Mazamure Maxaafaa 127 - Wolaytta Bible

Pudettaa kiyiiddi yexxido yettaa, Solomoni xaafidoogaa

¹ GODAI keettaa keexxana xayikko, keexxiyaageeti coo mela daafuroosona. GODAI katamaa naagana xayikko, naagiyaageeti coo mela naagoosona.

² Neeni maallado guuran denddiyoogee, omarssi qamissada zin77iyoogee, qumassi hirggada tuggatiyoogee coo mela; aissi giikko, GODAI ba siiqiyoogeetau qumaa immees.

³ Naati GODAAPPE imettiya imota; yeloti tumuppe woito.

⁴ Issi urai ba yelagatettan yelido naati, olanchchaa kushiyan de7iya tooratu mala.

⁵ He tooratu mala daro naati de7iyo asi anjjettidaagaa. Aissi giikko, i ba morkketuura pirddaa yaa7an mootettiyo wode, mulekka shatimettenna.