Lukga 8 - Winnebego Bible Portions 1907

¹ Egi hageja herena, Jesus jhinagra harnaj wouna egi jhinag xununigra wahokhu egi worag phira Maura hungma harnira wogirag. Egi nup‐hashanara wakishu wauna.

² Egi hinugra hisge, rushjawahira naxirag shishigra egi howasha‐s’i‐ura, Maria Magdalena higairena waxopinishishigra shagowi eja wahas‐hirena.

³ Egi Joanna Xusa hijawina, Herodes Xusa e jhi‐hirakara harnina, egi Susanna, egi hijanera roha, e washara gijiranakshana.

⁴ Egi jaja wankshigra rohaxji stogi, egi jhinaganaka harnaj hisgeshana hirajirena, washa hisgera wawirokit’ena.

⁵ Max hoshuisha su warnira wokshurena, egi woshurna, hota nagueja kirinag‐hirena egi warnas‐taghirena, egi wanig wangregi herera waruj‐hirena.

⁶ Egi hota ini hihageja kirinag‐hirena, egi higu haxeb hahuregi hatat’eghirena, hotokera hirujis hirege esge.

⁷ Egi hota napahi horogeja kirinag‐hirena, egi napahira wakishu haxebhirena, egi warnassaghirena.

⁸ Egi hijanera makax phieja kirinag‐hirena, egi haxebhirena, egi waisgabra hogihisha haminaghirena. Egi jaja washa de‐e e‐rashjangi mashjint’et’ena: Hisha nuxhopox winaxgu jungi naxguhire.

⁹ Egi hironagananka higiwaxhirena, wairena: Washa hisgera de‐e jasge wagaireshe?

¹⁰ Egi wena: Hornikunawina washa nuxawara hiraperesjawina Maura hungma harnieja. Eshi hijanera washisgera, wajarnankhi inke wajairanikjege, egi warnaxgunankhi inke naxguinanikjege.

¹¹ Washisgerara de‐erena: Sura Maura hoit’e harnira herena.

¹² Jarnaga naguejaka, warnaxgura e herenakshana, egi waxopinishishigra hajiranaga egi najge warnieja hoit’enaka wagirusnankshana, inke harnaxguhiranikjege egi inke wankshig‐inanekjege.

¹³ Ini hihagejananka e hererena, e jaja naxguinega, hoitera wogishawaxji rus‐hirena, egi she‐e inke reju juiranina, e jowexjinig harnaxguiranaga egi jaja wiunjairegi hakjagijeranana.

¹⁴ Egi napahi horogeja shibranaka e hererena, e jaja naxguinega, hakarairanaga egi washa horuxurugrashana harusherej‐hire egi hitajera egi wankshighoi‐egi wogishawaire hawuhinsh wahire, egi inke washa phira roju wahiranina.

¹⁵ Egi makax hophiejananka e hererena, e najgera wogisog egi najgera phinena hoit’era naxguinega, rujgushirena egi washa phi axebhirena wanaiserej hiu.

¹⁶ Inkisha hiratashakerehira hisha taehigi egi woshura hisha hirarukaninana, egi shige homig khuhainja kereninana, eshi hiratashakerehi hornashieja kerenana, jarnaga eja hokewegi hatasha hajairanana.

¹⁷ Jagurisha harnuxawainegi hiperes wahirekjanena egi higu jagurisha nuxawankhi janti hirekjanena egi hornaekjanena.

¹⁸ Esge hirakarauwine warnaxgura jasge rarajegi. Higu peshe washanijegi e hisge hok’uinekjanena, egi higu peshe inke washa junijegi, e girus‐hirekjanena e washa harnijeshe hireshge.

¹⁹ Egi hiunira egi wakhinubra hahirena, egi inke hirahi ruxurug hiranina wankshigra rokanage.

²⁰ Egi hogiraghirena, wairena: Hiuninaga egi warakhinubra jangregi nashinankshana, harnija rogunankshana.

²¹ Egi horniharna egi wawagena: Naniga egi wakhinubra de‐e ererena, Mau hoit’era naxguinena egi uinena.

²² Egi wauna hambisha eja waj xeteja hominagshana hironaghirera wakarakishu. Egi wawagena: Te‐ageja howainekjawina egi watirehirena.

²³ Egi harahairau nana, egi jashjobokirujake jina teja, egi wajra nira hoixji harena egi naxiresgena.

²⁴ Egi hirahirena egi ruxinghirena wairena: Hirukanara, Hirukanara hit’awina. Egi nashina egi maintajehira najisgina egi jashjanka, egi rushjainena egi hatag kirijena.

²⁵ Egi wawagena: Harnaxgu hashiniwira jasgehishe? Egi naxirairena, khorairena, wakigairena: Peshe de‐e hereguni? E maintajehira egi ninashge uwashira egi harnaxguinena?

²⁶ Egi ma Gadarena‐eja hahirena, e agakinakshana Galilera.

²⁷ Egi jaja anjinakhi eja wangisha hakijarna jhinageja hereisha, e waxopinishishig sixji harnijena, egi inke waini unijena, inkeshge jhi hojhini, eshi wanaxomig eja jhijena.

