Matthaiga 11 - Winnebego Bible Portions 1907

¹ Egi wauna, jaja Jesus wironag nup‐hashana warnira uwashira rashjangi, eja wakiruje rena, jhinag warnineja washa wagigusanaga egi wahokhuna.

² Egi Johnga jhiwornasse‐hojhieja nanku, jaja Kristus wore harnira naxgungi, wironag warnira nupiwi hijowaregigina.

³ Egi wagena: Hisha jikjanegi nenineshe nigeshge hijanera hisha hotuxuj‐hikjanihawishe.

⁴ Jesus horniharna egi wawagena: Johnga hogirag karawire washa jagu nanaxgu‐harajane egi hashja‐harajane.

⁵ Hishjaningra wajanagre egi mani‐rushagra maninagre, lepra rushjahirare, egi nux‐ningra warnaxgu‐hirare, d’era niamb‐hirera, egi wanajojaisgera woragphira wawihokhuinena.

⁶ Wogishawajena higu peshe inke watoigixinigi.

⁷ Egi hakarairegi, Jesus worohanka wawagajirena Johnga haehi: Mojainainja jaguisha hashjarahiwishe? Raxgeisha maintajehi haisosog‐jegishi?

⁸ Shige jaguisha hashjarahiwishe? Wang‐hisha waini shawaxji hikikax‐jegishi? Horuxujre waini shawaxji hikikaxra hung‐hojhieja nankshana,

⁹ Eshi jaguisha hashjara hiwishe, prophetra hisha? Hisgexjina hinigawina, prophet hiraijeraisha herena.

¹⁰ De‐e erena e wowagax ejakshana: Horuxujre worag harnira joweraija howareagigina, e nagu hashinira hirushja‐ningigikjanena joweraija.

¹¹ Hisgexjina hinigawina, horogregi hinug wankshighi‐inankhi John Niwawaxunga inke hisha hiraijaira jinina, eshi hisha hung‐ma wangreginagre eja horujisdijegi e hiraijera xetena.

¹² John Niwawaxunga hamb warnira eparnaga egipa hung‐ma wangregi herera hakiwarnuinena, egi wakiwarnunanka rus‐hirena homashja hiu.

¹³ Prophetra harnaj harnaga egi woehira Johnga epa prophet‐hirena.

¹⁴ Egi shuruswigishi, de‐e Elias herena, e jikjanera.

¹⁵ Hisha nuxhopox winaxgu jungi naxgu hiwiaje.

¹⁶ Eshi wankshig‐hoi degi jaguisha hikisgeharnashe? Ninkjangenig woruwieja minaganank hikisge waharna egi wakishgaj hirera wakaragigornank,

¹⁷ Egi wairena: Ningishushugwira egi inke shawashiwinina. Egi nigixag‐harnakaja egi inke raxagwini.

¹⁸ Johnga jira egi inke waruj‐nianaga inke shige warajganina egi wairena: Waxopinishishig‐hisha harnijena.

¹⁹ Egi Wankshig‐hinigra jira, warujshana egi warajgana, egi wairena: Horuxujhire, wang‐waroijxeteisha egi nishuj‐hiksi‐isha, Publikan egi washa woishana un hijakorohisha, eshi wowanaiksabra ninkjank warnira phi hiranainena.

²⁰ Egi jhinagnanka najwawisgi‐jirena, eja wore rokanaxji hiraijeraxji wagiura egi inke najgerakarateg‐hiranige esge.

²¹ Harawekjanena Xorasin, harawekjanena Bethsaida. Wowakanjank rokana wagiuinegi Tirus egi Sidon‐eja ningiuirawire shesge wagigiregi, sirejaxji haga najgerakarateg hiranana waiperisasag hornashiranaga raxojeja minag hiranana.

²² Eshi hinigawina Tirus egi Sidon‐eja herera hamb woehieja hiraijera hiroheg hawairekjanena, ne hiraijera harawekjanihawina.

²³ Egi ne Kapernaumra wangregi harnini‐hajiakarairena, pejshishig‐eja hornitunairekjanena. Wore wowakanjank ningiuinawira egi Sodom shesge gigiregi, hambde‐e hijarnagnana.

²⁴ Eshi hinigawina ma Sodomra hamb woehieja hiraijera hiroheg hawekjanena, ne hiraijera harawekjanena.

²⁵ Eja Jesus horniharna egi wena: Wainiginabshana Jaji wangregi egi mara Hirukanara, washa de‐e washinperesra egi wouphira nuxawa waragitumbra esge, egi ninkjanginigra janti waragigira.

²⁶ Hojia Jaji de‐shesge hira‐raiphinge.

²⁷ Washara harnaj hunkuna Jajiga, egi inke hisha hiperesnina Hinigra peshe herera, eshi Hianjrashana hiperessana. Inke shige hinkisha Hianjra hiperesnina, Hinigrashana, egi E higu peshe Hinigra hiperes‐hikjegi unana.

²⁸ Hiraijiwire, jarnaga warera egi wak’in skingre k’ira, egi hoxgasigi hornikunkjawina.

²⁹ Winap’i harnira ruswige hiuwine, egi woshgara hinpereswire, wankshig‐phi‐harnianaga egi najge khushi hakikarani harnige esge, egi naxirag washiniwira hoxgasigi wiragish’ekjanihawina.

³⁰ Winap’i harnira wowategenig harnaga egi wak’in harnira haharnike esge.