Mazamure Maxaafaa 75 - Wolaytta Bible

Asaafa mazamuriyaa, yettaa

¹ Neessi galataa immoos; abeet Xoossau, nena galatoos; “Ne sunttai gitaa” giidi awaajjoosinne maalaalissiya ne oosuwaa ubbaa yootoos.

² Xoossai hagaadan yaagees; “Doorada keerido gallassi, suure pirddaa pirddana.

³ Sa7ainne an de7iyaageeti ubbai qaaxxinkka, a mintta essiyaagee tana.

⁴ Taani otoranchchata, 'Otorettoppite' yaagais; iitatakka, 'Intte kaciyaa bessoppite.

⁵ Intte kaciyaa xoqqissi bessoppite; zaatturidi haasayoppite' yaagais” yaagees.

⁶ Pirddai awai mokkiyoosaappe woi wulliyoosaappe woikko deriyaappe woikko bazzoppe yeenna.

⁷ SHin pirddiyaagee Xoossaa; i issuwaa bolli pirddees; issuwaa shatinttees.

⁸ Xoossaa kushiyan issi wanccai de7ees; he wanccai Xoossaa hanqquwaa woine eessan kumi uttiis. I hegaappe ushshaa tigin, sa7an de7iya iita asati hegaa uyana; eti orccuwaanne ashshennan cinggirishidi uyana.

⁹ SHin taani Yaaqooba Xoossaabaa yootananne merinau a sabbana.

¹⁰ I iita asatu kaciyaa ubbaa menttana, shin xillotu kacee xoqqu xoqqu gaana.