Mazamure Maxaafaa 20 - Wolaytta Bible

Daawita mazamuriyaa

¹ Neeni metootido wode GODAI ne woosaa siyo; Yaaqooba Xoossaa sunttai nena naago.

² Ba Beeta Maqidasiyaappe neeyyo maaduwaa kiitto; Xiyooneppe nena kaafo.

³ Ne yarshshuwaa ubbaa i neeyyo hassayo; ne xuuggiyo yarshshuwan ufaitto.

⁴ Ne wozanaa amuwaa neeyyo immo; ne halchchuwaa ubbaa polo.

⁵ Ne xoonuwaa gishshau, nuuni ufaissau hombbocana; nu Xoossaa sunttan nu banddiraa xoqqu oottana. Neeni woossidobaa ubbaa GODAI neessi immo.

⁶ GODAI ba doorido kawuwaassi xoonuwaa immiyoogaa taani biron erais. I ba geeshsha saluwan siyana; siyidi, ba ushachcha kushiyan gita xoonuwaa ayyo immana.

⁷ Issooti issooti bantta ola parai goochchiyo gaariyan, harati bantta paran ceeqettoosona; shin nuuni GODAA nu Xoossaa wolqqan ceeqettoos.

⁸ Eti xubettidi kunddana; shin nuuni denddidi, minni eqqana.

⁹ Abeet GODAU, kawuwaassi xoonuwaa imma; nuuni nena xeesiyo wode siya.