Mazamure Maxaafaa 22 - Wolaytta Bible

Daawita mazamuriyaa

¹ Ta Xoossau, ta Xoossau, tana aissi aggadii? Tana maadda gaada taani neeyyo watiwatiyo wode, aissi taappe haakkai?

² Abeet ta Xoossau, gallassan ubban taani neeyyo waassais; shin neeni taayyo allakka. Qamman ubbankka neeyyo waassais, shin woppaa demmikke.

³ Gidikkonne, neeni kawotaa araatan geeshsha gidada uttadasa. Neeni Israa7eelati galatiyoogaa.

⁴ Kase nu aawati nenan ammanettidosona; nenan ammanettin, neeni eta ashshadasa.

⁵ Neeyyo waassidi attidosona; nenan ammanettidi yeellatibokkona.

⁶ SHin taani asa gidikke; taani guxune. Taani asan karettidaagaanne qilliiccettidaagaa.

⁷ Tana be7iya ubbati qiroosona; eti tana qoosoosonanne bantta huuphiyaa qaattoosona.

⁸ Yaatidi, “Neeni GODAN ammanettoohoo; aissi nena ashshennee? GODAI nena dosikko, ane nena ashsho” yaagoosona.

⁹ Gidikkonne, tana ta aayee uluwaappe suure yeletissidaagee nena; ta aayee xanttaa xammiyo wodekka taani nenan ammanettanaadan oottadasa.

¹⁰ Taani yelettoosappe doommada nenan diccaas; ta aayee uluwaappe doommadakka, neeni ta Xoossaa.

¹¹ Metoi taakko matiyo gishshaunne tana maaddiyaabi bainna gishshau, hai neeni taappe haakkoppa.

¹² Daro morkketi korima booratudan tana dooddoosona; qaiciya Baasaane biittaa booratudan tana dooddoosona.

¹³ Mentterettiyaanne gudiya gaammuwaadan bantta doonaa ta bolli hanggoosona.

¹⁴ Taani haattaadan goggaas; ta meqettati bantta kuushshaappe kolettidosona. Ta wozanai eessaa muqaaddaa mala, ta giddon seeri wurees.

¹⁵ Ta qooree kon77adan melees; ta inxxarssai kookkiyaara ohettees. Neeni tana haiqqida asadan baanan yeggadasa.

¹⁶ Iita asati cora kanatudan tana yuuyi aadhdhidi teqqoosona. Ta kushetanne ta tohota caddoosona.

¹⁷ Ta meqettati ubbai taayyo beettoosona. Ta morkketi tana xeelloosonanne dereqqoosona.

¹⁸ Ta maayuwaa shaakki ekkoosona; ta adussa maayuwan saamaa yeggoosona.

¹⁹ Abeet GODAU, neeni mati taappe haakkoppa. Abeet ta wolqqau, tana maaddanau eesuwan haaya.

²⁰ Tana bisuwaappe ashsha; ta al77o de7iyo kanatu wolqqaappe ashsha.

²¹ Gaammotu doonaappe tana ashsha; qaiciya bazzo booratu kaciyaappe tana naaga.

²² Taani ne sunttaa ta ishanttussi yootana; maabaraa shiiquwankka nena galatana.

²³ Inttenoo, GODAASSI yayyiyaageetoo, a galatite. Inttenoo, Yaaqooba zerettatoo, ubbaikka a bonchchite. Inttenoo, Israa7eela zerettatoo, ubbatikka bonchchuwan ayyo yayyite.

²⁴ I naaqettidaageeta karenna; eta gakkida qohuwaa tau ai metoo geenna. Bari som77uwaa etappe genttenna; shin eti maaduwaassi akko waassiyo wodiyan, eta waasuwaa siyees.

²⁵ Taani neeni oottido lo77o oosuwaa gishshaassi, kunttida yaa7an galatana. Taani shiiqettidobaa neeyyo yayyiya asaa sinttan gattana.

²⁶ Hiyyeesati miidi kallana. GODAA koyiyaageeti a galatana. Eti merinau duretana.

²⁷ Sa7aa gaxaa gakkanaassi de7iya asai ubbai hassayidi, GODAAKKO simmana. Asa zare ubbai assi goinnana.

²⁸ Aissi giikko, kawotiyo maatai GODAABAA; kawotettata i haarees.

²⁹ Sa7an de7iya dure asati ubbai maananne ayyo goinnana. Banttana haiquwaappe ashshanau danddayennaageetinne baanau laamettiyaageeti ubbati ayyo gulbbatana.

³⁰ Yiya zerettai ayyo kiitettana; asai Godaa oosuwaa yiya yeletau yootana.

³¹ Biron yelettibeenna asaassikka, “Xoossai ba asaa ashshiis” yaagiyoogee odettana.