Lukga 24 - Winnebego Bible Portions 1907

¹ Egi hamb jornira haramihehambregi hainixjinig warnaxi‐hoshueja hahirena, maka pana phi hirushjahirera harniahirena, egi hijane wakishu hahirena.

² Egi ini warnaxi‐hoshuejanagra hijahi hawarnainagire hajairena.

³ Egi hijokawairena egi Jesus Hirukanara rora inke hieranina.

⁴ Egi herena de‐e wowewiharejirena, horuxujre, wangra nupi nashianjena waini rukanakanap‐u.

⁵ Egi naxirairena, egi wakhu hakikaraninena egi wawagairena: Jagu‐u niamb‐hisha horani harajeshe d’e‐horogregi?

⁶ Inke higiniharnina, eshi kikawa‐ana, wewiwine jagu hironikit’awira, Galilea‐eja uniharegi.

⁷ Wena: Wankshig‐hinigra wankshig washa woishana‐u nab warnineja rushjanehiregi phinana, egi naramiheja haisarajhiregi egi hamb hitanihangi shige kikawa‐ankjanena.

⁸ Egi hoit’e warnira wawewinena.

⁹ Egi warnaxi‐hoshueja unangra hakarairena, egi washa de‐e harnaj hishankirashanara wogiraghirena, egi hijanera harnaj.

¹⁰ Maria Magdalena herena, egi Joanna, egi Maria Jakob hiunira, egi hinug hijane wakishu hahirera, e washa de‐e Apostelra wawogiraghirena.

¹¹ Egi hoit’e warninera, wowonk we wiranainena, egi inke warnaxguinanina.

¹² Egi Peter nashina, egi warnaxi‐hoshueja nuwanghina, egi hoisijshana linen waiperera wajarna injabnankshana, egi nigeowakerena, egi khoragshana washaisha herega.

¹³ Egi horuxujre hambregi e nupiwi jhinag Emmaus higairera eowarairena Jerusalem‐eja hipara wigus akewena.

¹⁴ Egi hokikit’arnankshana hambnanka eja jagu uinera.

¹⁵ Egi herena, hokikit’arnank’u, Jesus exji wirahina egi wakishurena.

¹⁶ Eshi hishjasura wagirukos‐hirege inke higiranina.

¹⁷ Egi wawagena: Jaguisha haerashawangwishe naguregi sh’uwashawangwire egi jagu‐u najgeraniteg hashawangwishe?

¹⁸ Egi hisha, Kleopas higairera, hornigiharna wagena: Neshana hijahi hereraniguni Jerusalem‐regi inke hiraperesni washaisha herera hambnagre egi?

¹⁹ Egi wawagena: Washa jaguisha? Egi wagairena: Jesus Nasaretheja herera wagena, E prophet hisha herena, worera rokanara egi hoit’era mangishjana Maura jowehieja egi wankshigra harnaj jowehireja.

²⁰ Egi nabhoruxaj hirukana hungra jasgegigirera egi xete warniwira rushjare‐hiranaga d’ehiwagigirena egi naramiheja haisaraj‐hirena.

²¹ Eshi Israelra E niambwahikjane hiarajawiu herena, egi shige de‐e hamb de‐e hambhitanihana herena, hipa washa de‐e uinera.

²² Egi shige hinug wakishu hajiwira khorewinawina e warnaxi‐hoshueja hainixji hahirera.

²³ Egi rora inke hieranigi, hakirirena wairena: Washa hajawahire waxopiniwarajire hajairegi e niambshe aireshe airena.

²⁴ Egi hota wakishu hajiwira warnaxi‐hoshueja hahirena egi hinugnanka jagu airera, shesge hierena, eshi inke hajairanina.

²⁵ Egi wawagena: Inke warnaninksab winigaja egi najge washiniwira worushag‐kairegaja harnaxgura prophetra jarnaga washara airera.

²⁶ Inke washa de‐e Kristus hawegi phininashe, egi gloria harnieja hoikawarnashe?

