Gara Ibirootaa 8 - WAADAA LAMMATAA

Yesuus Gadicha Hayyicha Waadaa Haarawaati

¹ Waan dubbanne keessaa wonti guddaan kana. «Ka sami'itti teessoo ulfinnaa irra mirga Rabbii taa'e, gadicha hayyicha guddaa akkanaa kana qabna»

² Inni tajaajilaa mana woyyu'uutii fi tajaajilaa dukkaanaa dhuga'aa ti, isiinillee ta namaan uduu hin taane ta Goofta'aan ijaaramte.

³ Hayyoonni gadootaa maruu, kenna'aa fi ciincaa dhiyeessu'uuf muudaman. Kanaafillee akkasuma waan dhiyeessu qabaachuun giddi'i.

⁴ Inni lafarra uduu jiraatee, akka seeraatitti gadoonni kennaa dhiyeessan waan jiraniif silaa gadicha hin ta'u.

⁵ Dukkaanni gadoonni keessatti tajaajilan kun dukkaanaa samii gubbaa jiruuf fakkeennaaf gaaddiddu'u, hennaa Muuseen dukkaanaa ijaaru'uuf ka'e, Rabbi, «Waa maraa malaan akkuma fakkeenna gaara irratti sitti mudhisetti uf eeggadhuu huji!» jedheeniiti.

⁶ Amma ammoo, waadaan Yesuus jiddu-galeessa ta'e; waadaa duraa maraa akkuma caalu, tajaajilli inni fudhatellee tajaajila isaanii hin caala; kun abdii caalu irratti hundeeffame.

⁷ Kakuun duraa uduu ka mudaa hin qabne ta'ee, silaa ka lammaffa'aatiif huleen hin barbaadamu.

⁸ Isaan tuffata'aa akkana isaaniin jedha, «Kunnoo ji'oonni mana Isiraa'eliitii fi Yihuuda'aa woliin waadaa haarawa galu hin dhufa» jedha Gooftaan.

⁹ Biyya Misiriitii isaan baasu'uuf guyyaan harka isaanii qabe, waadaa akka abboota isaanii woliin galeetii miti. ‹Isaan waada kiyya irra waan hin dhaabanneef, anillee lash isaanitti jedhe› jedha Gooftaan.

¹⁰ ‹Ji'oota sanniiniin maayii, waadaan mana Isiraa'elii woliin galu, seera kiyya qalbii isaanii keessa kaaya; Onnee isaaniitittillee hin barreessa; ani Rabbiin isaanii ta'a, Isaanillee banii kiyya ta'an, ka jedhu kana› jedha Gooftaan.

¹¹ ‹Marti isaaniituu ollaa ufiitiin obboleessa ufiitiinillee, Gooftaa beeki! jedhee hin barsiisu; diqqa'aa haga gudda'aatitti martinuu waan na beekaniif.

¹² Waan hammeenna isaaniitiifillee isaanii araarama; cubbuu isaanillee lammata hin yaadu.› »

¹³ Haarawa jechuu isaatiin ka duraa moofseera, wonti moofaanii fi ka jaare badu'uuf dhiyaateera.