Matthaiga 20 - Winnebego Bible Portions 1907

¹ Egi hungma wangregi herera wankshig jhirukana hikisgena, e haiuixjinig ware wa’shirena habsinsh max harnineja warera warairekjege.

² Egi jaja waranaka hamb‐hishara Denaria hisha (15 cents) hikisge khinegi, habsinsh max harnieja howarewagigina.

³ Egi ejaxji howagix hidanihanigi (gijiwi hishankijushguni) rena egi hijane hajarna woruwieja warogija nashinank’u.

⁴ Egi wawagena: Hishge habsinsh maxeja howarawire, egi higu jagu phingi hornikunkjawina, egi harairena.

⁵ Egi shige ejaxji howagix hirakewehanegi, egi hishankijushguni hanigi rena egi shige shesge hina.

⁶ Egi ejaxji shige howagix kerepanaishanaga‐hishankira‐hashananegi rena, egi hijane warogija nashinank’u wiena, egi wawagena: Jagu‐u hambserej egi warogija nanashiwishe?

⁷ Wagairena: Inke hisha ware hish’irawinige esge. Egi wawagena: Hishge habsinsh max harnieja howarawire, egi higu jagu phira shuruisjawina.

⁸ Egi jaja hoxjarnagi, habsinsh max hirukanara jhirukana harnira wagena: Warera wagigore, egi woirowera wokaraikare, hirowagjieja herenanka eja unarnaga egi jornixji herenanka hageni hirowe‐wagigiaje.

⁹ Egi jaja hishankirashananegi ware‐shi hiranihawira hakiriregi jarnagaka Denarianra hishashana rus‐hirena.

¹⁰ Eshi jaja jorninera hakiriregi, hiraijera rus‐hirekjane hirairena, egi hishge jarnagawiga Denarianra hishashana rus‐hirena.

¹¹ Egi jaja rus‐hiregi, jhi hirukanananka hakira hit’airena,

¹² Wairena: De‐e hirowagninangre howagix hishankira warairegaja egi wikisge hinagigiwi, ne wojexi hawawigaja egi hamb hotakajregi.

¹³ Eshi hisha hornigiharna egi wena: Hijakoronina, inke washinohira ningiunigaja, jasge inke Denaria hisha hikisge hinagikinishe?

¹⁴ Hashinira kurusanaga egi jikarare, eshi jarnaga hornikura hirowagninagre nishge shenaga wawagarna.

¹⁵ Washa warnigi inke jagu giphi hauninashe? Jasge hishjasu hashinira wowonkshe, hinphina esge?

¹⁶ Deshesgege hirowagnira jowera hahi hererekjanena egi jowera hirowagnira hahi hererekjanena, roha gigoiranunige eshi jarnagkhira gijairerana.

¹⁷ Egi jaja Jesus Jerusalemra howaregi hironag nuphashanara injabwakerena egi wawagena:

¹⁸ Horuxujwire, Jerusalemra howainawina egi Wankshig‐hinigra himanag‐hirekjanena nabhoruxaj hungeja egi wowagax‐hipereseja egi d’ehi wagigirekjanena.

¹⁹ Egi hirarujeja hereja rushjane‐hirekjanena igixjairekjege egi washa pahi higipsinsh‐hirekjanena egi nanamiheja haisaraj‐hirekjanena egi hamb‐hidanihangi kikawa‐ankjanena.

²⁰ Egi Sebedai ninkjangra hiunihirera hinigwahira wakarakishu jina, gikaraj‐hirena egi washaisha rogigu hirena.

²¹ Egi Jesus wagena: Jagu roragushe? Wagena: Hinigwaha nupiwi de‐e hungma hashinieja hisha hoishororaija egi hijanera hoirajgeraija minag‐hirekje woragagi.

²² Eshi Jesus horniharna egi wena: Inke hirapereswini washawina jagu ratawire, jasge niwirajgaisha hoshu tajgankjanera rajga shuruxurugwishe, egi ni‐hawaxuine shuruxurugwishe ni‐hawaxu hingiuinekjanera? Wagairena: Duxurug‐winana.

²³ Egi wawagena: Niwirajga harnira sharajgankjanihawina egi ni‐harniwaxu‐hirekjanihawina ni‐hiwaxuhirekjanera hiu, eshi nab‐hoishorohaija egi hoirajgehaija minagra inke ne wogara winenina, eshi wawok’uinanana Jajiga e hirushjawagigigi.

²⁴ Egi jaja kerepanaisha‐harnaka naxguinegi khikhinub nupharnaka inke waiphixji hiranina.

²⁵ Eshi Jesus wawagigorna egi wena: Hirapereswina, hirarujeja herera hung harninera wawirukana‐nagra egi jarnaga xeteakhi homashjara wagiwaharnankshana.

²⁶ Eshi inke shenisgarnikjawina horograwiregi, eshi higu peshe horograwiregi xetekjegi e ware hashinikjanihawina.

²⁷ Egi higu peshe horograwiregi hung‐gikjegi e warnihi‐hashinikjanihawina.

²⁸ Wankshig‐hinigra una shesge, E inke wagirairekje waunjinina eshi wawagirekje, egi wankshig‐hoi harnira wogarna roha hikikuruwi hiuine.

²⁹ Egi Jerixo‐eja rarnaga nige howarahau, worohaxji hironakshana.

³⁰ Egi horuxujre, wang‐hishjarningra nupiwi nagu hijejeja minaganankshana, jaja naxguinegi Jesus E howagra, uwainena, wairena: Najungijawine Hirukanara, Dawid hinigra.

³¹ Egi worohanka najwawisgirena, xabguni hirekjege, eshi shige hiraijera uwainena, wairena: Najungijawine Hirukanara Dawid hinigra.

³² Egi Jesus nashi‐hijena, egi wagigorna, egi wena: Jagu ningiunkjawi roraguwishe?

³³ Wagairena: Hirukanara, hishjasu warniwira gihashirekjege.

³⁴ Jesus najwawogijana, egi hishjasu warninera wawikhiorna egi higuana wajairena, egi hironaghirena.