Markga 7 - Winnebego Bible Portions 1907

¹ Egi Pharisera Jesus eja stoirena egi wowagax‐hiperesra hota, e Jerusalemeja howajirena.

² Egi jaja wironag warnira hota waisgab rujhiregi wajairena nabra shishig wauinegi, inke nabra rushani wagairena, najwisgirena.

³ Pharisera egi judra harnaj inke waisgab ruj‐hiraninana inke jorni nab rushara rokana wauinaningi, xetera woshga warninera wawagiuine.

⁴ Egi jaja woruwieja howakiriregi, inke kikurushairanigi inke waruj‐hiraninana, egi washinjahina roha hijakshana, e wawau hirekjera, niwirajga rushara, egi wasgera, mas‐si rexra egi warujra.

⁵ Egi Pharisera egi wowagax‐hiperesra wigiwaxhirena: Jagu‐u wironag washinira xetera woshga warninera inke eowarninankshe, eshi inke nab‐rushani waisgab rujnang.

⁶ Horniharna egi wawagena: Hipokrit‐raniwira Isaias phi prophetniwina, shesge wagaxankshana: Wankshig de‐e ixu warninera hingishag‐nankshana, eshi najge warninera hari hingiuinena.

⁷ Eshi gikaraj warninera hoinige waunankshana, wogus wagigusnanke, wankshig u‐washi harnine.

⁸ Maura u‐washi harnira nigeratumb‐wianaga, egi wankshig woshga harninera sh’uharajena, rex egi wasge horushagre egi washa deshesgera roha sh’uwina.

⁹ Egi wawagena: Wogisog Maura u‐washi harnira shawajiswigaja, e woshga washiniwira warakunkjawige.

¹⁰ Mosesga wena: Karaishagre hianjraga egi hiuniraga, egi higu peshe hianjra egi hiunira washoshishig howe rogigungi, d’ehirekjena.

¹¹ Eshi washawina: Wankshigra hisha hianjra egi hiunira wagarnana Korban, wogara e wairena, jagu hophi egi hushurus winara (she‐e phi hinana).

¹² Deshegu higi hianjra egi hiunira inkaga washanisha wagiuninana.

¹³ Egi Maura hoit’era inke washinkisge rawinina, woshga hashiniwira hawau. E ne‐wash’uwina, egi washa shesgera roha sh’uwina.

¹⁴ Egi jaja wankshigra harnaj wagigogi, wawagena: Jarnaga raniwira, harnaj harnaigixguwine egi hipereswire,

¹⁵ Washanisha wankshigra jang‐hieja‐nankhi, egi wankshigeja hokewegi she‐e inke shishig hiraninana. Eshi washa jagu wankshigeja hihinabanka, washa she‐e wankshigra e shishighinana.

¹⁶ Hisha nux‐hopox winaxgu jungi, naxgu‐hiwiaje.

¹⁷ Egi jaja wankshignanka eja howakiri jhieja hoikewegi, wironag warnira washinsgerara higiwaxhirena.

¹⁸ Egi wawagena: Hishge inke washa hiraperes‐winishe? Inkiraperes‐winishe higu washa jagura hisha jangeja howahigi egi wankshigeja hokewegi inke shishighi ruxurug‐ninana.

¹⁹ Inke najge harnieja hokawaninage esge, eshi nixaija howairanana, egi jangeja horeja hihinabnana, hiwarujwiga howaragra eowaranana.

²⁰ Egi wena: Washa jagu wankshigeja haxebanka, she‐e wankshigra shishig‐hinana.

²¹ Rogeja howajiaka wankshig najgeja howajiakshana, wowewishishig haxebankshana, kikhanag‐rushera, hikikshakshara, wankshig‐d’ehira,

²² Wamanukera, washa warogigukera, wowongra, waishjankera (washa u‐unkera) hojamb‐shishigra, raxjashgunira, wauxjiwakira, wanaiwowongra,

²³ Washa shishig de‐e harnaj rogeja howaji‐nankshana, egi wankshigra shishig‐hinana.

²⁴ Egi eja nashianaga rena, egi Tirus egi Sidon hijejra howarena, egi jhi‐hisha eja hokewena egi inke hisha hiperes‐nikje wagiuna, eshi inke nuxawa ruxurugnina.

²⁵ Hinugisha, hinugnigra naxirag shishig harninena, hinugjega Jesus naxgungi hiarnaga egi si‐hieja himpshana.

²⁶ Hinugjega Hellenos hisha herena Sirophenikia eja jhina. Egi gitarna hinugra eja waxopinishishigra jangra hogiwahas‐hikjege.

²⁷ Eshi Jesus hinugjega wagena: Ninkjangnigra jorni wainaj hirekjena, inke phinigaja ninkjangnigra waisgabra wagirus‐anaga egi shung‐eja wogit’unera.

²⁸ Egi horniharna egi wagena: Hojia Hirukanara, shesgarnunige shungnagre waruj khuhainja ninkjangnigra waisgab‐hoxjug harninera rujnankshana.

²⁹ Egi Jesus hinugjega wagena: Hoit’e de‐e hawau karare, waxopinishishigra hihinabshana hinugraga eja.

³⁰ Egi jaja eojhieja gigi, waxopinishishigra hihinabra hiperessana, egi hinugnigra homigeja mingankshana.

³¹ Egi shige Tirus egi Sidon hijej‐eja nigeowakerena, Galilea teja gina, jhinag kerepanaisha hijej horogra howaguna.

³² Egi hisha nuxra‐ninkhi hagarnihajirena egi hit’et’era wogijexina, egi gitairena nabra hik’uanaga hikiokjege.

³³ Egi worohanka eja injab‐kerena, egi nab‐waisara nux‐hopox harnieja hokerena, egi shorna, egi resira higikiorna.

³⁴ Egi wangregi horuxujshana, nihasigina, egi wena: Hephata, gihasra e wena.

³⁵ Egi higuana nux‐hopox warnira gihas‐hirena, egi resihikara shgarairena, egi hit’et’era waraphina.

³⁶ Egi rogixina inke hisha hogirag hiranikjege, eshi hiraijera warogixigi shige eja hiraijera rokana horaghirena.

³⁷ Egi khorera rokanaxji‐hirena, wairena: Washara harnaj phihigaja. Nux‐ningra warnaxgu‐wahianaga egi iningra hit’et’e wahigaja.