Mazamure Maxaafaa 135 - Wolaytta Bible

¹ GODAA galatite! Inttenoo GODAA ashkkaratoo, GODAA sunttaa galatite!

² Inttenoo GODAA keettaa giddon, nu Xoossaa keettaa dabaaban eqqidaageetoo, GODAA galatite!

³ I keha gidiyo gishshau, GODAA galatite! I lo77o gidiyo gishshau, a sunttaa sabbite!

⁴ GODAI Yaaqooba ba huuphessi, Israa7eela asaakka bau buzo oottidi dooriis.

⁵ GODAI gita gidiyoogaanne nu Godai xoossatu ubbaappe xoqqiyoogaa taani erais.

⁶ Saluwankka sa7ankka, abbatunkka ciimma ubbaa giddonkka i ba dosidobaa ubbaa oottees.

⁷ Dulkka shaaraa sa7aa gaxaappe i denttees; i iraara wolqqanttaa kiittees; ba minjjiyo sohuwaappe carkkuwaa kessees.

⁸ Gibxxe biittan asaa naatuppenne mehiyaa maraappe baira yelettidaageeta woriis.

⁹ He sohuwan Gibxxe kawuwaanne a ashkkarata ubbaa qaxxayanau, oorattabaanne maalaalissiyaabaa oottiis.

¹⁰ I daro kawotettata bashshiis; wolqqaama kawotakka woriis.

¹¹ Amooretu kawuwaa Sihoona Baasaane kawuwaa Ooganne Kanaane kawota ubbaa woridi,

¹² eta biittaa ba asata, Israa7eelata laatissiis.

¹³ Abeet GODAU, ne sunttai merinau de7ana; yeletaappe yeletaa gakkanaassi neeni hassayettana.

¹⁴ GODAI ba asaayyo pirddana; i ba ashkkaratuyyo qarettana.

¹⁵ Dere asatu eeqati asa kushee biraappenne worqqaappe medhdhidoogeeta.

¹⁶ Etau doonai de7ees, shin haasayokkona; aifee de7ees, shin xeellokkona.

¹⁷ Haittai de7ees, shin siyokkona; eta doonan shemppoi baawa.

¹⁸ Eta medhdhidaageetinne etan ammanettiyaageeti ubbai etadan hanona.

¹⁹ Israa7eela keettaa asatoo, GODAA galatite; Aaroona keettaa asatoo, GODAA galatite;

²⁰ Leewa keettaa asatoo, GODAA galatite; GODAAYYO yayyiyaageetoo, ubbai GODAA galatite.

²¹ Yerusalaamen de7iya GODAI Xiyoonen galatetto! GODAA galatite!