Markga 12 - Winnebego Bible Portions 1907

¹ Egi washa hisgera wawirokit’ajirena. Wankshig hisha hapsinsh max‐hisha hoshurna, egi hogigix hawajagshana, egi mara k’arnaga hapsinsh howaxgink hisha hijakanagshana, egi jhi‐hankshi hisha una, egi max‐hirakaraija hornaj‐wagigina, egi ma‐harixji howarena.

² Egi jaja hasra duj‐hiregi ware harnira max‐hirakarananka eja howaregigina, max‐hirakarananka eja hasra hisge rusjege habsinsh‐max‐eja.

³ Egi harukos‐hirena egi hojinena egi rokani keregigirena.

⁴ Egi shige ware hijaneisha wirahigigina. Egi she‐e inihirojinena egi nassueja gikunug‐hirena egi washangishga‐shgaxji hire keregigirena.

⁵ Egi shige hijaneisha wirahigigina. Egi she‐e d’ehirena egi hijanera roha, hota wojinena, egi hota d’ewahirena.

⁶ Egi hisha hinig‐higi, wogixetexjingi hishge hirowageni wirahigigina, wena: Hinighara gish’aghirekjanegaja.

⁷ Eshi max‐hirakarananka wakigairena: De‐e hoishjara harnira herena, huwire, d’ehikjawina, egi hoishjara neharnikjawina.

⁸ Egi harukos‐hirena, egi d’ehirena egi hapsinsh‐max jangeja hot’unairena.

⁹ Hapsinsh‐max hirukanara jagu unkjaneshe? Ji‐arnaga egi hapsinsh‐max hirakarara maisinsh wahikjanena, egi hapsinsh‐maxra hijaneja wogakjanena.

¹⁰ Jasge wowagax de‐e inke hashjawineshe: Inisha, e jhiura nigiot’unairegi e ini haminag hopassera hahi‐herenana.

¹¹ Maura E shesge hina, egi hajara khorewahina.

¹² Egi harukos‐nainena, eshi wankshigra wanakawairena, washinsgera wirokit’arnaka e wakira wera hipereshirege. Egi t’une egi nigeowakarairena.

¹³ Egi Judra wauinena Pharisera hota egi Herodes warnira hota hirahi wagigirena, hoit’e harnieja hokit’une hirekjege.

¹⁴ Egi jaja hahiregi wagairena: Hirukanara, hinipereswina wogisog ranira egi inkisha washa hiranash’inina, egi jarnagagre inkisha hiranigijeranina, egi Maura nagu harnira wogisog waragigus‐rajera, Kaiser woirowera hok’ura phinashe, nigeshge inke shesgarnishe?

¹⁵ Jasge wak’unkjawishe nigeshge inke wak’unikjawishe? Eshi Jesus hipokrit warninera wawiperessana, wawagena: Jagu‐u hinaishjawishe? Denaria hisha harniguwiwire, hajakjena.

¹⁶ Egi hisha hagarnihahirena. Egi wawagena: Hokiwagax de‐e peshe hereshe, egi ihageja wagaxnanka? Egi wagairena: Kaiser harnina.

¹⁷ Egi Jesus hornihashguni, wawagena: Kaiser hokuwine, washa jagu Kaiser harnigi, egi Maura hokuwine washa jagu Maura harnigi. Egi xixhirena.

¹⁸ Egi Sadusera hirahirena, e inke hakiha wankshig‐hoi junishe airena, egi higiwaxhirena, wairena:

¹⁹ Hirukanara, Mosesga hingiwagaxwina, wangra hisha khinubgi d’egi hijawina d’unaregi egi inke ninkjang harninigi, khinubra hijawira gikanagnana egi khinubra e ninkjang gishunana.

²⁰ Egi wang‐kikinubra shagowingi, egi xetera hinugkhanagshana egi d’egi inke ninkjang harninina.

²¹ Egi hinubeja herera khanagshana egi d’ena egi shige inke ninkjang harninina, egi hitanira hishge shesgena.

²² Egi shagowihajega harnaj khanag‐hirena egi inke ninkjang harniranina. Egi harnaj d’airegi hinugjega hishge d’ena.

²³ Egi hakiha wankshig‐hoieja, jaja kikawa‐ainegi, hajanga e hijawi‐hikjanihawishe, shagowihajega khanag‐hirege.

