Gara Worra Galaatiyaa 5 - WAADAA LAMMATAA

Wolabummaa Kiristoosiin Argamu

¹ Wolabumma'aan akka jiraannuuf Kiristoos wolaba nu baase. Eegasuu jabaadha'aa dhaabadhaa'a! Deebitanii qanbaraa garbumma'aatiin hin qabaminaa'a!

² Eeganaa ani Phaawuloos akkana isiniin jedha, yoo gadoomtan Kiristoos womaa isin hin fayyadu.

³ Seera maraa akka raawwatu dirqamni irra jira jedhee, worra gadooman maraa tokko tokko isaaniitittillee akkasuma ragaa baya.

⁴ Seeraan qajeellota ta'uu worri barbaaddan, Kiristoosiin irraa fooyamtanii, badhaadha Rabbii irraa kuftaniirtan.

⁵ Nu Ayyaana amanta'aatiin abdii wolabumma'a waan eeggannuuf.

⁶ Jaalala amantaa Yesuus Kiristoosiin ta'e hujuu malee, gadoomuun yookiin gadoomuu dhabuun waan hin fayyanneef.

⁷ Isin akka mishaa fiiga'aa turtan. Ammoo dhuga'aaf akka hin ajajamne eentu isin dhoogge?

⁸ Sosobbiin akkanaa kun ka isin waame irraa miti.

⁹ Raacitiin diqqoon duukkuussii maraa hin buukeessa.

¹⁰ Waan adda ta'e horoma akka hin yaanne, ani Gooftaa waan keessaniif hedadheera eennullee ka isin raasu yoo jiraate murtee ufii argata.

¹¹ Haata'uu ammoo, obboleeyyan tiyya haga ammaa ani uduu waan gadoomu'uu himee, silaa haga ammaa maali'iif na ari'an? Eeganaa gufuun fannoo Kiristoosiitiin kara'aa dhooggameera.

¹² Worri isin jaanjursan sunniin gadoomuu callaa uduu hin ta'in, uf irraallee haa muranii.

¹³ Obboleeyyan tiyya! Isin wolabumma'aaf waamamtaniirtan; ammoo wolabumnaan keessan foonii sababaa akka hin kennine. Haata'uu ammoo, isin wolii akka garbootaa ta'aa'a.

¹⁴ Seeri maruu dubbii tokkon waan raawwatamuuf, innillee, «Goshoo kee akka uf jaalattutti jaaladhu! ka jedhu.

¹⁵ Haata'uu ammoo isin uduu wol ciniintanii fi wol nyaattan akka wol hin balleessine uf eegaa'a!

Hujii Ayyaanaatii Fi Hujii Foonii

¹⁶ Haata'uu ammoo akkana jedha; Ayyaana Woyyu'uun jiraadhaa'a; hawwii foonii sirima hin raawwatinaa'a.

¹⁷ Foon Ayyaana irratti, Ayyaanillee foon irratti waan hawwuuf; kunniin lamaan waan wol mormaniif, kanaafuu waan jaalattan godhuu hin dandeettan.

¹⁸ Yoo Ayyaana Woyyu'uun yoo masakkamtan ammoo, Seeraa gad jirtan.

¹⁹ Hujiin foonii addaata'a. Innillee seebaruu, batta'ummaa,

²⁰ Wol qirqirsuu, waaqa tolfamaa kaddaamuu, moruu, diinummaa, wol mormii, hinaaffaa, mufii, uf jaalachuu, wol dhabuu,

²¹ Nama wol caalchisuu, barumsa sobaa, dhiibbifatuu, ajjeesuu, machii, sirbaa fi ka kanniin fakkaatu; akkuma kanaan dura isinitti hime, worri waan kana godhan horoma jeennata hin galan.

²² Daraaraan Ayyaanaa ammoo, jaalala, gammachuu, Nagaya, obsa, arjummaa, mishooma.

²³ Amantaa gara-laafumma'aa fi uf qabuu seerri waan akkanaa kanniin dhooggu hin jiru.

²⁴ Worri ka Yesuus Kiristoosii ta'an, hawwii hamaa foon isaanii woliin fannisaniiran.

²⁵ Ayyaana Woyyuu keessa yoo jiraanne, Ayyaanuma kanaan haa jiraannuu.

²⁶ Ufii wolitti kakka'aa, hinaaffaa duwwa'aan akka uf hin janye.