Markga 4 - Winnebego Bible Portions 1907

¹ Egi shige teja hijejeja washa wagigus‐shana, egi eja hornihexetexji storna, esge waj‐hisha ejahokewena, egi tejainja minagshana, egi worohanka harnaj teja hijej moroija unankshana.

² Egi washara rohaxji wagigus‐shana washinsgera hiu, egi wogus harnieja wawagena:

³ Harnaxguwine, horuxujwire, max‐hoshuisha maxhoshurena.

⁴ Egi herena, jaja woshugi, hota nagueja kirinak‐hirena, egi wanig wangregi‐herera hajiranaga egi jeb‐wahirena.

⁵ Egi hota inijaija kirinak‐hirena, eja inke makax junina, egi higuana haxeb‐hirena, inke makaxra shewenige esge.

⁶ Egi jaja wira hankshi‐jinakhi daxuirena, egi inke reju ju‐ranige esge hatatek‐hirena.

⁷ Egi hota napahi horogeja kirinank‐hirena egi napahira haxeb‐hirena egi warnassag‐hirena egi inke waisgab haminag‐hiranina.

⁸ Egi hota makax hophieja kirinank‐hirena, egi waisgab haminag‐hirena, e haxeb‐hiregi egi rohamena, egi hota kerepana‐dani haminag‐hirena egi hota kerepana‐hakewe egi hota hogihisha.

⁹ Egi wawagena: Hisha nuxhopox winaxgu jungi, naxguhiwiaje.

¹⁰ Egi jaja inekigi, jarnaga hijauankhi nuphashanara wakishu wahsa hisgerara higiwaxhirena.

¹¹ Egi wawagena: Hornikunawina washa nuxawara hiraperes‐jawina Maura hungma harnieja, eshi jangeja nangre washan de‐e harnaj washinsgera wigiuinena.

¹² Wajara, wajairekjege egi inke higiranikjanena, egi warnaxgura naxguinekjanena egi inke hiperes‐hiranikjanena, e inkehahi wakshairanikjege egi washa woishana warninera wagit’unairekjanege.

¹³ Egi wawagena: Washinsgera de‐e inke hirapereswinishe, jasge rawianaga washinsgerara harnaj wiraperesjanihawishe?

¹⁴ Max‐hoshura hoit’era hoshurna.

¹⁵ Egi de‐e herenankshana nagu‐ejanankhi, eja hoit’era hoshurena, jaja naxguinegi, Satanra higuana jianaga egi hoit’era wagirusjena najge warnineja woshuirera.

¹⁶ Egi de‐e hererena e ininjaija woshuirera e jaja hoit’era naxguinega higuana wogishawa rus‐hirena.

¹⁷ Egi inke reju juiranina, esge jowexjinig u hahiranaga, hageja jaja hawera egi higishana‐naine jigi hoit’era hawau higuana watoxinena.

¹⁸ Egi de‐e hererena, e napahi rogeja woshuhirera, shesgera hoitera naxguinega,

¹⁹ Egi ma‐tegi najge wojianaga egi hitajera waishjankejege egi washinjahi rogu hijokawairena, hoit’era nihaijebhinana egi inke washa haminagninana.

²⁰ Egi de‐e hererena makax hophieja woshu‐hirera, shesgera hoit’era naxguinena egi rus‐hirena egi washa haminag‐hirena, hota kerepana‐dani, hota kerepana‐hakewe egi hota hogihisha haminag‐hirena.

²¹ Egi wawagena: Jasge hiratasha‐kerehira hisha heregi wigus hokiphi khuhainja taekerenashe? Shige homig khuhainja kerenashe? Jasge inke hiratashakerehi hornashi‐eja kereninashe?

²² Inke washanisha nuxawanina e inke janti‐hiranikjanegi, egi shige inke washanisha harnuxawa‐ninana eshi harnaj hornaekjanena.

²³ Higu peshe nuxhopox winaxgu jungi, naxgu‐hiwiaje.

²⁴ Egi wawagena: Hirakarauwine jagu nanaxguwingi, wigus jagura hisha wigus‐hishuwingi, wigus e hinigiuinekjanihawina, egi jarnaga nanaxguwine, hiraijera hornikuinekjanihawina.

²⁵ Higu peshe washanijegi e hisge hokuinekjanena, egi higu peshe inke washa junijegi e girus‐hirekjanena e washa harnijegi.

²⁶ Egi wena: Maura hungma harnira shesgagshana, wangra hisha sura mainja woshuje hikisgena.

²⁷ Egi nanaga egi kikawa‐anje haheregi egi haxeb‐hiranaga egi xetenankshana, jasge waunagra inke hiperesnina.

²⁸ Egi managre e kiku washara haxebnankshana, jorni xawi haxebnankshana, hageja waisgab nassura jinaganaukshana egi hageja waisgab nassura waisgabra hoixjinankshana.

²⁹ Eshi jaja waisgabra rojuinege, higuana waisgab‐higijgisra regiginana maxhoikisherera herege esge.

³⁰ Egi wena: Jaguisha Maura hungma harnira hikisgeshe hiawishe, egi shige washinsgera jaguisha hikisge hihikjanihawishe?

³¹ Mustard su‐isha hikisgena, e jaja mainja hoshuiregi, managre eegi washa surakhi xunuxjinigra herena.

³² Eshi jaja hoshuiregi, haxebgi egi hiraijera xete jijena xawi‐abxetera harnaj horujis‐hirena, egi na‐akarajge xetera haxebhirena, e wanig wangregi herera hoirahasi khuhainja jhirekjege.

³³ Egi hoit’e wawirogiragshana washinsgera shesgera roha hiu, jasge naxgu ruxurughiregi.

³⁴ Eshi washinsgera rokani inke wawokit’arnina, egi jaja inekhi hiregi, wironag warnira washara harnaj wijanti wogiragshana.

³⁵ Egi hambeja jaja hoxjarna hakirigi, wawagena: Teageja howainekjawina.

³⁶ Egi jaja worohanka kere‐wagigiregi, Jesus rus‐hirena waj‐hounagraeja. Egi eja shige waj xununig hijane wakishu una.

³⁷ Egi maintajehira rokana hakirina, egi jashjana wajrogeja howairena, wajra nira hoixjina.

³⁸ Egi Jesus waj hageja wipeianaga nanakshana. Egi ruxink‐hirena egi wagaireshguni: Hirukanara, inke najge woirajiwinishe jegjanihawina?

³⁹ Egi nashina egi maintajehira najisgina egi tejana wagena: Xapgunine, gissewere. Egi maintajehira rushjana, egi hatagra rokanana.

⁴⁰ Egi wawagena: Jagu‐u nanaxi‐sharawishe? Jasgegaja inke harnaxgu hashiniwinishe?

⁴¹ Egi naxirera rokana‐hirena egi wakigairena: De‐e wang jaguisha hereshe, maintajehira hereanaga egi tejanra harnaxguine.