel mikwo̧bi, Isacar mikwo̧bi, Peultai mikwo̧bi. Jobekwö tjö̧ba̧jekwinobe Obed-edom itji̧muma, Diosma isabenö otiwanö jo̧banö pjaatinobetjö̧.

⁶ Ja̧danö Obed-edom ö̧'dö̧dö, itji̧ Semaias itji̧muma okobe jwiinö tjotidi̧ jawa waisadö otiwanö otidadö tjö̧jinobe, ja̧danö tja'dö Obed-edom itji̧mu tupadanö jojodötjö luwedö batjibinobe.

⁷ Jobadö Semaias itji̧muma bidö: Otni mikwo̧bi, Rafael mikwo̧bi, Obed mikwo̧bi, Elzabad mikwo̧bi. Ja̧danö tjömöledö Eliu mikwo̧bi, Samaquias mikwo̧bi otikwa waisanö otiwanö otidadö tjö̧jinobe.

⁸ Okobe deinö jobadö Obed-edom itji̧mu tupadanö jojodö, itji̧mubi, ö̧'dödöbi, sesenta y dosbedö tjö̧jinobe, ja̧danö otiwanö waisanö otidadö tjö̧jinobe, otiwanö Dios eju apjudebiya tjiteada̧lobö.

⁹ Meselamias itji̧mubi, yöne ömöledöbi Obed-edom ömöledödanö otiwanö waisanö otidadö tjö̧jinobe, ja̧danö jobadöma dieciochobedö tjö̧jinobe.

^10-11 Apjude teada̧ladötjö jelo̧ma, Merarisaso jojo Hosa mikwo̧. Ja̧danö Hosa itji̧muma bidö: Simri mikwo̧bi, Hilcias mikwo̧bi, Tebalias mikwo̧bi, Zacarias mikwo̧bi, ja̧danö jobadötjö la'aka luwo̧ma, Simrida. Jau, Simrima abe'do Hosa itji̧ abönö pöe ö̧jököjayonö, itji̧ abönö pöe ö̧ji̧danö abe'do Hosama jo̧banöda la'aka luwo̧ baibanö omudawö ujuninobe, ja̧ otikwa luwo̧ baibanö. Ja̧danö, Hosa itji̧mukwö, ju'wedö yöne ömöledökwö, a̧li̧nösamutjö wamedukwa apjude teada̧ladö tjö̧jinobe.

¹² Jobekwö laebobe Dios eju apjudebiya teada̧lakwawa luwedö tjimibiya wȩyukwa'yema. Ja̧danö, apjude teada̧lakwawasasokwenama, tjuluwo̧ iminö ötjabinawö̧. Okobe deinö jobadöma Levisaso jojodö tjö̧jinobe, ja̧danö ju'wedö tjömöledösaso jojodönö tjotidawakwena 'da̧batö tjujuninadanö, jobadönö apjudebiya teada̧lakwawa jojodö batjibanö tjotidawa 'da̧batö tjujuninobe.

¹³ Wainökwena edökönö, bakweminö abönö pöe itji̧mu tupadanö jojodöbi, öjawo̧ itji̧mu tupadanö jojodöbi inawiya jabö tjedinobe, bakwasokwena dide apjude tjiteada̧lakwojobö jö̧ba̧lö omudawö tjujunakobetjö̧.

¹⁴ Ja̧danö, inawiya pjei̧ öwiya jabö tjedenama, baikwö laebinobe. Meselemiasma ömöayedökwö jawo̧ laebobekwöchobesade apjude iteada̧lobö laebinobe. Ja̧danö yemidanö inawiya jabö tjedenama, Meselemias itji̧ Zacarias ömöayedökwö u'dakwöchobesade apjude iteada̧lobö laebinobe. Jo̧ba Zacariasma isabenö waisanö omukwatö ji̧na, ja̧danö otiwanö waisanö pjabatö lȩbebö yöbawina.

