Iyyooba Maxaafaa 23 - Wolaytta Bible

Iyyoobi Haasayees

¹ Yaagin Iyyoobi hagaadan yaagidi zaariis;

² “Taani ha77ikka Xoossaa bolli makkalaisinne zuuzummais; aissi giikko, taani oolinkka a kushee ta bolli deexxiyoogaa aggibeenna.

³ I de7iyoosaa taani erarkkinaashsha! I uttidosaakka gakkarkkinaashsha!

⁴ Yaatiyaakko, taani ta mootuwaa a sinttan biddana shin! Ta doonaakka palaman kunttana shin!

⁵ I ta mootuwaayyo zaariyoobi aibakkokka taani erana shin!

⁶ I ba gita wolqqan tanaara eqettaneeshsha? CHii, chii, i taani odiyoogaa siyanaappe attin, hegaa hanenna.

⁷ Ta wozanai suure gidiyo gishshau, taani Xoossaara mootettanau danddayais; i ta daannai tana merinau shatinttana.

⁸ “SHin aissee, taani arshsho biikko, i yan de7enna; qassi taani arggo biikkokka, a demmikke.

⁹ I huuphessa bagga biittan oottiyo wode, taani a be7ikke; qassi tohossa bagga biitti simmiyo wodekka, taani a demmikke.

¹⁰ SHin i ta tangguwaa ubbaa erees; i tana paaccikko, taani worqqaadan geeshsha gidiyoogaa i be7ana.

¹¹ Taani i hemettido ogiyaa baqqa oiqqada hemettaas; a ogiyaappe wora simmabeikke.

¹² A doonaappe kiyiya azazuwaappe taani shaahettabeikke; a qaalaakka ta wozanan wottaas.

¹³ “Xoossai laamettenna. Aara eqettana, woikko ba koyidobaa i oottennaadan a teqqana asi baawa.

¹⁴ I taayyo halchchidobaa polana; hegeetu mala, hara daro halchchotikka ayyo de7oosona.

¹⁵ Hegaa gishshau, a sinttan eqqiyoogee keehippe tana yashshees; hegaa ubbabaa qoppada, taani kokkorais.

¹⁶ Ta wozanai taahanaadan Xoossai oottiis; Ubbaa Danddayiya Xoossai tana daganttiis.

¹⁷ Sakkana xumai ta som77uwaa goozikkokka, tana he xumai haasayaa diggibeenna.