Matthaiga 5 - Winnebego Bible Portions 1907

¹ Egi worohanka hajagi, xexete hihageja howarena, egi jaja minagkhi, wironag warnira hirahirena.

² Egi ishabanaga washa wagigussana egi wena:

³ Wogishawarnankshana naxirag wanajojaisgera, hungma wangregi herera earninege.

⁴ Wogishawarnankshana jarnaga najgetegra, warukheghirekjanege.

⁵ Wogishawarnankshana xunu‐hakikaranira mara harninekjanege.

⁶ Wogishawarnankshana jarnaga washophi dokewehira egi washophi iwusra, wainaj‐hirekjanege.

⁷ Wogishawarnankshana najwojankera, najwojaine kiruxurug‐hirekjanege.

⁸ Wogishawarnankshana najge‐sgera, Maura hajairekjanege.

⁹ Wogishawarnankshana rashguni khiwahira, Maura ninkjang warnira wawigairekjanege.

¹⁰ Wogishawarnankshana jarnaga washophi hawau wawigishananankhi, hungma wangregi herera earninekjanege.

¹¹ Wogishawawiaje jaja wankshigra najinisgi hirawigi egi hinigishana hirawigi, egi washa wowonk hokiraj hinigairekjanihawina Ne hawau.

¹² Wogishawawiaje egi mashja giphiwianje, wangregi woirowe hashiniwira rokanankshana; deshesge prophetra wawigishana hirena e jowerawiregi hajirera.

¹³ Managre hisguhira neninewina, eshi nisgura hosgura gixawarnigi jaguisha hisguhiranashe, epa inke washiroku phiraninana, eshi jangra hot’une hiranana egi wankshig warnashi hiranana.

¹⁴ Managre hohamb harnira neninewina, jhinagra hisha xe‐hihageja minagkhi inke nuxawa ruxurugninana.

¹⁵ Inke shige hisha hiratashakerehira daehigi egi wigus hokipi khuhainja kereninana, eshi hiratashakerehi hornashieja kerenana, egi jhieja jarnagakhi hatasha wagiginana.

¹⁶ Deshesge‐hiwire hohamb washiniwira wankshig jowehireja hatasha wakarakerewire, worephi washiniwira warnigija‐hirekjawina egi Hianjrawiga wangreginagre sharajangikjawina.

¹⁷ Woehira shige prophetra maisinj‐waha hajishe inke hirawinine, inke maisinj‐waha hajinina, eshi exji hereha hajina.

¹⁸ Hisgexji hinigawina, wangregi egi mara shejaineshge, jotara hisha egi hoshebnigra hisha woehieja inke shejanikjanena, harnaj exji herekjanera epa.

¹⁹ Higu peshe uwashi worujisdi de‐e higishanagi egi wankshigra shesge wagigusgi, e hungma wangregi worujisdira higairekjanena eshi higu peshe uanaga wagigusgi e hungma wangregi xetera higairekjanena.

²⁰ Hisgexji hinigawina, inke hophi hashiniwira Wowagax‐hiperesra egi Pharisera hophira wiranijairawinigi inke hungma wangregi hokewe shuruxurugwininana.

²¹ Warnaraxguwina, jowarejaxjira wairena: Inke wat’ehinine, egi higu peshe wat’ehigi, woehieja hikjanena.

²² Eshi hinigawina: Higu peshe khinubra eja hapahi wogiteghi, woehieja hikjanena, egi higu peshe khinubra inke washanisha hereni higegi (sanhedrim) woehixeteja hikjanena, eshi higu peshe khinubra wanai wowong ranina higegi, pejshishigeja hikjanena.

²³ Esge woga hashinira nabruxaj‐haueja hashinirajigi, egi eja rakhinubra wewianje washara hisha hiranikirajegi

²⁴ Nabruxaj‐haueja woga hashinira karashuanaga egi jorni karanaga egi rakhinubra rashguni khianaga egi hageja kirige egi woga hashinira nab‐hikuruxajaje.

²⁵ Haerakhira xapge rashguni khianje harakishu sharasharegi, nigete haerakhira waehira‐eja wornigarnaga, egi waehira warukoseja wornigarnaga egi jhi‐hornanissekjanena.

