Mazamure Maxaafaa 36 - Wolaytta Bible

GODAA ashkkaraa Daawiti xaafidoogaa

¹ Iita asi ba wozanan de7iya iitatettaa cenggurssaa ezggees. Xoossaassi yayyiyoobi a qofan baawa.

² Aissi giikko, i bana keehippe nashshees; hegaassi i ba nagaraa demmanaunne ixxanau danddayenna.

³ A doonaappe kiyiya haasayai genenne worddo. Aadhdhida eraabaanne lo77obaa oottiyoogaa i aggiis.

⁴ I ba hiixan de7iiddikka genebaa oottanau halchchees. I lo77o gidenna ogiyan eqqiis; i iitabaa ixxenna.

⁵ Abeet GODAU, aggenna ne siiqoi salota gakkees; ne tumatettaikka bolla shaaraadan xoqqees.

⁶ Ne xillotettai ubbaappe xoqqa deretu mala; ne pirddaikka ubbaappe ziqqa ciimmaa mala. Abeet GODAU, neeni asaakka do7aakka naagaasa.

⁷ Abeet Xoossau, aggenna ne siiqoi aiba al77obee! Asai ne qefiyaa giddo baqati attees.

⁸ Eti ne so gidaappe miidi kalloosona; ne kehatettaa shaafaappe neeni eta ushshaasa.

⁹ Aissi giikko, de7uwaa pulttoi ne achchan de7ees; ne poo7uwan nuuni poo7uwaa be7oos.

¹⁰ Nena eriyaageeta neeni siiqiyo siiquwaanne suuretussi kehiyo kehaa aggoppa.

¹¹ Otoranchchaa tohoi tana yedhdhoppo; nagaranchchatu kushee tana yedettoppo.

¹² Iita asati kunddidaageeta be7ite; eti kunddidosona; denddanaukka danddayokkona.