Mazamure Maxaafaa 94 - Wolaytta Bible

¹ Abeet GODAU, neeni haluwaa kessiya Xoossaa. Abeet haluwaa kessiya Xoossau, halo kessa.

² Abeet sa7aa pirddiyaagoo, dendda; otoranchchatuyyo bessiya qixaatiyaa imma.

³ Abeet GODAU, aude gakkanaassi gam77anee? Iitati aude gakkanaassi ufaittanee?

⁴ Iitaa oottiya ubbati bantta otoro qaalaa biddoosona; eti ceeqettoosona.

⁵ Abeet GODAU, eti ne asaa diippoosona; neegeeta naaqqoosona.

⁶ Eti am77etanne beteta woroosona; aawai bainnaageetakka siifoosona.

⁷ Yaatidi eti, “GODAI nuna be7enna; Yaaqooba Xoossai akeekenna” yaagoosona.

⁸ Inttenoo, asa ubbaappe aadhdhida dammatoo, akeekite! Inttenoo eeyyatoo, aude eranchcha giduuteetii?

⁹ Haittaa wottida Xoossai siyennee? Aifiyaa medhdhidaagee be7ennee?

¹⁰ Kawotettaa seeriyaagee qaxxayennee? Asaa eraa tamaarissiyaagee bau erennee?

¹¹ GODAI asaa qofai hada gidiyoogaa erees.

¹² Abeet GODAU, neeni seeriyonne ne higgiyaappe tamaarissiyo asi anjjettidaagaa.

¹³ Iitati kunddiyo ollai bookettana gakkanaassi, metoi gakkiyo gallassan neeni a shemppissaasa.

¹⁴ Xoossai ba asaa yeggenna; i baageeta aggenna.

¹⁵ Pirddai simmidi xillo pirdda gidana; wozanaa suureti ubbai he xillo pirddaa maaddana.

¹⁶ Makkalanchchatu bolli ta gishshaa denddiyai oonee? Iitaa oottiyaageetuura ta gishshaa eqettidai oonee?

¹⁷ GODAI tana maaddennaakko, taani eesuwan duufuwan gelada sirphphi gaana shin.

¹⁸ Abeet GODAU, taani, “Ta gedee hallixxees” yaagido wode, aggenna ne siiqoi tana kaafiis.

¹⁹ Tana hirggai woriyo wode, neeni tana woppu oottada ufaissaasa.

²⁰ Higgiyaa shaariya geella daannatuura neeni zuppetakka.

²¹ Xillota woranau eti issippe yaa7oosona; geeshshata haiquwau pirddoosona.

²² Gidikkonne, GODAI taani baqata attido soho; ta Xoossai taani qosettiyo wogga zaalla.

²³ Eta iitatettaa gishshau, i eta qaxxayana; eta nagaraa gishshau, i eta xaissana; ee, GODAI nu Xoossai eta xaissana.