Markga 10 - Winnebego Bible Portions 1907

¹ Egi jaja nashingi egi Judea mowagaxra hiwusunsh hina Jordan ageja. Egi shige wankshigra hirahirena, egi houra shegu hishunuge, washa wagigus‐shana.

² Egi Pharisera hirahirena, egi higiwaxhirena: Jasge woehieja roxiagshe wangra hisha hijawina karat’unera. Hiunja wairena.

³ Egi horniharna egi wawagena: Mosesga jagu u‐nishiwishe?

⁴ Egi wairena: Mosesga kit’une wawagax uwagigina egi t’unekjege.

⁵ Egi Jesus horniharna egi wawagena: Najge‐shja washiniwira e hawau u‐washi de‐e nigiwagaxwina,

⁶ Eshi wogus jeg hojikere‐hiejareja Maura wangra egi hinugra wagus‐shana.

⁷ Esge wangra hianjra egi hiunira wat’unarnana egi hijawina harusherejnana.

⁸ Egi nupiwi she‐e rora hishankira hirekjanena, esge epa inke nupiwini‐kjanihawina eshi rora hishankira hirekjanena.

⁹ Esge Maura jagu hakishjeghira inke hisha kiruje wahininana.

¹⁰ Egi jhieja wironag warnira shige washa de‐e higiwaxhirena.

¹¹ Egi wawagena: Higu peshe hijawina karat’unarnaga egi hijahira hisha kanakhi, hijawira hakarakira waunana kikanagra rushe.

¹² Egi hinugra hisha hikanara karat’unarnaga egi hijahina hisha horokhi kikanagra rushenana.

¹³ Egi ninkjang xununigra wagarni hajirena, wawikiokjege, egi wironag warnira naj‐wawisgirena.

¹⁴ Eshi jaja Jesus hajagi mashja inke giphinina, egi wawagena: Ninkjang xununigra hiraji waigigiwire, egi inke warogixiwinine shesgera Mau hungma harnira harninena.

¹⁵ Hisgexjina hinigawina, higu peshe Maura hungma harnira inke rusnianaga ninkjang xununig hikisge khinigi, inke hija hokawarnikjanena.

¹⁶ Egi waruana wawiki‐oarnaga egi washophi howe warogiguna.

¹⁷ Egi jaja nagueja rahau, hisha nang‐hajina, egi jowehieja huporo‐himinag jinakshana egi gitarna: Hirukana phina, jagu haungi wankshig‐hoi hisgejara harninashe?

¹⁸ Egi Jesus wagena: Jagu ungaja phi hinageshe? Hinkisha phinina eshi Mau‐rashana.

¹⁹ Maura hoit’e kerapanaisha harnira hiraperes‐rajena: Inke kikanag‐rushe nianje, inke wat’ehinianje, inke wamanunianje, inke washa retunk arnianje, inke waishjanke‐nianje, hianjraga egi hiuninaga wakaraishagaje.

²⁰ Egi horniharna egi Jesus wagena: Hirukanara, washa de‐e harnaj hixununigreja phi hajina.

²¹ Egi Jesus horuxujshana egi wogixetena egi wagena: Washa hisha hininujis‐rajena, karanaga egi jagu hashinigi wawikuru‐winge, egi wanajojaisgeja wawogaje, egi wangregi washa jexi hashinikjanena, egi jiarnaga, egi nanamihera rusanaga egi hiroinagaja.

²² Egi she‐shesge eegi, najgerategshana, egi najgerateg nigehowakerena, washa jura rokanage esge.

²³ Egi Jesus hogigix horuxujshana, egi wironag warnira wawagena: Hisgexji hitajenagre wogijexi hiregaja Maura hungma harnieja hokewera.

²⁴ Egi wironagra hoit’e de‐e gixixhirena. Eshi Jesus shige horniharna egi wawagena: Ninkjangnig wira, hisgexji wogijexinankshana Maura hungma harnieja hokewera jarnaga washintaje hikhieja woinashira kerenankhi.

²⁵ Wanoijge huxashogra hisha wiruxug hopoxeja hokewera e wogiwategnana egi wang hitajera Maura hungma harnieja hokewera e hiraijera gijexinankshana.

²⁶ Egi mashja khorairena, wakigairena: Peshe niambikjeshe?

²⁷ Egi Jesus waworuxujanaga wena: Wankshig homashja harnine hiura inke ruxurug phinina, eshi Maura inke washanisha gijexinina.

²⁸ Egi Peter Jesus wagena: Horuxujre washara harnaj wat’untawianaga egi hironinagwina.

