Markga 2 - Winnebego Bible Portions 1907

¹ Egi hamb jarnahagiregi Kapernaum‐eja shige hokewena, egi jhiejarnak aire naxguinegi.

² Egi higuana roha sto‐khinena, rokanaxjinge jhira hakhini‐khinena, jhirobra reshge hakhini‐khinena, egi hoit’era wawihokhuna.

³ Egi hirajirena, hisha howasha ro‐t’eg ungi e jopihi harnijiwina.

⁴ Egi jaja inke hiraji ruxurug‐hiranigi worohanka hawau, hajinjanankhi eja jhihagra ruhas‐hirena, egi jaja rusheregi homigra (wagina hiroishge) harnukanag gigirena, howasha ro‐t’eganka homigra.

⁵ Jaja Jesus harnaxgu warninera wagijagi, howasha ro‐t’eganka wagena: Hinighaxji washa woishana washinira wanigit’unairena.

⁶ Eshi wowagax‐hiperesra hota hijaminag‐anankshana, egi najge warnineja wewinankshana:

⁷ Jagu‐ungaja wang de‐e (Maura) raxjashguni hit’eshe? Peshe washa woishana wagit’une ruxurugshe Maura eshana?

⁸ Egi higuana jaja Jesus naxirag harnira hikuanaga hiperesgi deshesge wowewira hiranankhi wawagena: Najge washiniwieja washa de‐e jagu hirarashanakshe?

⁹ Hajanjega era wowategenigshe, wang howasha rot’eganaka wagena, washa woishana washinira warnigit’untena era, nigeshge nashianaga homigra kurusanaga egi manine era?

¹⁰ Eshi hiraperes‐kjanihawina Wankshig‐hinigra homashja harnijena ma‐egi washa woishana wagit’une (howasha ro‐t’eganka wagena),

¹¹ Hinigena, kikawa‐ane, egi homig hashinira kurusanaga, egi jhi‐horajhieja howakarare.

¹² Egi higuana kikawa‐ana homigra rusanaga egi jowehireja nigeowakerena. Egi harnaj khorairena, egi Maura rajank‐hirena, wairena: Washa de‐shesge inkaga hajawinigaja.

¹³ Egi shige teja hijejra howarena, egi worohanka harnaj hirahirena, egi washa wagigus‐shana.

¹⁴ Egi e‐hahiowegaja, Lewi hajarna, Alpheus hinigra, woirowe horuseja minaganankshana, egi wagena: Hiroinagre. Egi nashianaga egi hironagshana.

¹⁵ Egi herena e hojhieja Jesus worujeja minagshana, publikanra roha egi washa woishana ura hishge Jesus hakishu minagnankshana egi wironag warnira, roha hijake, egi hironaghirena.

¹⁶ Egi jaja wowagax‐hiperesra egi Pharisera hajairegi, publikanra egi washa woishana ura waruj wakishu unankhi, wironag warnira wawagairena: Jasgegaja waruj egi rajga publikanra egi washa woishana ura wakishu unakshe?

¹⁷ Jaja Jesus naxgungi, wawagena: Jarnaga wanaishguni‐ankhi inke makhani hiuninankshana, eshi jarnaga howashakhi. Inke phira wagigo hajinina, eshi washa woishana ura najgerawakarateg hirekjege.

¹⁸ Egi Johnga wironag warnira egi Pharisera warninera hantaginaj‐hireshununa, egi hajiranaga egi wagairena: Jagu‐u Johnga wironag warnira egi Pharisera warninera hantaginaj‐hire, eshi wironag washinira inke hantaginajhirani?

¹⁹ Egi Jesus wawagena: Jasge‐hiranaga khikanaghoueja hahiregi hantaginaj hiranashe, jajaixji hinug‐khanaikjanega wakishu unjegi? Jajaixji hinug‐khanaikjanega wakishu unankhi, inke hantaginaj ruxurug hiraninana.

²⁰ Eshi hambra hajiregi, eja hinug‐khanaikjanega wagirus‐hirekjanena, egi hambanaka eja hantaginaj‐hirekjanena.

²¹ Inke wankshigra hisha wonashi jegeja nige rusanaga wonashi sh’ageja hirarujag‐ninana, jegnanka rukixanaga shaganaka rugasnage esge, egi hopoxra hiraijera hinana.

²² Egi inke hisha nishuj‐jeg hiregi pex‐shageja hoshuinana, shesge higi nishuj‐jegjega pexra xuxre‐hinana egi nishujra xunarnana, egi pexjega maisinjnana. Eshi nishuj jegra pex jegeja woshuiranana.

²³ Egi wauna waisgab maxra hahiowena Sabath hambregi. Egi harahairau wironag warnira waisgab russojhajiarairena.

²⁴ Egi Pharisera Jesus wagairena: Horuxujre, jagu ungaja Sabath hambregi wauineshe e woehira roxiagra.

²⁵ Egi wawagena: Jasge inkaga wowagaxra hashjawinishe Dawidga jagu una jaja warogungi egi dokewehigi egi jarnaga hakishu uankhi?

²⁶ Jasge Maura hojhieja hokawarnaga higi, Abiathar nabhoruxaj hirukana hungra hamb harnieja, egi waisgabwahara rujshana, e woehieja rujra roxira, eshi nabhoruxaj hirukanarashana, egi wakishu unjega hishge wawogarna?

²⁷ Egi wawagena: Sabathra wankshigra wawagiuna, egi inke wankshigra Sabathra ewarninina.

²⁸ Esge Wankshig‐hinigra Sabathra hishge hirukanana.