Uruti Maxaafaa 4 - Wolaytta Bible

Boo7eezi Uruto Aissiis

¹ Boo7eezi katamaa penggiyaa matan de7iya gutaraa pude kiyidi, yan uttiis. Uttidaashin i yainnido mata dabboi yaara aadhdhees. Aadhdhiyaagaa Boo7eezi, “Ta ishau, haa simmada hagan utta” yaagiis. Yaagin i simmidi uttiis.

² Boo7eezi he katamaa cimatuppe tammu asata dooridi, “Hagan uttite” yaagiis; yaagin eti uttidosona.

³ Boo7eezi ba mata dabbuwaa hagaadan yaagiis; “Moo7aaba biittaappe simmada yiida Naa7ooma, nu ishaa Elimeleeka gadiyaa baizzausu.

⁴ Hegaa gishshau, taani neeyyo, hagan uttida asaa sinttaaninne ta katamaa cimatu sinttan, 'SHamma' gaada yootanau qoppaas. Neeni wozanau koyikko woza; koyana xayikko, taani eranau taayyo oda. Aissi giikko, wozanau maatai de7iyoi neeppe hara asi baawa; neeppe kaallada taani de7ais” yaagiis. Yaagin i, “Taani wozana” yaagiis.

⁵ Boo7eezi, “Gadiyaa Naa7oomippe shammiyo gallassi, am77iyo Uruto aissaasa; yaatikko, haiqqidaagaa sunttai a laata biittan xeesettana” yaagiis.

⁶ Yaagin ha mata dabboi, “Hegaa gidikko, taani wozanau danddayikke; aissi giikko, hegee tana ta buzo laata gadiyaa moorissana. Hegaa neeni neeyyo woza; taani danddayikke” yaagiis.

⁷ Beni wode Israa7eela biittan ooninne aquwaa wozikko woikko laammikko, zal77iyaa duuttanau issi baggai ba caammaa tohuwaappe shoddidi, hinkko baggau immees. Israa7eela biittan issibaa issuwaappe issuwau sheedhdhiyo maarai hegaa.

⁸ Hegaa gishshau, he mata dabboi Boo7eeza, “Neeni shamma” yaagidi, ba caammaa tohuwaappe shoddiis.

⁹ Yaatin, Boo7eezi cimatanne asaa ubbaa, “Taani Elimeleekayyoonne Keliwoonayyoonne Mahiloonayyo de7iyaabaa ubbaa Naa7oomippe shammidoogau hachchi intte markka.

¹⁰ Qassi haiqqidaagaa sunttai eta so asaa sunttaa giddoppe woikko katamaa asaa mazggafaappe xayennaadan, a sunttaa a laata gadiyan xeesissanau Mahiloona am77iyo Urutokka taani aissiyoogau hachchi intte markka” yaagiis.

¹¹ Yaagin pengge gutaran de7iya cimatinne asai ubbai, “Ee, hagau nuuni markka! GODAI hanno ne soo yiya maccaasiyo, Israa7eela asaayyo maizza aayeta gidida Raaheelidaaninne Liyidan ootto. Neenikka Efiraatan dure gida; ne sunttai Beetaliheemen eretto.

¹² Ne keettai GODAI ha lo77o yelaga maccaaseeppe neeyyo immiyo zariyan, Ti7imaara Yihudaayyo yelido Paareesa keettaadan hano” yaagiis.

Boo7eeza Yeletaa

¹³ Hegaadan oottidi, Boo7eezi Uruto aissiis; aissin ayyo machcho gidaasu. GODAI iyyo uluwan yeluwaa tilin, attuma na7aa yelaasu.

¹⁴ Maccaasati Naa7oomo, “Hachchi nena heemmanau neeyyo na7aa na7a xaissibeenna GODAI galatetto! A sunttai Israa7eelan eretto!

¹⁵ I neeyyo sa7aa kehissana; neeni cimiyo wodiyankka nena i heemmana. Aissi giikko, nena siiqiyaara, laappun attuma naatuppekka aadhdhada neeyyo kehiyaara, ne na7aa machchiyaa a yelaasu” yaagidosona.

¹⁶ Naa7ooma yiiraa ekkada idimmaasu; yaatada a dichchaasu.

¹⁷ I shooron de7iya maccaasati, “Naa7oomiyyo attuma na7ai yelettiis” yaagidi a Yoobeeda sunttidosona. Yoobeedi Daawita aawaa Isseya yelidaagaa.

¹⁸ Paareesa yeletai hagaappe kaallidi xaafettidaagaa: Paareesi Hexiroona yeliis;

¹⁹ Hexirooni Raama yeliis; Raami Aminadaaba yeliis;

²⁰ Aminadaabi Na7asoona yeliis; Na7asooni Salmmoona yeliis;

²¹ Salmmooni Boo7eeza yeliis; Boo7eezi Yoobeeda yeliis;

²² Yoobeedi Isseya yeliis; Isseyi Daawita yeliis.