Lukga 11 - Winnebego Bible Portions 1907

¹ Egi herena, E Mau gikarajnakshana nige, jaja rashjangi hironag warnira hisha wagena: Hirukanara Mau gikarajra higiguswire, Johnga wironag warnira wagigusra shesge.

² Egi E wawagena: Jaja Mau ragikarajwigi, wawiaje: Hianjniwira wangregishanagre, rash hashinira wakanjank nigigirekjena, hungma hashinira hiraijikjawina, woshga hashinira manegi uinekjena wangregi jasge hinankhi shesge manegi hirekjena,

³ Hamb de‐e waisgabduj harniwira hunkuwianje ningikarajwina,

⁴ Egi washa woishana warniwira waigit’unawire, nishge jarnaga washingisha‐nainawira wagit’untekjawina. Inke washa woishana uwahieja hunutiwinianje, eshi wowonkjega eja hingijirawige khishibwiwianje.

⁵ Egi wawagena: Hisha hijakorowahi nijuwingi, egi hahekissagregi hirarahiwigi egi waragawinana, hijakoronira, waisgab horok’ina dani hornaj‐hingigire.

⁶ Hijakorohara hikiwarakhi hiraikirige esge, egi inke washa waruj hoku harninige.

⁷ Egi jhirogeja‐jega hornihakjanena egi warnana: Inke hawewinine, jhirobra hornassajena egi ninkjangnig warnira homigregi wakarakishu hamigmankshana, inke hakikawa‐anaga hornik’u duxurugnina.

⁸ Hinigawina: Inke hijakorohiga hawauni, kikawaanaga egi hok’uishge, hawehijege kikawa‐anana egi hok’unana jarnaga wagajegi.

⁹ Egi hinigawina: Tawire egi hornik’uinekjanihawina, horniwine egi hish’ekjanihawina, gikogwire egi nigiruhashirekjanihawina.

¹⁰ Jarnaga taga, rusankshana, egi hisha horniga hiejena, egi hisha gikoka giruhasnankshana.

¹¹ Hianjhirera hajanga hinigwarawigi waisgab ningitawigi, ini horak’uwinashe? Egi ho‐risha tagi, hotajega wakhara hisha hok’uiranashe?

¹² Egi wanigijge tagi, skorpionra hisha hok’uiranashe?

¹³ Worniwank harajera reshge, ninkjang washiniwira washa phi wokarak’ura hirapereswina, Hianjrawiga wangreginagre hiraijeraxjinakshana Naxirag Wakanjangra wogakjanena jarnaga gitagi.

¹⁴ Egi waxopinishishig jangra howahasjena ining hisha, egi herena, jaja waxopinishishigjega hihinabgi iningra hit’et’ena, egi wankshigra khorairena.

¹⁵ Egi hota wairena: Waxopinishishigra jangra wowahasjane Be‐elsebub hiu waunjena waxopinishishig hungra.

¹⁶ Egi hijanera hiunjarnakshana wangregi washa woijanti howajihi rogigunankshana.

¹⁷ Egi E wowewina wawigiperesjena, wawagena: Hungmara hisha kirujekhiranaga hakikirairegi maisinshkhinanana, egi jhirisha jhi hijanera hisha hakiragi khananana.

¹⁸ Egi Satan hishge kirujekhiranaga hakikirairegi, jasge hiarnaga hungma harninera nashinashe? Waxopinishishig jangra hopahasra Be‐elsebub hiaushe hishawira esge.

¹⁹ Egi Be‐elsebub hiauanaga waxopinishishig hihinab hajegi, peshe hiuiranaga hinigwarawiga waxopinishishigra hihinab wahiresashe? Esge e haehire hinigiuinekjanihawina.

²⁰ Eshi Maura nab harnieja hauanjena waxopinishishig jangra hopahas‐hajane, hisgexji Maura hungma harnira hiranijiwina.

²¹ Wang mashjara hisha wapahi hakarani jhixetera hirakara‐karagi washa warnira rashguninagnana.

²² Eshi homashja waunjega hijairara hisha hirajigi egi warnanana, wapahira harnaj warnashearnaga wawinashinagra, egi wawikiweniranana.

²³ Hisha inke hakishu haunianjegi, inkirajanana, egi hisha inke wastohi hinkishu‐unigi, woiejanana.

²⁴ Jaja naxirag shishigra hihinabgi wangisha‐eja, mo‐wuseja howe hikiwarenana, hoxgasigi horni egi inke washienigi, e wena: Jhiwajhieja hakja wawakerekje hajinja hiahinabra.

²⁵ Egi jaja kirigi hiena gisinshjine egi phi‐uxjine.

²⁶ Egi ranaga egi naxirag hijanera shagowi rusnana, wowonk waunjera hijairara, egi hijokawairanana eja jhiranana egi wang she‐e hijaira wakinixjinana jorni e inke shesgarnishununa.

²⁷ Egi herena washa de‐e arnak’u, hinugisha worohainja uwankhi hit’at’ajirena egi wagena: Hisha unijganakhi ujra hophiowegaja, egi wasra rahina.

