Mazamure Maxaafaa 28 - Wolaytta Bible

Daawita mazamuriyaa

¹ Abeet GODAU, ta wogga zaallau, taani nena xeesais; taani nena xeesin, taayyo tulloppa. Ne co77u giikko, taani duufuwaa biida asatu mala gidais.

² “Maaddo” gaada taani nena xeesiyo wodenne ne geeshsha Beeta Maqidasiyaakko zaarada ta kushiyaa micciyo wode, neeni ta watiwatuwaa siya.

³ Tana iita asatuura gattada oiqqoppa; eti iitabaa oottiyaageeta. Hegeeti bantta wozanan kobabaa qoppi uttidi, bantta doonan bantta shooruwaara sarobaa haasayiyaageeta.

⁴ Eta oosuwaadaaninne eta oosuwaa iitatettaadan etau qanxxa; eta kushiyaa etau zaara. Etau bessiya iitaa etau zaara.

⁵ Eti GODAA oosuwaanne a kushee medhdhidobaa wudennan ixxido gishshau, GODAI eta qolana; zaaridi eta mulekka keexxenna.

⁶ Ta watiwatuwaa siyido gishshau, GODAI galatetto.

⁷ GODAI taayyo wolqqanne gonddalle; ta wozanai an ammanettees; hegan taani maadettaas. Hegaa gishshau, ta wozanai an ufaittees; taani yettan a sabbana.

⁸ GODAI ba asaayyo wolqqa; i ba dooridi tiyido kawuwaa ashshiya miixaa.

⁹ GODAU, ne asaa ashsha; neessi gidiyaageeta anjja. Eta heemmiyaagee nena gida; neeni eta merinaukka heemma.