²⁸ Jaja Jesus hajagi mashja uwana, egi jowehieja mingjimpshana, egi mashjint’et’ena wena: Jagu hinkikuanjeshe? Jesus Maura eshana xetenagra Hinigra neninegaja? Nigikarajshana inke washoshishig howewinine.

²⁹ Naxirag shishigra wankshigeja hihinab washishunuge esge. Sixji harukosginige. Egi mas‐hokiwaxuxug hirusgij hiregashge wirusgij, egi wirusgijra waiwaxshununa egi waxopinishishig mojainainja howahas hirena.

³⁰ Egi Jesus higiwaxshana wagena: Rashra jagu hinigaireshe? Egi wena: Legion, waxopinishishigra roha hokewege esge.

³¹ Egi gitairena inke hosheweja howare washinikjege.

³² Egi eja xguxguishe hornihe xeteisha uankshana xe hihageja wakananank, egi gitairena eja howaire washikjege, egi u‐wagigina.

³³ Egi waxopinishishigra wankjega eja hihinab hirena, egi xguxguishenanka eja hokawairena, egi horniheaka nangra rokana wauinena hiranukanakji teja howahiarairena, egi nihaijebhirena.

³⁴ Jaja xguxguishe hirakarara wajairegi jasgairegi, giashirena, egi jhinageja hagi horaghirena egi jhinag xununigeja.

³⁵ Egi harairanaga jagu uinegi hajahirena, egi Jesus hirahirena, egi wangjega hajairena hisha waxopinishishig hojhirera nigeowakarairera, Jesus si‐hieja minaganankshana, waini hornashi, egi wowewi harnira phi, egi naxirairena.

³⁶ Jarnaga hajairegi wogiraghirena jasgehiranaga rushjahiregi waxopinishishig harninagra.

³⁷ Egi worohanka Gadarera mowagax hogigixanka gitairena nigiowakerekjege, mashja naxirairege esge. Egi waj‐eja homigkanaganaga egi hakja shige kerena.

³⁸ Wangjega e waxopinishishig hojhiranaga nigeowakarairera gitarna, hakishu unkjege, eshi Jesus wangjega keregigina wagena.

³⁹ Jhi‐horajhieja howakarare, egi wogirag‐gaje Maura washa rokanaxjisha ningiune. Egi jikerena, egi jhinageja harnaj wogiragshana, Jesus washa rokanaxjisha giunga.

⁴⁰ Egi herena, jaja Jesus hakjagiga, wankshignanka hokewegigirena, harnaj hapenanke.

⁴¹ Egi horuxujre wangisha jina Jairus higairera wohokhu‐hojhi hirukanara herena. Egi Jesus si‐hieja jimpshana, egi gitarna eojhieja hisheshi hirege.

⁴² Hishankira hinughigi, ejaxji ma kerepanaishanaga‐nuphashana‐haisha hereguni, egi d’e‐hikorohoake. Egi wauinena Jesus rahau, wankshigra horugix kererena.

⁴³ Egi hinugisha ma kerepanaishanaga‐nuphashanaha wai xuna, e washa warnigi harnaj shena wakaragina makhanieja, inkisha rushjahinina.

⁴⁴ Hageja howahina, egi waini‐ugeja higikiorna, egi higuana wai xuna rushjana.

⁴⁵ Egi Jesus wena: Peshe hinkioshe? Jaja harnaj khibakhinegi, Peter egi wakishu‐unanka wairena: Hirukanara, wankshig horogregi sh’u‐shawankshana egi hirananikisunshnankaja egi washena, peshe hinkioshe?

⁴⁶ Egi Jesus wena: Hisha hinkiorna. Hiaperessana homashja harnira hota hingihinabshana.

⁴⁷ Egi jaja hinugjega hajagi, inke nuxawanina, naxire gisassa jina, egi jowehi mainja jimpshana, hogiragshana wankshignanka jowehireja jagu hawau hikiogi, egi higuana horushjana jasgegi.

⁴⁸ Egi hinugjega wagena: Hinughaxji ninukhegshana, harnaxgu hashinira rushjanina, rashguni karare.

⁴⁹ Higu hit’at’ajau, eja hisha jina wohokhu‐hojhi hirukanajega hojhieja howajina, wagairena: Hinugraga d’ena. Inke Hirukanara hawehinine.

⁵⁰ Egi jaja Jesus de‐e naxgungi, hornigiharna wena: Inke naxiranine, harnaixgune, egi hinugraga rushjankjanena.

⁵¹ Egi jaja jhieja hokewegi inke wankshignanka hisha hija hokewegiginina, eshana Peter egi Jakob egi Johnga, egi hinugnanka hianjra egi hiunira.

⁵² Egi harnaj xaghirena egi hinuganka gixagnankshana. Eshi Jesus wena: Inke xagwinine, inke d’arninankshana, nanakshana.

⁵³ Egi waixjairena igixja, hinugnanke d’era hiperesnanke.

⁵⁴ Egi harnaj jangeja howaire washina, egi hinugnanka nabeja harukosanaga egi gigorna wena: Hinugra kikawa‐ane.

⁵⁵ Egi hinugnanka naxirag harnira shige kirina, egi higuana kikawa‐ana, egi waruj hoku washina.

⁵⁶ Egi shagwahira khorairena, eshi Jesus wawagena: Inke hisha hogirag hiranikje jagu unga.