Leemiso Maxaafaa 29 - Wolaytta Bible

¹ Daroton seerin ixxidi, morgge zozzida urai hassayennan meqqana; he urau paxoikka baawa.

² Xillo asati sunttettiyo wode asai ufaittees; shin iitati biittaa haariyo wode asai oolees.

³ Aadhdhida eraa dosiya asi ba aawaa ufaissees; shin shaaramuxa maccaasatu heeran yuuyiya asi ba miishshaa wurssees.

⁴ Tumaa pirddiya kawoi ba kawotettaa woppu oottees; shin mattaaye maanau yiiqetiyaagee ba kawotettaa bashshees.

⁵ Ba shooruwaa sabbidi haasayiya urai, a tohuwaassi gitiyaa yeggees.

⁶ Iita asi gitee oiqqiyoogaadan, ba nagaran oiqettees; shin xillo asi ufaittanaunne yexxanau danddayees.

⁷ Xillo asi hiyyeesaa maataa erees; shin iita asi hegaa mala eraa mulekka erenna.

⁸ Qilliicciyaageeti kataman ooshshaa denttoosona; shin aadhdhida eranchcha asati hanqquwaa gabbissoosona.

⁹ Aadhdhida eranchcha asi eeyya asa pirdda keettaa efiikko, eeyyai hanqqetteesinne qirees; au yaatobare saroi xayees.

¹⁰ Suutta gussanau jaamiya asati suure asa ixxoosona; qassi xillo asakka woranau koyoosona.

¹¹ Eeyya asi ba hanqquwaa yeddi bessees; shin aadhdhida era asi ba hanqquwaa mittees.

¹² Issi sunttettida urai worddo odo ekkikko, a oosanchchati ubbai iita kiyoosona.

¹³ Hiyyeesinne asa naaqqiya asi issibaa koxxoosona; eta naa77aa aifiyaakka GODAI xeelissees.

¹⁴ Issi kawoi hiyyeesassi suure pirddikko, i ba kawotettan gam77ana.

¹⁵ Qaixaareenne seeri naatussi aadhdhida eraa immees; shin yedan diccida na7i ba aayyiyo kaushshees.

¹⁶ Iita asati dariyo wode, nagarai darees; shin xilloti eta kunddettaa be7ana.

¹⁷ Ne na7aa seera; yaatikko, i nena saruwaa diggenna; i nena ufaissana.

¹⁸ GODAI kaalettiyo kaaletuwaa ekkenna deree yeda; shin higgiyaa naagiya uri anjjettidaagaa.

¹⁹ Ashkkari coo odo xalaalan seeretti erenna; odoi au geliyaakkokka i azazettenna.

²⁰ Eesuwan eesuwan haasayiya uraa be7a eraishsha? Appe eeyya uraassi sinttanau daro ufaissai de7ees.

²¹ Ne ashkkaraassi naatettan doommin, i koyiyoobaa ubbaa ayyo imma meezeyikko, issi gallassi neeyyo de7iyaabaa ubbaa ekkanau i kajjeelanaagee attenna.

²² Hanqqettiya asi ooshshaa denttettees; elle yiillotiya asi daro nagaraa oottees.

²³ Otoroi asa kaushshees; shin ziqqi giya ayyaanai de7iyo asi bonchchettees.

²⁴ Kaisoora shaakkiya uri bana ixxiya asa; i dabaaban tumaa odikkokka qaxxayettees; tumaa odana xayikko qassi, GODAI a qaxxayana.

²⁵ Asassi yayyiyoobi he aawussi pire gidees; shin GODAN ammanettiya asi saro de7ees.

²⁶ Daroti sunttatettai de7iyo asata auddashoosona; shin suure pirddai GODAA achchappe beettees.

²⁷ Xilloti nagaranchchata shenetoosona; nagaranchchatikka suure uraa shenetoosona.