²⁸ Eshi Jesus wena: Hisgexjina, hophiowarnakshana jarnaga Mau hit’era naxgunga, egi giuinega.

²⁹ Egi jaja wankshignanka stoxji hajiregi, E wajirena: Wankshighoi de‐e wowonk hiregaja, washa wijanti horninank, egi inke washa wijanti wogarnikjanena, eshi Jonas prophet woijanti harnira eshana wogakjanena.

³⁰ Jonas woijanti Niniwe wankshigra wagiura, shesge hikisge nishge Wankshig‐hinigra wankshighoi de‐e wagiunkjanena.

³¹ Hiungiwi wiorojanjeregi herera nashianaga woehi (hambeja) wankshighoi de‐e, wankshigra wakishu egi washinohire howewahikjanena, ma‐ugeja howajige esge, Salomon wowanaiksabra naxgujina, egi horuxujwire, Salomonga hiraijeraisha egi jena.

³² Wankshig Niniweja herera nashinekjanena woehi hambeja wankshighoi de‐e wakishu, egi washinohire howe wahirekjanena. Jonas wahokhuna washa woishanara najgerakarateg hirege, egi horuxujwire, Jonasga hiraijeraisha higijena.

³³ Inke hisha hiratashakerehira hisha taehigi nuxawa kereninana, inke shige kog khuhainja kereninana eshi hiratashakerehi hakereja kerenana, e hisha hijokewegi hohamb hajakjege.

³⁴ Rora hatasha harnira hishjasura herena, esge hishjasu hashinira phinakhi, ro hashinira hishge hohambra hoixjinana, eshi hishjasu hashinira shishighi, hishge ro hashinira hokawasra hoixjinana.

³⁵ Esge hirakara uwine, hohamb horniuhajega inke hokawasnikjena.

³⁶ Ro hashinira harnaj hohambra hornixjirajegi inke nige hornikawasnigi, harnaj hohambra hornixjina. Iratashakerehi hambjisha hohamb ningigina.

³⁷ Egi hit’at’arnaku Pharise hisha waruj shi‐jina egi hijokewena, egi minagshana warujeja.

³⁸ Egi Pharisenaka hajagi khorena inke jorni kikurusharnaga warujnigi.

³⁹ Egi Hirukanara wagena: Pharise raniwira ni‐wirajgara egi wasgera hihagra sge‐warawina, eshi rog hashinira washa wanashekera hornixjina egi wowongra.

⁴⁰ Inke warnainijuni, inke erenishe hisha hihagra waunjera, shige rogra waunjera?

⁴¹ Washa jagu hashinirajegi woragagi egi horuxujwire washara harnaj sge‐wanigigirekjanena.

⁴² Harawekjanihawina Pharisera hikerepanaishera woragarna mintra egi rutra egi xawiabxete hokirajra harnaj egi woehira haraixa hashawankshana egi Mau wogixetera, washa de‐e wauphiraniwingaja egi shige hijanenanka wauphiraniwingaja.

⁴³ Harawekjanihawina Pharisera wohokhu‐hojhieja waminag hankshieja minagra raiphiwinge, egi hikaragirera raiphi harajena woruwieja.

⁴⁴ Harawekjanihawina wowagax hiperesra egi Pharisera hipokritra warnaxiomig nuxawanisge raniwina, egi warnaxiomig ejanankhi inke wawiperes‐hirani wankshigra eahi howarnankshana.

⁴⁵ Egi waehinanka hisha horniharna egi wagena: Wawagaxhajawagigira, washa de‐e hishare nishge hiroshig hinawina.

⁴⁶ Egi Jesus wena: Nishge waehira harawekjanihawina, wankshignagre wak’in sgingerexji gki‐waragigi harajege esge, egi inke nexji wak’in de‐e nab washinira hishankira rareshge hishuanaga hirakish’ornina.

⁴⁷ Harawekjanihawina, warnaxihoshu prophetra waragish’uwianaga egi hianjwarawiga d’ewahirena.

⁴⁸ Hisgexji hosharagharajena hianjwarawiga woshgana waragiphi harajena, egi d’ewahirena, egi warnaxihoshura wash’uwina.

⁴⁹ Esge hishge Maura wowanaiksab harnira wena: Prophetra rewagigikjanena egi Apostelra, egi hota d’ewahirekjanena egi hinigishanainekjanihawina.

⁵⁰ Prophetra harnaj wa‐i warninera managre jeg‐jinagreja wa‐i xuwahirena wankshighoi de‐e hirawairekjanena.

⁵¹ Abel wa‐i harnira eparnaga Saxarias wa‐i earnieja, Altar wohokhu‐hojhixete hojakenainja e d’ena. Hisgexjina hinigawina: wankshighoi de‐e hirawairekjanena.

⁵² Harawekjanihawina waehira, hiperesra hiruhasra shuruswige. Inke ne hija horakawawinina, egi hijokewenainegashge roraxiharajena.

⁵³ Egi washa de‐e wawigena, wowagax hiperesra egi Pharisera mashja wogiteghirena egi washara rohaxji higiwaxhirena.

⁵⁴ Hape git’umbhiranaga egi hogininakshana washanisha eegi harukos‐hirekjege. E higiuinarnaga.