¹⁵ Ja̧danö yemidanö inawiya jabö tjedenama, Obed-edom ömöayedökwö a̧likwöchobesade apjude iteada̧lobö laebinobe. Ja̧danö yemidanö inawiya jabö tjedenama, Obed-edom itji̧mu Dios eju lödawa ȩkiju jawa tjideada̧lobö laebinobe.

¹⁶ Ja̧danö yemidanö inawiya jabö tjedenama, Supimbi, Hosabi tjömöayedökwö jawo̧ meajobekwösade apjude Salequet mikwade tjiteada̧lobö laebinobe. Ja̧ apjudema, möakwöchobe Dios ejube 'ya̧kwawama mana badeibösade. Jobekwö bakwasokwena tjiteada̧lakwa̧ 'da̧batö tjujuninobe, ja̧danö ju'wibi bakwasokwena jojodötjö, tjotidakwa̧ mölebiya 'da̧batö tjujuninobe, okobe deinö bakweminö otiwanö otidö tjö̧jakobetjö̧.

¹⁷ Bakwöta mölekwena jobadö Levisaso jojodötjö tjotidi̧ma baikwö laebobe: Jelemutjö bakwo̧bedö jawo̧ laebobekwöchobesade apjude tjiteada̧lobö ji̧nobe. Ja̧danö ö'wejemubedö u'dakwöchobesade apjude tjiteada̧lobö ji̧nobe. Ja̧danö lödawȩko̧ bakwȩko̧bi, jelȩko̧bi, du̧ju̧tajakwena tjiteada̧lobö ji̧nobe.

¹⁸ Ja̧danö jawo̧ meajobekwö Parbar ötjabemi, jelemutjö bakwo̧bedö tjiteada̧lobö ji̧nobe. Jobadötjö ö'wejemubedö mana tjiteada̧lobö ji̧nobe, ja̧danö Parbar ötjabemi teachakwawemi du̧ju̧taja tjiteada̧lobö ji̧nobe.

¹⁹ Jobekwö laebobe Core itji̧mu tupadanö jojodötjöbi, Merari itji̧mu tupadanö jojodötjöbi apjude teada̧lakwawa jojodö tjiteada̧lakwa̧ 'da̧batö tjujunina jawama.

Ju'wedö Levisaso jojodötjö Dios ejutjö tjotidina jawa

²⁰ Ja̧danö tjömöledö Levisaso jojodötjö ju'wedöma Dios eju mikwawi̧ jawabi, jojodö Diosnö tjiyi̧ jawabi teada̧lakwawa jojodö tjö̧jinobe.

²¹ Jobadötjö ju'wedöma bidö: Gersonsaso jojo Libni itji̧mu tupadanö jojodötjö la'aka luwo̧ Jehiel mikwo̧,

²² ja̧danö Jehiel itji̧mu Zetam mikwo̧bi, Joel mikwo̧bi Isabenö Jo̧ eju mikwawi̧ jawa teada̧lakwawa luwedö tjö̧jinobe.

²³ Ja̧danö Amram itji̧mu tupadanö jojodötjöbi, Izhar itji̧mu tupadanö jojodötjöbi, Hebron itji̧mu tupadanö jojodötjöbi, Uziel itji̧mu tupadanö jojodötjöbi, ju'wedöbi ja̧ mikwawi̧ jawa teada̧lakwawa luwedö tjö̧jinobe. Jobadö tjimibiya wȩyukwa'yema baikwö laebobe:

²⁴ Amram itji̧mu tupadanö jojodötjö mikwawi̧ jawa teada̧lakwawa luwo̧ma, Sebuel mikwo̧. Jo̧ba Sebuelma, Moises itji̧ Gerson itji̧ tupadanö jojo.

²⁵ Ja̧danö jo̧bakwö ja̧ jawa otidadöma, a'dö Moises itji̧ Eliezer itji̧mu tupadanö jojodö, Rehabias mikwo̧bi, Jesaias mikwo̧bi, Joram mikwo̧bi, Zicri mikwo̧bi, Selomot mikwo̧bi.