²⁹ Jesus horniharna egi wena: Hisgexjina hinigawina, higu peshe jhira karat’unegi, egi shige wakhinubra egi shige hinugwajabra egi shige hianjra egi shige hiunira egi shige hijawira egi shige ninkjangnigra egi mara ne hawau, egi worag‐phira hawau waungi,

³⁰ Hogihisha hawinj wirogishu ma‐egi rus‐hirekjanena jhira egi wakhinubra, hinugwajabra egi hiunira egi ninkjangnigra egi mara egi higishanahirera hirassakjanena, egi ma‐joweregi herera jigi wankshig‐hoi hisgeja unkjanena.

³¹ Eshi roha jornira hereranihegi hahi hirowagnira hererekjanena, egi hirowagni hiranihegi hahi jornira hirerekjanena.

³² Egi Jerusalemra howarahairena, egi Jesus joweja uankshana, egi khorairena egi hironag‐nangnunige naxiranankshana. Egi shige nuphashanara warussana egi wawogirag‐jirena jagushana howekjanegi.

³³ Horuxujwire, Jerusalemra howarahawina, egi Wankshig‐hinigra rushjare‐hirekjanena nabhoruxaj‐hirukana hungeja egi wowagax‐hiperes‐eja, egi hot’era horaghirekjanena, egi hirarujeja herera wagirushja rehirekjanena.

³⁴ Egi igixja hirekjanena, egi washa pahi higipsinsh hirekjanena, egi hashoirekjanena egi d’ehirekjanena, egi hamb‐hidanihainja kikawa‐ankjanena.

³⁵ Egi Sebedai hinigwahira Jakob egi Johnga hakikishu Jesus hirajirena wairena: Hirukanara, jaguisha roaguwira naixjina hinagish’uwisheshi.

³⁶ Egi wawagena: Jaguisha ningiuwigi raipiwinashe?

³⁷ Wagairena: Hisha hoishororaija mianag‐wianaga egi hijanera hoirajge‐raija minag hunak uwigi glori hashinieja.

³⁸ Eshi Jesus wawagena: Jagu ratawire inke hiperes washawinina. Niwirajgaisha hoshu tajgankjanera rajga shuruxurugwishe? Egi ni‐hawaxuine shuruxurugwishe ni‐hawaxu hingiuinekjanera?

³⁹ Egi wagairena: Duxurugwinana. Egi Jesus wawagena: Niwirajga tajgankjanera sharajgankjanihawina egi ni‐harniwaxu‐hirekjanihawina ni‐hiwaxuhirekjanera hiu.

⁴⁰ Eshi nab‐hoishorohaija egi hoirajgehaija minagra inke ne wogara winenina, eshi wawok’uinanana e hirushjawagigigi.

⁴¹ Egi jaja kerepanaisha‐harnanka washa de‐e naxguinegi Jakobga egi Johnga wawowa‐sherexji‐hirena.

⁴² Eshi Jesus wawagigorna egi wawagena: Hirapereswigaja hirarujeja herera hung harninera wawirakaranagra egi jarnaga xeteakhi homashjara wagi‐waharnankshana.

⁴³ Eshi inke she‐nisgarnikjawina horograwiregi, eshi higu peshe horograwiregi xetekjegi, e ware hashinikjanihawina.

⁴⁴ Egi higu peshe hung‐ikjegi e warnihi harnaj harninekjena.

⁴⁵ Egi Wankshig‐hinigra una shesge E inke wagirairekje waunjinina, eshi wawagirekje, egi wankshig‐hoi harnira wogarna roha hikikuruwi hiuine.

⁴⁶ Egi Jerixo‐eja hahirena. Egi jaja Jerixo‐eja hihinabhiregi hironag warnira wakarakishu egi wankshigra worohaxji, egi Timaeus hinigra Bartimaeus hishjaraning nagu‐hoxete hijejeja minag‐nankshana jiokini.

⁴⁷ Egi jaja Jesus Nasaretheja herera wauankhi naxgungi uwanjirena egi wena: Jesus ne Dawid hinigra ninena najungijane.

⁴⁸ Egi roha rogixirena xapgunikjege. Eshi e hiraijera mashja uwana: Ne Dawid hinigra ninena najungijane.

⁴⁹ Egi Jesus nashina, egi gigo‐wagigina, egi hishjaningnaka gigoirena, wagairena: Rashgunige, nashine, E ningigorna.

⁵⁰ Egi waini earnira nige karakanag‐harnaga, nashina egi Jesus hirahina.

⁵¹ Egi Jesus horniharna egi wagena: Jagu ningiunkje roragushe? Wang hishjarning‐jega wagena: Hirukanara waja‐hingigire.

⁵² Egi Jesus wagena: Karare, harnaxgu hashinira rushjanina. Egi higuana wajarna egi Jesus hironagshana.