Lukga 1 - Winnebego Bible Portions 1907

¹ Roha ungejini woragra wagaxhirege washa de‐e exji herena horok’hihiwiregi,

² Wangogirag hirawina, jeg‐hojikerehieja herera hishjasu hirajairera egi hoit’era wihokhunena.

³ Esge nishge phiwauna hiarege, hipax‐hajau washara harnaj hiaperessana, egi nigipagaxshana washa de‐e harnaj, neshana niphixjinge Theophilra,

⁴ Hiraijeraxji wogusra wogisogji hiraperesjege e ningigus hirera.

⁵ Judra hung harninera, Herodes wankshigho’inihera eja, nabhoruxaj hirukanaisha nihena, Saxarias higairena, Abia wanieja u’ankshana. Egi hijawira Aaron hinugwahira hisherena, egi rashra Elisabeth higairena.

⁶ Egi hinubike phinena Maura jowehieja. Maura woehi harnieja egi u’washi harnira harnaj phihirena.

⁷ Egi inke ninkjang juiranina, Elisabeth ninkjushgunisha herege esge, egi shegunegi hinubike shag’jinena.

⁸ Egi herena, nabhoruxaj hirukanajega woshgana g’una Maura jowehieja, houna higiregi.

⁹ Nabhoruxaj hirukanara worera houna shegu hirena, wotapanahi houna higirena egi hijokowena Hirukanara wohokhu‐hojhixete harnineja.

¹⁰ Egi wankshigra hornihe xete jangeja Maura gikarajnankshana wotapana hijanegi.

¹¹ Egi Hirukanara waxopiniwarajire warnira hisha janti’gikhina wotapanahi Altar hounjega sanig hoishoroija nashinjena.

¹² Egi jaja Saxarias hajagi naxirena egi nakewena.

¹³ Egi waxopiniwarajirajega wena: Inke naikawanine Saxarias. Mau‐gikarajra nanixguinena, egi hijawinaga Elisabeth hojinjinigra hisha harnigarnikjanena egi rashra Johnga hiragekjanena.

¹⁴ Egi wonigishawakjanena egi raiphinkjanena, wankshig’ingi roha hito’inkjanena.

¹⁵ Egi Hirukanara washaxji hiranainkjanege esge. Egi inke nishujra egi shige washa shja rajganikjanena. Egi Naxirag Wakanjangra hoixjinkjanena hiunira ujganag’nakhishge shesgekjanena.

¹⁶ Egi Israel ninkjangra roha hakja Hirukanara eowakere‐wahikjanena Mau harnineja.

¹⁷ Hirukanara jowehieja howarekjanena, naxiragra egi homashja Elias harnira, hianjwahirera najge warninera hakja ninkjang warnineja howakere‐wahikjanena, egi inke harnaxguiranira hakja hophieja wowanaiksabra horus‐wahikjanena. Hikoroho wagigikjanena wankshigra, Hirukanara hirushja‐gigikjanena.

¹⁸ Egi Saxarias waxopiniwarajirejega wagena: Jasgeharnaga de‐e hiaperes’ikjaneshe, wangnunig harnigaja egi hijawihara shagjingaja.

¹⁹ Egi waxopiniwarajirajega horniharna egi wagena: Gabriel newinena, Maura jowehieja nashishununa, egi huingigina hornigitaikjege, egi worag phi de‐e hiperesnikjege.

²⁰ Egi horuxujre iranininkjanena, egi inke hit’et’e shuruxurug‐nikjanena hamb‐ejipa washa de‐e heregishana, inke hoit’e harnira harnainagixgunige esge, hoit’e de‐e hamb warnira hajinja herehiregi exji herekjanena.

²¹ Egi wankshigra Saxarias hapenakshana, egi khorairena wohokhu‐hojhixeteja s’ixjiunge.

²² Egi jaja hihinabgi, inke wokit’e ruxurugnina egi wijantina wohokhu‐hojhixeteja washa Maura eja howaji hajara, egi wawigigussana, egi iraninkjena.

²³ Jaja higiregi, hamb‐wore woura hokaraishibgi eojhieja howakerena.

