Markga 13 - Winnebego Bible Portions 1907

¹ Egi Jesus wohokhu‐hojhixeteja hihinab‐gaja, wironag warnira hisha wagena: Hirukanara, horuxujre ini jagurisha egi jhi jagu de‐e hireshe.

² Egi Jesus horniharna wagena: Jhi‐xete de‐e hashjashe? inke inira hisha hirajakikanag harnagnikjanena inke rushe phininagre.

³ Egi Oliw‐xe hihageja minaganank’u wohokhu‐hojhixetera agakinag, Peter egi Jakob egi John egi Andreas inekhi higiwaxhirena,

⁴ Hungiragwire washa de‐e jajanagi herekjanegi? Egi jagu woijantisha herekjaneshe washa de‐e jajanagi harnaj exji herekjanegi.

⁵ Egi Jesus wawornigiharna, wajirena: Hirakarauwiaje ningete hisha ningishjanke hirawiege.

⁶ Roha rash harnira harnijikjanena, wairekjanena: Kristus newinena, egi roha gishjanke hirekjanena.

⁷ Egi jaja kissaire warnanaxguwigi egi kissa horag hirekjanena, inke naxirawinianje, washa de‐e harnaj jasgegi herekjanena, eshi hoshejara kheni hereni waunkjanena.

⁸ Wankshig hokirajra hakiki‐rairekjanena, egi hungmara hakiki‐rairekjanena, egi mara hixgakjanena nigeshana, egi dokewehi hirekjanena egi hawera. Washa de‐e wonajgetegra hojikerera herekjanena.

⁹ Eshi hirakara‐uwianje, woehieja harnini‐hahirekjanihawina egi wohokhu‐hojhieja horniji‐hirekjanihawina. Egi washinukana jowehireja harnini‐hahirekjanihawina egi hung‐eja, rash harnira hawau, e wihohi hakikira kik’uinekjanena.

¹⁰ Egi jorni worag‐phira jasgegi wankshig hokirajra harnaj wihokhuine‐kjanena.

¹¹ Eshi jaja harnini‐harairawigi egi nirushjare‐hirawigi, jagu hishekjawira inke jorni najge wojiwinianje, egi inke jorni wewi‐winianje, eshi higu jagurisha howagixeja hornikuinawigi she‐e hishekjawina. Inke ne hirat’at’awininana, eshi Naxirag Wakanjangra.

¹² Egi kikhinubra khinubra himakarag‐anaga d’ehirehikjanena, egi hianj‐hirera hinigra himakarai‐kjanena egi ninkjangnigra shag‐wahirera wakirairekjanena egi d’ehire wahirekjanena.

¹³ Egi harnaj hornishig‐hirekjanihawina rash harnira hawau, egi higu peshe hoshejainja hipa hiwanuxshagi hiungi e niaimb‐kjanena.

¹⁴ Eshi jaja homahujairera noxgaresge harnira inke hornashi phinieja nashinjau hashjakjanihawina e Daniel prophetra horagshana. (Higu peshe wowagax de‐e hajagi naxgunkjena), jarnaga Judea mowagaxeja nankhi xeja hogias hirekjena.

¹⁵ Peshe jhi‐hihageja unjegi inke damb‐anaga jhieja ginikjena, egi shige inke jhieja hoikawarnaga washara hisha rusnikjena.

¹⁶ Egi peshe maxeja unjegi inke kirianaga wainira kurusnikjena.

¹⁷ Najogijaisge hirekjanena waujganag‐anankhi egi jarnaga hambananka eja wasi wagiginankhi.

¹⁸ Egi gikarajwige hogias hashiniwira inke maninegi herenikjena.

¹⁹ Hambananka eja hawairekjanena jeg wogusra e Maura gusgi epa howahuhigi inkaga shesgarnina egipa egi shige inkaga shesgarnikjanena.

²⁰ Egi hambananka inke shib‐wahiranigi inke wankshigra hisha niamb‐nikjanena, eshi gijainera hawau hambananka shib‐wagigina.

²¹ Shejanegi hisha wanigekjanihawina, horuxujwire Kristus egi jena, egi shige horuxujwire gaja jena, inke harnaxguwiniaje,

²² Krist woishjankera egi prophet woishjankera nashinekjanena, egi woijanti egi washa wowakanjank jantihirekjanena harnaj manuni wahirekjanena, gijainera reshge hirassa ruxurug hiregi.

²³ Eshi hirakara‐uwianje, horuxujwire washara harnaj jorni hornigitagwina.

²⁴ Egi hambananka‐eja hawairega hageja, hambwira hokawais‐janena egi hahewira inke hohamb‐hinikjanena.

²⁵ Egi wiragoshge wangregi‐nagra shibrairekjanena, egi homashja wangregi herera hixgainekjanena.

²⁶ Egi shejanagi Wankshig‐hinigra maxiwieja huhe hajairekjanena homashja egi gloria rokana harni.

²⁷ Egi shejanagi waxopiniwarajire warnira hu‐wagigikjanena, egi sto‐wahirekjanena gijaine warnira, hohuhira hijopihike howe‐warniha‐kirirekjanena, ma‐hoshejainja egi wangregi hoshejainja howe‐warniha‐kirirekjanena.

²⁸ Washa hisgera Fig‐nara hipereswire, jaja akarajgera naroni hoshuiregi egi abra haxeb‐hiranana, hirapereswinana dogra hiwusunsh hotara.

²⁹ Hishge shesgawiaje, jaja washa de‐e here hashjawigi, hiperes‐wiaje hiwusunsh hotara, jhirobeja jena.

³⁰ Hisgexjina hinigawina, wankshig‐hoi de‐e inke shejanikjanena, washa de‐e harnaj exji herekjanena epa.

³¹ Maxira egi mara shejainekjanena eshi hoit’e harnira inke shejanikjanena.

³² Eshi hamb‐she‐e egi howagix she‐e inkisha hiperesnikjanena, inka‐a inke waxopiniwarajire wangregi herera, egi shige inke Hinig‐hirera, eshi Hianj‐hirerashana.

³³ Hirakara‐uwine, hirakarawige egi gikarajwire, inke hiraperesni harajena jajanegi herekjanegi.

³⁴ Wankshig‐hinigra wangisha ma‐harixji hikiwarare hikisgena, e jhira karat’unarena, egi ware warnira hirukana wagigina, egi worera hishashana wogarna, egi jhirobhirakarara wirakarashina.

³⁵ Esge hirakara‐uwine, inke hiraperesni harajawige, jajanagi jhi‐hirukanara kirikjanegi, hoxjarnanegi, nigeshge hahekissagki, nigeshge bagawaxgewangra xag‐jau, nigeshge haininegi.

³⁶ Nigete hawushiri kiriege, rana‐hashanak’u hinie’kjanihawina.

³⁷ Egi jagu hinigawire harnaj warnigawina, hirakara‐uwine.