Mazamure Maxaafaa 76 - Wolaytta Bible

Asaafa mazamuriyaa, yettaa

¹ Xoossai Yihudan erettidaagaa; a sunttai Israa7eelan gita.

² A dunkkaanee Salaameena; i de7iyoosai Xiyooneena.

³ I hegan kolxxiya morkketu wonddafiyaa zubbiyaa, gonddalliyaa, bisuwaanne hara ola miishshata mentterettiis.

⁴ Abeet Xoossau, ne bonchchoi ai keena gitee! Neeni ne morkketa xoonada deriyaappe simmiyo wode, ne anggai aiba yashshiyaabee!

⁵ Gooba tooranchchati banttau de7iyaabaa ubbaa bonqqettiichchidosona. Ha77i simmi eti haiqqidosona; etappe issoinne ba kushiyaa denttibeenna.

⁶ Abeet Yaaqooba Xoossau, neeni seerido wode, paraasatinne parati kunddidi, haiqqi aggidosona.

⁷ SHin abeet Xoossau, neeni yashshaasa! Ne hanqqoi suullido wode, ne sinttan oonee eqqanai?

^8-9 Neeni pirddaa saluwaappe sissadasa. Neeni sa7an qohettidaageeta ashshanau pirddaayyo denddido wode, sa7an de7iya asai yayyidi, co77u giis.

¹⁰ Asaa hanqqoi darido keenaa neeni galatettaasa. Olaappe palahida asati ubbai ne ayyaana gallassata bonchchana.

¹¹ GODAAYYO, intte Xoossaayyo, shiiqettidoogaa gattite. Inttenoo shooro kawotettatoo, yayettanau bessiyaagaayyo immiyoobaa ehiite.

¹² I halaqatu otoruwaa giishshees; wolqqaama kawotakka i yashissees.