²⁴ Hamb hageja howarehiga, hijawina Elisabeth waujganagshana, egi wi sajaha nuxawana, wena:

²⁵ Deshesge hingigigaja Hirukanara hambeja hunruxujgi, wankshigregi woiroshig‐gesgera hingirusgaja.

²⁶ Egi wirakewe hainja waxopiniwarajire Gabriel Maura hugigina, Galilea mowagaxeja jhinag Nasareth higairera eja jina.

²⁷ Hinug‐wajeg hisha hirahina, wangisha Joseph higairera khanaikjane manajgi, Dawid hojhieja hereisha, egi hinug‐wajegjega rashra Maria higairena.

²⁸ Egi waxopiniwarajirajega hinugjega hirajina egi wena: Hinikaragina najojana rokana ningigina, Hirukanara harnikishu unjena, hinugnagre neshana hiraijera hopihowe ronigiguna.

²⁹ Egi jaja hajagi naxirena, washa ajega, egi woikikaragi jaguisha de‐e hereguni hirena.

³⁰ Egi waxopiniwarajirajega hinugjega wagena: Inke naxiranine Maria, Maura najonijara hish’ege esge.

³¹ Egi horuxujre, waurajganaikjanena, egi hojinjinig hisha rajunkjanena, egi rash sharajgi Jesus hiragekjena.

³² Rokanakjanena, egi Eshana Hiraijeranaga Hinigra higairekjanena, egi Hirukanara Maura hokunkjanena hianjra Dawidga hung waminag harnira.

³³ Egi Jakob hojhira hirukanakjanena manegus, egi hungma harnira inkaga shejanikjanena.

³⁴ Egi Maria waxopiniwarajirajega wagena: Houna de‐e jasgekjanegaja, inke wang hiaperesni hajegaja?

³⁵ Egi waxopiniwarajirajega horniharna egi hinugjega wagena: Naxirag Wakanjangra hiranijikjanena, egi Eshana Hiraijeranaga homashja harnira hoirawahasininkjanena, esge washa wakanjangra wankshig‐horni’inkjanena Maura Hinigra higairekjanena.

³⁶ Egi horuxujire, washanraga Elisabeth, hishge hojinjinig hisha ujganagshana shag’janunige. Egi de‐e wirakewehara herena, e ninkjangjushguni higaireshunura.

³⁷ Maura inke washanisha gijexininakshana.

³⁸ Egi Maria wena: Horuxujire, Hirukanara hinugware hinigaja, hoit’e hisharajane hingiunkjena. Egi waxopiniwarajirajega hinugjega d’unakerena.

³⁹ Egi Maria nashina hambnaka, egi xapge xe‐hojueja howarena, Judea mowagax jhinagisha eja.

⁴⁰ Egi Saxarias hojhieja hokewena, egi Elisabeth hikaragina.

⁴¹ Egi jaja heregi Elisabeth, Maria hikaragijega naxgungi, ninkjangnaka uj‐rogeja da’dampjirena, egi Elisabeth Naxirag Wakanjangra hoixjina.

⁴² Egi mashja hit’at’ajirena, egi wena: Hinugnagre neshana hiraijera hopihorawena, egi hopihowena uj‐hashiniejanaka.

⁴³ Egi hajinja howajiguni, Hirukana harnira hiunira hiraijire?

⁴⁴ Horuxujire, higu hinakaragira nanixgura, uj‐harninegi ninkjangra da’dampshana wogishawa.

⁴⁵ Egi hopihorawena harnanaxgunge, Hirukanara jagu hornigiragkhi exji herekjanena.

⁴⁶ Egi Maria wena: Hirukanara naxirag harnira rokana hingigina.

⁴⁷ Egi naxirag harnira Mau‐eja wogishawajena Wankshig‐hoi ruxurug harnira.

⁴⁸ Washaxji hirainaingaja wanajojaisge hajegaja hunuxuj hinugware hinira, egi horuxujire, epa hokijuna harnaj hophi‐howeisha hingairekjanena.

⁴⁹ Hisha Mashjanagra, washa rokanaxji higiungaja, egi rashra wakanjankshana.

⁵⁰ Egi najwojanihekjanena hokijuranihegi jarnaga nakewegi.

⁵¹ A‐homashja harnira wagiwaharna, egi jarnaga wowewina wauxji‐wakhiankhi mo‐khiewahina.

