Iyyooba Maxaafaa 16 - Wolaytta Bible

Iyyoobi Haasayees

¹ Yaagin Iyyoobi hagaadan yaagidi zaariis;

² “Taani hagaa mala haasayaa daruwaa siyaas; intte minttettoos giiddi, tana metiyaageeta.

³ Ha go77i bainna intte haasayaayyo wurssetti baawee? Tanaara inttena hagaa keenaa palamissiya gaasoi aibee?

⁴ Intte ta sohuwan de7in, taani intte sohuwan de7idabaa gidiyaakko, taanikka ta huuphiyaa qaattaidda, ha77i intte giyoobaa ubbaa intte bolli loittada haasayana shin!

⁵ Hegaadankka, ta zoriyan taani inttena minttana shin! Ta doonaappe kiyiya haasayaikka inttena minttettana shin!

⁶ “SHin taani haasayiyaakkokka, ta sahoi decenna; taani co77u gaada danddayiyaakkokka, taappe kichchenna.

⁷ Abeet Xoossau, neeni tana hitti oottadasa; ta keettaa asaa ubbaakka xaissadasa.

⁸ Neeni ta gogaa melissadasanne gunddissadasa; ta bollaakka gilqqissadasa. Hegaa gishshau, asai tana be7idi, 'Hagee i nagaranchcha gidiyoogau markka' yaagees.

⁹ Xoossai ba hanqquwan tana duuteretti yeggiis; ba achchaakka ta bolli garcciis; i ta morkkee tana dereqqees.

¹⁰ Asati ta yuushuwan shiiqidosona; shiiqidi ta bolli qilliicciiddi, ta qinxxalliyaa baqqidosona.

¹¹ Xoossai nagaraa oottiya asatuyyo tana aattidi immiis; iitatu kushiyankka i tana oliis.

¹² “Taani kase woppu gaada de7aas; shin Xoossai tana kinchcherettiis; ta mirggaaciyaa oiqqidi, i tana mentterettiis. Qassi i tana zambbi kaa7anau baazzan wottiis;

¹³ a wonddafiyaa zubbeti tana yaara haara muddidosona. Qareti bainnan i ta kilahuwaa caddidi, ta ciyyiyaa ta tiriyaappe sa7an gussees.

¹⁴ Olanau woxxiya olanchchaadan, i tana zaari zaaridi masunxxissees.

¹⁵ Taani kayyottada, waaruwaa maayaas; ta wolqqaikka baanan olettiis.

¹⁶ Taani yeekkiyo yeehuwaa daruwan ta som77oi puuriis; ta aifeekka zo77iis.

¹⁷ SHin ha ubbankka taani mooridobi baawa; ta woosaikka geeshsha.

¹⁸ “Biittau, biittau, ta suuttaa kammoppa; taani waassanaagaa diggoppa.

¹⁹ Ha77ikka ta markkai saluwaana; taayyo xabaqatiyaagee bolla xoqqaana.

²⁰ Ta laggeti tana karidi xeelloosona; ta aifee Xoossaa sinttan afuttaa tigees.

²¹ Asaa asaara walassidi sigettiya asi de7iyoogaadan, tana Xoossaara sigettiya asi de7idaa gideerenneeshsha!

²² Aissi giikko, aramida laittati aadhdhidoogaappe guyyiyan, taani simmennasaa baana.