²⁶ Hisgexjina hinigena, eja inkaga hirahishanabnikjanena, jaja shurashujra harnaj hirowe‐ragishana.

²⁷ Nanaxguwina jowarejaxjina wairena: Inke hikikshaksha‐winianje.

²⁸ Eshi hinigawina: Higu peshe hinugra hisha horuxuj‐anaga rogungi hikshakshagini waunana najge harnieja.

²⁹ Egi hishjasu hoishoro hashiniwira washa wowonkunigi, rushorojanaga egi nigehot’unaje, e hiraijera niphinkjanena waisa washinira hisha d’egi egi inke ro hashinira harnaj pej‐shishigeja hot’unairanigi.

³⁰ Egi nab‐hoishoro hashinira washa wowonk unigi, gikunugaje egi nige‐hot’unaje, e hiraijera niphinkjanena waisa washinira hisha d’egi egi inke ro hashinira harnaj pej‐shishigeja hot’unairaninana.

³¹ Egi wairena: Higu peshe hijawira t’unegi, hinugjega kit’une wawagaxra hisha harnigigikjena.

³² Eshi hinigawina: Higu peshe hijawira karat’unegi, hikshakshaire khingishana waunana, hikshakshairehi waunana, egi higu peshe hinug‐t’unairega khanagkhi, e hikshaksha waunana.

³³ Shige nanaxguwina jowarejaxjira wairena: Inke washa woretunk wihohi hiuwinianje, eshi Hirukanara jagu wihoragigigi giuanje.

³⁴ Eshi hinigawina: Inke wihohinianje, inke wangregi hiunianje Maura waminag harnira herege esge.

³⁵ Egi inke managre hiunianje, si‐hakere harnira herege esge, egi inke Jerusalemra hiunianje, hung‐xetera jhinag harnira herege esge.

³⁶ Inke nassu hashinira wihohi unianje, inke najura hisha sga shige seb hi‐shuruxurugnige esge.

³⁷ Eshi hirat’et’egi waje hojia, hojia, Inkaa, Inkaa. Jagurisha hiraijaira hishegi she‐e washoshishig hikjanena.

³⁸ Nanaxguwina wairena: Hisha hishjasura higishanagi, hishge hishjasura hisha higishanainekjanena, egi hisha hira higishanagi hishge hira hisha higishanainekjanena.

³⁹ Eshi hinigawina: Inke wowongra wajiswinianje, eshi higu peshe iro sanig hoishoro hashinira hojingi, sanigra hishge hija hagarnianje.

⁴⁰ Egi hisha woehi hiuanaga wonashixete hashinira rusgi, wonashixete hihageja here hashinira hirassa rusgigiaje.

⁴¹ Egi higu peshe hini‐harnini‐anaga wigus hisha harnikishu re‐naingi, wigus nup hakishu raje.

⁴² Hokuanje nigita‐gishi, egi hisha worniginaj jigi inke rushag keregiginianje.

⁴³ Nanaxguwina wairena: Hirakishu‐wusunjra wogixeteaje egi hornishigra hoshigaje.

⁴⁴ Eshi hinigawina: Hornishig‐hirawira wawogixetewiaje, washophi howe warogiguwiaje washoshishig‐howe ronigigu‐nangwigi, egi phiwagigiwiaje hornishig‐hirawigi egi gikaraj wagigiwiaje jarnaga washanigishgashgahirawigi egi hinigishana hirawigi.

⁴⁵ Hianjrawiga wangreginagre E ninkjang harniniwinana, wi harnira wowongra egi phira haxeb‐wagigijena, egi nishu huwagigijena phira egi wowongra.

⁴⁶ Egi waworagixetewigi wornigixete‐nangwigi, hironigi‐wawinashe? Jasge inke Publikanra shesge hininankshe?

⁴⁷ Egi warakhinub‐wirashana wawirakaragiwigi, jaguisha wawirajaira shuwinashe? Jasge inke Publikanra hishge shesge hininankshe?

⁴⁸ Esge wogisogji phiwianje, Hianjrawira wangreginagre wogisogji phinagra shesgawiaje.