⁵² Wankshig‐rokana waminag warninejananka wawashibjena, egi wanajojaisgera nashi‐wakerejena.

⁵³ Dokewehira washa phira hoixji woshujena, egi hitajera manra kerewagigijena.

⁵⁴ Israel warera wagijirajena, najwojana khewewinge.

⁵⁵ Hianj‐hiwahiwira shesge wamagirajshana, Abraham wagena egi su‐warnira manegus hiranihekje.

⁵⁶ Egi Maria ejaxji wi daniha hakishu una Elisabeth, egi eojhieja howakerena.

⁵⁷ Egi Elisabeth wakheg hojura higirena, egi hojinjinigra juna.

⁵⁸ Egi wikiwusunsh‐jhira egi washawahira naxguinena Hirukanara hinugjega giwaharna najojangi egi hinugjega hakishu wogishowairena.

⁵⁹ Egi herena, hamb hiraruang‐gahara, ninkjangra, maje‐hajirena, egi Saxarias higairena hianjra rashra hakarani‐gigirena.

⁶⁰ Egi hiunira horniharna egi wena: Inke shesgarnina, eshi Johnga higairekjanena.

⁶¹ Egi hinugjega wagairena: Inke washawaraga rashra hisha deshesge higairanina.

⁶² Egi hianjra wigigus hirena, jagu higekjegi.

⁶³ Egi iniseb d’arna egi wagaxshana, wena: Johnga higairekjanena. Egi harnaj khorairena.

⁶⁴ Egi higuana ira gihassana egi resira shgarena egi hit’et’ena, egi Maura rajankjirena.

⁶⁵ Egi jarnaga hiwusunsh jhiakhi naxirairena. Egi washa de‐e harnaj naxguinena xe‐hojuanka Judea mowagaxra.

⁶⁶ Egi jarnaga naxgungi wewinena, wairena: De‐e ninkjang jaguisha herekjaneguni. Egi Hirukanara nabra hakishu wauankaja.

⁶⁷ Egi hianjra Saxarias Naxirag Wakanjangra hoixjina egi prophetajirena, wena:

⁶⁸ Hirukanara ninajank hirekjanena Maura Israel washinira, egi horajajina egi wankshig warnira wakuruwinjina.

⁶⁹ Egi hera rojankerena e wankshig‐hi’inkjawira, ware harnira hojhieja Dawid.

⁷⁰ Egi (Maura) prophet wakanjangra shesge wawogiragshana egi wangogirag‐hirawina managre jeg jinagreja.

⁷¹ Hiniaimb‐jawige wangakarashig‐kjanihawina hokikjehiwajabwieja egi wangagirushib‐kjanihawina wangosh’ignangwigi harnaj.

⁷² Egi najojara wagiwaharna hianj‐hiwahiwira, egi rohira horeishankirakhi wakanjank harnira wewinena.

⁷³ Egi Maura wihohinihera khewewinge hianj‐hihiwira Abraham wagena:

⁷⁴ Egi wango‐g’ukjanihawina, ne hokikje‐hiwajabwira nab harnieja hiu‐anjau wangakaraishewigi hagenigi epa gikaraj‐hirekjanena inke nakawairani.

⁷⁵ Wakanjank egi phi, jowehieja hiunkjanihawina, jajaixji wankshig‐hi’inawigi.

⁷⁶ Egi ne‐ninkjangra, prophetra hinigairekjanena Eshana Hiraijeranagra eja howaji. Esge Hirukanara joweja horawasherekjanena nagura hirushjangigi.

⁷⁷ Egi wankshig‐hoina hiperes‐warakjanena washa woishana warninera wagit’une wagairena wankshig E warnieja.

⁷⁸ Shesgawau najgeja hura najwojana Mau harniwira eja wangregi hurna hohambra e wangorajajiwina.

⁷⁹ Hokawas‐ejananka hohamb wogarna egi hoirahasi hot’ejanagra, egi rashguni nagueja howe‐wangagigiwina.

⁸⁰ Egi ninkjangnigra hoxetera direna egi mashjana naxiragra, egi mojainainja uniha‐u egi Israel‐eja khikawaharna.