Mazamure Maxaafaa 31 - Wolaytta Bible

Daawita mazamuriyaa

¹ Abeet GODAU, taani neekko baqatais; audenne tana yeellayoppa. Ne xillotettan tana ashsha.

² Ne haittaa taakko yegga; eesuwan tana ashsha. Neeni taani geemmiyo wogga zaallanne tana ashshiya mino qato taassi gida.

³ Ee, neeni taayyo wogga zaallanne qato; ne sunttaa gishshau, neeni tana kaalettanne bessa.

⁴ Neeni taayyo geemmiyoosaa gidiyo gishshau, eti tau qotti wottido piriyaappe tana neeni naaga.

⁵ Abeet GODAU, tumaa Xoossau, taani ta shemppuwaa ne kushiyan wottais; neeni tana wozana.

⁶ Pattenna eeqatussi goinniyaageeta neeni ixxaasa; shin taani GODAN ammanettais.

⁷ Ta metuwaa neeni be7ido gishshaunne ta tuggaa neeni erido gishshau, taani aggenna ne siiquwan ufaittananne ufaissau poocu gaana.

⁸ Neeni tana morkkiyaa kushiyan aattada immabaakka; ta tohotakka aaho sohuwan essadasa.

⁹ Abeet GODAU, taani metuwan gelido gishshau, taayyo qaretta. Taani daro mishettido gishshau, ta aifeekka, ta ashoikka, ta shemppoikka daafuriis.

¹⁰ Mishuwaa daruwan ta de7oi ciriis; ta laittatikka oolishin wuridosona. Metuwaa daruwan ta wolqqai hitiis; ta meqettatikka arggaacidosona.

¹¹ Ta morkketu ubbaa gaasuwan taani ta shoorotuyyo kariyoobaa, ta dabbotuyyookka yashissiyaabaa gidaas. Ogiyan tana be7idaageetikka taappe baqatoosona.

¹² Taani haiqqidabaadan dogettaas; moorettin olidobaa mala gidaas.

¹³ Taani darotu saasukettaa siyaas; dagamai ubbasaara de7ees. Eti ta bolli yaa7oosonanne tana woranau maqettoosona.

¹⁴ SHin GODAU, taani nenan ammanettada, “Neeni ta Xoossaa” yaagais.

¹⁵ Ta de7oi ne kushiyaana. Tana yedettiya ta morkketu kushiyaappe tana neeni ashsha.

¹⁶ Ne ashkkaraa bollan ne som77uwaa poo7issa; aggenna ne siiquwan tana ashsha.

¹⁷ Abeet GODAU, taani nena xeesiyo gishshau, tana yeellayoppa. SHin iitati yeellatona; eti duufuwan gelidi, sirphphi goona.

¹⁸ Otoruwaaninne kariyan xillotu bolli xalidi haasayiyo gishshau, eta worddotiya doonaa co77u ootta.

¹⁹ Neessi yayyiyaageetuyyo neeni minjjidonne neekko baqatiyaageetuyyo asaa sinttan neeni oottido ne kehatettai aiba daroo!

²⁰ Neeni eta ne sinttan geema sohuwan genttada, asaa maqquwaappe ashshaasa. Neeni eta ne dunkkaaniyan qosada, inxxarssaa boshaappekka ashshaasa.

²¹ Taani morkkee doddido katamaa giddon de7iyo wode, i tana maalaalissiya ba aggenna siiquwaa bessido gishshau, GODAI galatetto.

²² Taani dagammada, “Taani ne sinttaappe kichchaas” yaagaas. SHin tana maaddana mala, nena xeesido wode, ta watiwatuwaa neeni siyadasa.

²³ Inttenoo, Xoossaa asatoo, GODAA siiqite. GODAI ammanettiyaageeta naagees; shin otoranchchatussi eta waagaa wurssi qanxxees.

²⁴ Inttenoo, GODAN ufaissaa oottiyaageetoo, minnitenne wozannaamite.