Mazamure Maxaafaa 55 - Wolaytta Bible

Daawiti xaafido timirttiyaa

¹ Abeet Xoossau, ta woosaa siya; ta watiwatuwaa ai metoo gooppa.

² Ezgga; ta woosaa siya; ta qofai tana waissin, taani shabbarettaas.

³ Hegeenne, ta morkketu cenggurssaappenne iitatu naaquwaappe denddidaagaana. Eti ta bolli meto ehoosonanne bantta yiilluwan tana morkkoosona.

⁴ Ta wozana aifiyan diddiqees; haiquwaa hirggai tana maashissiis.

⁵ Tana yashshainne kokkorssai oiqqiis; dagamai tana worirggiis.

⁶ Taani, “Taayyo haraphphiyaadan qefee de7eerenneeshsha. Yaaniyaakko taani paallada baada shemppana shin;

⁷ taani haakkada baana shin; bazzon aqana shin.

⁸ Taani gotiyaappenne uushuwaappe attiyoosaa eesotada gakkana shin” yaagaas.

⁹ Abeet Godau, taani katamaa giddon ooshshaanne waretaa be7ido gishshau, iitatu haasayaa balbbuqa.

¹⁰ Iitati gallassinne qammi katamaa gimbbiyaa yuuyoosona; iitatettainne kobai katamaa giddon de7ees.

¹¹ Bashshai a giddon de7ees; naaqoikka cimoikka a gutaraappe shaahettenna.

¹² Tana cayiyaagee ta morkkiyaa gidenna; gidiyaakko taani danddayana. Ta bolli ceeqettiyaagee tana ixxiyaagaa gidenna; gidiyaakko taani appe qosettana.

¹³ SHin hagaa ubbaa oottiyaagee nena, ta laggiyaa, ta dabbuwaanne ta siiquwaa.

¹⁴ Nuuni issoi issuwaara ulobaa haasayida; nuuni issippe Xoossaa keettan goinnida.

¹⁵ Ta morkketi wodee gakkennan haiqqona; eti paxa moogettona. Aissi giikko, iitatettai eta giddooninne eti de7iyoosan de7ees.

¹⁶ SHin taani GODAA Xoossaa xeesais; i tana ashshees.

¹⁷ Maallado, gallassinne omarssi taani waassananne ta metuwaa ayyo yootana; yootin i tabaa siyana.

¹⁸ Daroti tana morkkikkokka, i tana olaa tooraappe ashshees.

¹⁹ Beniisappe kawotaa araatan uttida Xoossai, bantta ogiyaa laammennaageetubaanne baayyo yayyennaageetubaa siyidi, i eta kaushshana.

²⁰ Ta laggee ba dabbotu bolli ba kushiyaa yeddiis; etaara maacettido maachchaa koliis.

²¹ A haasayai oissaappekka aadhdhida shugo; shin ba wozanan morkkiis. A qaalati zaitiyaappekka aadhdhidi woppissidosona; shin qara bisuwaadan qanxxidosona.

²² Ne toohuwaa Xoossan wotta; i nena zemppissana. Xoossai audenne xilloti shabbirettanaadan oottenna.

²³ SHin Abeet Xoossau, neeni iita asata ciimma ollan duge olana. Suuttaa gussiyaageetinne cimmiyaageeti bantta daana laittau baggaanne de7okkona; shin taani nenan ammanettana.