²⁷ Egi Mosesga epa arena egi prophetra harnaj e wowagaxra harnaj wijanti wawogiragshana, jagushana higaire wagaxankhi.

²⁸ Egi jhinagra hiwusunsh hahirena, howarairera. Egi hiraijera hawinjeja howare wa’uank‐khina.

²⁹ Egi raxurugnainena wagairena: Hinkishu hiwushawire, hoxjarnaginige esge, egi hambra jowe harnaj hiunarnaginige. Egi hijokewena wakishu hiwusharna.

³⁰ Egi herena jaja warujeja wakishu minagkhi, waisgabra russana, egi wainapshana, rujharnaga egi wawogarna.

³¹ Hishjasura gihas‐jinaghirena, egi higirena, egi higuana inke hinupahana hajairanina.

³² Egi wakigairena: Jasge inke najgera wangataenishe, naguregi wangokit’agregi, egi wowagaxra wangagiruhashangregi?

³³ Egi howagix‐eja nashinena, egi Jerusalem‐eja howakarairena, egi hishankirashanara stornak’u wierena, egi hijanera wakishu unankshana.

³⁴ E wairena: Hirukanara hisgexji niambshana, egi Simon jantingikhina.

³⁵ Egi horaghirena nagueja jagu uinegi, egi jasgehiranaga higiregi waisgab rujhegaja.

³⁶ Egi hit’at’arnak’u, Jesus exji horoghireja nashinjena egi wawagena: Rashgunira harakishu sh’uharajena.

³⁷ Egi naxirairena, egi nakawairena, naxiragisha hajaireguni hirairege.

³⁸ Egi wawagena: Jagu‐u nanaxisharawishe? Egi jagu‐u najge washiniwieja wowewi shesge haxebrawishe?

³⁹ Nab warnira woruxujwire egi si warnira, nexji wa’uanjena. Hinkiowige egi hinjawire, naxiragra inke ro egi hushereg juninankshana, hinshjarajegaja.

⁴⁰ Egi jaja deshesge wige rashjangi nab warnira wagiwaharna, egi si waruira.

⁴¹ Egi wogishawarnanke kheni harnaxguni‐nankshana egi khorananke, wawagena: Waruj hashiniwishe?

⁴² Egi ho taxere nige egi hesigdanishu hok’uinena.

⁴³ Egi warus‐arnaga jowehireja warujshana.

⁴⁴ Egi wawagena: Hoit’era de‐e hererena, hironikit’awira harnikishu hauanjeregi, washara harnaj exji herena e Mosesga woehi harnieja wagaxangra, egi prophetra egi Psalmra‐eja newaigairera.

⁴⁵ Egi wagiruhas‐shana hornaxgu warninera, wowagaxra e naxguinekjege.

⁴⁶ Egi wawagena: Shesge wagaxankshana, Kristus hawegi phinkjanege, egi d’arnagra eja kikawa‐ahowakirikjanena hamb hitanihainja.

⁴⁷ Egi washa woishana u najgekarategra, egi washa woishana u wagit’une rash earnira wihokhuinegi phinana, wankshighokiraj horogeja, Jerusalem‐eja jorni uinekjanena.

⁴⁸ Egi ne washa de‐e wihohira neninewina.

⁴⁹ Egi horuxujwire, Jajiga washa manajra harninenigigiwina. Eshi Jerusalem jhinagregi hiwushawiginine, wangregi homashja howaji hashiniwingi egi.

⁵⁰ Egi Bethania‐eja hipa wakishu hina egi Jesus nab warnira waruana egi hopiowe warogiguna.

⁵¹ Egi herena hopiowe warogigujau wat’una kerena, egi wangregi howakerena.

⁵² Egi gikarajhirena egi Jerusalem‐eja howakarairena wogishawara rokana.

⁵³ Egi hoishib wohokhu‐hojhixeteja unankshana, Maura rajank egi wainginab. Amen.