Mazamure Maxaafaa 82 - Wolaytta Bible

Asaafa mazamuriyaa

¹ Xoossai saluwaa yaa7aa shiishshees. SHiishshidi xoossatu giddon hagaadan yaagidi pirddees;

² “Intte geellaa pirddiyoogaa aggite; naa77antto iitatu bagga gidoppite.

³ Hiyyeesatuyyoonne aawai bainnaageetuyyo mootettite; manqqonne naaqettida asatu maataa naagissite.

⁴ Hiyyeesatanne metootanchchata ashshite; iitatu kushiyaappe eta wotti ekkite.

⁵ “Intte ainne erekketanne ainne akeekekketa; intte xuman hemetteeta. Xillotettai xayin, biittai yaaqiyaaqees.

⁶ Taani inttena, 'Intte xoossata; intte ubbaikka Ubbaappe Xoqqiya Xoossaa naata.

⁷ Gidikkonne, intte asi haiqqiyoogaadan haiqqana. Qassi hara halaqati kunddidoogaadan inttekka kunddana' yaagais” yaagees.

⁸ Abeet Xoossau, dendda; sa7aa pirdda; kawotetti ubbai nebaa.