²⁶ Ja̧danö Selomotbi, ju'wedö ömöledöbi Isabenö Jo̧ itea baibanö tjiyina jawa teada̧lakwawa luwedö tjö̧jinobe, la'aka luwo̧ David iyina jawabi, israel jojodötjö sasokwena luwedö tjiyina jawabi, ölakwabikwawa luwedö tjiyina jawabi, ju'wedö luwedö tjiyina jawabi.

²⁷ Ja̧ ölakwabikwawa jojodö tjiyina labebö loawa baikwö laebobe: Israel jojodö tjöpöjojodökwö ölakwabikwawö tjujuluwenama, tjöpöjojodö tjiteaja̧ 'dötjebinobe, ja̧danö ja̧ 'dötjebaja̧ jawatjö 'da̧batö tjujuninobe, ja̧ tjiyaja̧ jawatjö Isabenö Jo̧ eju 'yayinö otikwa tjotidakobetjö̧.

²⁸ Ja̧danö, Dios yöawi̧ yöbawina Samuelbi, la'aka luwo̧ Saulbi, ölakwabikwawa luwo̧ Abnerbi, ölakwabikwawa luwo̧ Joabbi ajayinö Dios itea baibanö tjiteatjö 'da̧batö tjiyinobe. Ja̧danö, ja̧ tjiyaja̧bi, ju'wedö jojodö tjiyaja̧bi teada̧lakwawa luwedö tjö̧jinobe, Selomotbi, ömöledöbi.

²⁹ Ja̧danö Izhar itji̧mu tupadanö jojodötjö, Quenanias mikwo̧nöbi, Quenanias itji̧munöbi 'da̧batö tjujuninobe, lȩekwa luwedö batjibanö. Ja̧danö, Dios eju a̧petunö ja̧nö, israel jojodö wene tjujuna̧li̧ otidö lobö, lȩekwa yöbawö tjö̧jinobe.

³⁰ Ja̧danö Hebron itji̧mu tupadanö jojodötjö, Hasabias mikwo̧bi, ömöledöbi israel niji, Jordan ojwetjö jawo̧ laebobekwö niji̧ teada̧lakwawa jojodö tjö̧jinobe. Jobadöma, mil setecientos ja̧ otikwa waisadö tjö̧jinobe, ja̧danö okobe jwiinö Isabenö Jo̧ wei̧ otikwa jawabi, la'aka luwo̧ wei̧ otikwa jawabi, la'aka luwedö ja̧nö jobe jwebebö tjö̧jinobe.

³¹ Ja̧danö Hebron itji̧mu tupadanö jojodötjö jelo̧ma Jerias mikwo̧. Hebron itji̧mu tupadanö jojodö tjimibiya wȩyukwa'yenö jo̧ba Jerias imi laebobe, —Jeriasda okobe deinö Hebron itji̧mu tupadanö jojodötjö la'aka luwo̧bina, —jö̧ba̧lö. Davidma ida̧ökö cuarenta o̧biya jenanö webö ö̧jenama, tjimibiya wȩyukwa'ye yöba̧lö tjisakwinobe, Hebron itji̧mu tupadanö jojodöma didöjö jö̧ba̧lö, ja̧danö isakwajadö, Hebron itji̧mu tupadanö jojodötjö otikwa waisadönö tjöbadekwajinobe Galaad niji comunidad Jazertjö.

³² Jobadö Jeriasnöbi, ju'wedö ömöledö dos mil setecientobedönöbi tjöbadekwajinobe, otikwa waisanö otidadönö, ja̧danö tjömöledösaso luwedönö. Ja̧danö, jobadönö badekwajo̧, Davidma jobadönö 'da̧batö ujuninobe, Rubensaso jojodöbi, Gadsaso jojodöbi, Manasessaso ja'ö jojodöbi tjitebo nijinö ja̧nö, Dios wei̧ jawabi, israel la'aka luwo̧ wei̧ jawabi jwebebö tjö̧jobö. Jobekwö laebobe Levisaso jojodötjö tjotidawakwena 'da̧batö tjujunina jawama.