Johnga 17 - Winnebego Bible Portions 1907

¹ Washa de‐e Jesus ena, egi wangeja horuxujshana egi wena: Jaji, howagixra jina Hinigraga gloriagiune, egi Hinigraga nishge glorianingigikjena.

² Homashja hunakuna rora harnaj wirukana hinagigire, esge E jarnaga horak’una wankshighoi hisgeja wok’unkjanena.

³ Egi de‐e wankshighoi hisgejara herena, hiniperes‐hiregi, Mau wogisogra neshana ninera, egi Jesus Kristus E huragigira.

⁴ Gloria‐ningigiginina manegi. Woreisha haunkjege hunak’una hau‐dushjana.

⁵ Egi shegunegi Jaji gloriawina nexji‐hashinina hiu, gloria e wagena harnikishu hau‐harniharegi kheni managre jinagni.

⁶ Rash hashinira hiperes‐waharna wankshigra jarnaga manegi horus woirak’una. She‐e Ne‐washinira, egi she‐e Ne‐woirak’una, egi hoit’e hashinira harninankshana.

⁷ Shegunegi hiperes‐hirena, washa woirak’una harnaj, eja howajiagra.

⁸ Hoit’e woirak’ura, she‐e wawak’una, egi warus‐hirena, egi wogisogji hiperes‐hirena eja wawajira, egi harnaxguinena Ne‐huinagigira.

⁹ Gikaraj warnigigina: Inke managre gikaraj warnigiginina, eshi jarnaga hunak’una, she‐e Ne‐washinige esge.

¹⁰ Egi warnira harnaj Ne‐washinina, egi washinira Newarnina, egi gloria‐waharna.

¹¹ Egi inke hinupahana manegi haunikjanena, eshi de‐e manegi uinekjanena egi hiranigikjanena. Jaji wakanjangra, rash hashinira wirakara hiuanje, jarnaga hunak’una, e hishankirairekjege hishankira hinina shesge.

¹² Manegi wakishu hauanjeregi wirakarajena rash hashinira hia‐uanaga. She‐e woirak’una wirakarajena, egi inke hisha xawarninina, hinig xawarni‐nashana, wowagaxra exji herekjege.

¹³ Shegunegi hiranigikjanena, egi washa de‐e maneginagre wirowakit’ajena, e wogishawa harnira harnaj exji harninekjege esge.

¹⁴ Hoit’e hashinira wagarna, egi managre wosh’igshana, inke manegi hereraninge esge, inke manegi hereaninige hiakisgena.

¹⁵ Inke maneginagra washuruisde ningikarajnina, eshi wirarakarakjena inke washoshishig howairanikjege.

¹⁶ Inke manegi hereranina, inke manegi winenina hiakisgena.

¹⁷ Wakanjank wahire wogisog hashinira hik’unge. Hoit’e hashinira wogisogra herena.

¹⁸ Manegi howa‐huinagigira, hikisge hishge mara howarewagigina.

¹⁹ Egi e‐wawagiunge wakanjank hakhina, e nishge wakanjank hirekjege wogisogra hiu.

²⁰ Inke de‐e eshana gikaraj‐wanigiginina, eshi hishge jarnaga harnaixgungi hoit’e warninera hiu.

²¹ E harnaj hishankirairekjege, Jaji hunajhira egi hornijhira shesge, egi hishge hishankirairegi wangojhirekjege, egi managre harnaxguinekjena Ne‐huinagigira esge.

²² Egi gloria hunak’una, she‐e wawagarna, e hishankirairekjege, hishankira hinina shesge.

²³ Wawajhina, egi hunajhina, e hishankiraxji hirekjege, egi managre hiperesjege Ne‐huinagigira, egi waworagixetena, woiragixetera shesge.

²⁴ Jaji shesgekjena hajinja hauanjegi, woirak’una hishge eja wakishu haunkjena, gloria harnira hajairekjege e hunak’ura esge. Woiragixetegaja kheni managre jinagni.

²⁵ Jaji pixjina, managre inke hiniperesnina, de‐eshi hiniperes‐shana egi de‐e hiperes‐hirena Ne‐huinagigira.

²⁶ Egi wawagitagshana rash hashinina, egi wawagitaikjanena, egi wogixete she‐e hiwoiragixetera hojhirekjawige egi wawajhikjege.