²⁴ Egi Jesus hornihashguni, wawagena: Inke wowagaxra hiraperes‐winige egi shige Maura homashja harnira, esge sharagashwina.

²⁵ Jaja d’arnagre eja kikawa‐ahiregi inke khikanaghiranikjanena egi inke khikanag wagigiranikjanena, eshi waxopiniwarajirera wangreginagre wikisgairekjanena.

²⁶ Egi d’erawawagairena, kikawa‐ahirekjanena, inke Mosesga wowagax harnira hashjawinishe, jasgehianaga xatabeja Maura hokit’egi, wena: Abraham Mau harnira newinena, egi Isaak Mau harnira newinena egi Jakob Mau harnira newinena?

²⁷ Maura inke d’arnankhi Mau harniranina, eshi niambnankhi harninena. Esge mashja sharagashwina.

²⁸ Egi wowagax‐hiperesra hisha jina egi kikitagnanki warnaxguna, egi wawornigihagi phi wawagera hajage, wigiwaxshana: Hajanjega uwashi xetera hereshe?

²⁹ Egi Jesus hornigiharna: Uwashi xetera de‐erena: Harnaxgune Israelra, Hirukanara Maura harniwira, Hirukanara hishankirana.

³⁰ Egi Hirukanara Mau hashinira najge hashinira harnaj hiwoxetehire, egi naxirag hashinira harnaj, egi warnai hashinira harnaj, egi homashja hashinira harnaj, de‐e uwashi xetera herena.

³¹ Egi hinubra higu hikisgena: Hirakishu‐wusunshra wogixeteaje hikiisgo khianje. Uwashi hijanera hinkisha hiraijera xetearnaga de‐e worujis‐hiranina.

³² Egi wowagax‐hiperesra wagena: Phina, wagaxajawagigira, wogisogra e waragena, Maura hishankiranakshana, egi inke hijane juni, eshana herena.

³³ Egi najgera harnaj hiwoxetehira egi wornaxgura harnaj, egi naxiragra harnaj, egi homashjara harnaj, egi hikiwusunshra woxetehigi hikisge khingi washa de‐e hiraijerana nab‐hiruxaj daxuhira egi nab‐hiruxajra harnajra worujisshana.

³⁴ Egi jaja Jesus hajagi hornihara wanaiksab wegi, wagena: Maura hung‐maharnira inke hari rajanina. Egi inkisha hageja wiwaxnina, nakawairege.

³⁵ Egi Jesus horniharna egi wena, wohokhu‐hojhixeteja washa wagigus‐janegi: Wowagax‐hiperesra jasge wagaireshe, Kristus Dawid hinigra hereshe airera?

³⁶ Dawidga exji wena: Naxirag wakanjank hiu: Hirukanara, Hirukana harnira wena, hoishoro haregi minagre, hornishig‐hirera si‐hakere warnigi‐ungi epa.

³⁷ Dawidga exji Hirukanara higena, egi jasgehianaga hinighishe? Egi wankshig hoinigera naxguinegi giphinena.

³⁸ Egi wogus harnieja wawagena: Wowagax‐hiperesra hinakewe wakiwianje, e waini serej hornashina giphinena egi hostoeja hikaragirera giphinena.

³⁹ Egi wohokhu‐hojhieja waminag joweja here haminagra giphinankshana. Egi worujeja waminag hohankshi haminagra giphinankshana.

⁴⁰ E hikhanagit’era wojhirera jeb‐wahinankshana, egi Maura gikaraj serej unkhi‐nankshana. Esge de‐e hiraijera hawera rokana hirekjanena.

⁴¹ Egi Jesus shura‐hoshura ag‐akinag minaganakshana, egi wajanakshana wankshigra shura‐hoshueja shura hoshunankhi, egi roha hitajera roha hijoshunankshana.

⁴² Egi hikanagit’e wanajojaisgeisha jina, egi Lepta nupiwi hijoshurna (shurashuj kerepananup sajahashana wagiuna).

⁴³ Egi hironaghirera wakaragigorna, egi wawagena: Hisgexjina hinigawina, hikanagit’e wanajojaisge de‐e hiraijera hijoshurna, jarnaga shura‐hoshueja shura hoshuirera, harnaj horujis‐hirena.

⁴⁴ Hijanera harnaj hakininera hijoshu‐nankshana, eshi hinugjane warugesjena jarnaga harnira harnaj hijoshurna, jarnaga washino‐khukjanera harnaj.