Hoixgara 9 - Winnebego Bible Portions 1907

¹ Egi Saul higu niharehiga winakewe wahijena egi d’ewahijena, Hirukanara wironag warnira, nabhoruxaj hirukana hungra wawirahina.

² Egi wawagax u‐rogiguna Damaskus eja howarekjege wohokhu‐hojhiejananka eja hisha de‐e howak’u hiegi wang hirarnaga shige hinug hiregi Jerusalem‐eja rusgij warnikirikjege.

³ Egi hikiwarera rena Damaskus hiwusunsh hina, egi xapgexjinig hatasha horogeja jena hatashara wangregi howajina.

⁴ Egi mainja hokanena, egi hora naxguna wagairena: Saul, Saul jagu‐u hawe‐hinarajeshe?

⁵ Egi wena: Peshe nineshe Hirukanara? Egi Hirukanara wena: Jesus newinena, E hawe‐rarajena, washa wojexi rakik’u rajena wiwapoxra nanaxjag rajena.

⁶ Egi gissassana egi khorena wena: Hirukanara jagu unagigikjaneshe? Egi Hirukanara wena: Nashine egi jhinageja howarare, egi hornigirag‐hirekjanena jagu sh’unkjera.

⁷ Egi wang hikiware wakishu uanka inke xabni nashinankshana, hisha hit’et’e naxgunang‐nunige eshi inke hisha hajarninankshana.

⁸ Egi Saul kikawa‐ana, egi jaja jambgaja, inke hishahajanina, egi airutirena egi Damaskus eja harniahirena.

⁹ Egi hambra daniha inke washa hajarnina egi inke warujni inke shige rajgani.

¹⁰ Egi Damaskus‐eja wironag hisha jena, Ananias higairena. Egi Hirukanara washanjahi higiuanaga wagena: Ananias, egi Ananias wena: Hirukanara horuxujre eegi hajena.

¹¹ Egi Hirukanara wagena: Nashine, egi nagu‐hoxeteisha rojara higairera eja howarare, egi Judas hojhieja hiwaxaje hisha Saul higairera Tarsus eja hereisha herera, horuxujre gikarajnakshana.

¹² Egi washa hajaisha hajarna, wang hisha Ananias higairegi hijokewe hajarna, egi nab harnira hirawasunsh‐shana wajakjege.

¹³ Egi Ananias horniharna, Hirukanara wang de‐e roha horagire naxguna Jerusalem‐eja wakanjank washinirananka washa wowongra rohaxji wawagiushe airena.

¹⁴ Egi waunjena eegi homashja harnikje nabhoruxaj hirukana hungeja horussana jarnaga rash hashinira gikaraj‐ankhi harnaj warusgij‐jege.

¹⁵ Eshi Hirukanara wagena: Ranane, e wiroku hiaunkje gijainena, rash harnira harniunkjege hirarujeja herera jowehireja egi hungeja egi Israel ninkjangeja.

¹⁶ Washa rokana hagiguiskjanena e rash harnira hawau hawekjanena.

¹⁷ Egi Ananias rena egi jhieja hokewena, egi nab harnira hirawasunsh‐shana wena: Hikhinubra Saul, Hirukanara Jesus janti‐ningikhina naguregi haji, E huingigina, washjakjege egi Naxirag Wakanjangra hoixjine.

¹⁸ Egi higuana hishjasu harnieja hoha hoishini hikisgenisge shibrena egi higuana wajarna, egi nashina egi nihawaxu‐hirena.

¹⁹ Egi jaja warujgi, mashja‐jijena. Egi Saul wironag Damaskus‐ejananka hamb jarnahangi wakishu una.

²⁰ Egi higuana Kristus wihokhuna wahokhu‐hojhieja Kristus Maura Hinigra hereshe ena.

²¹ Egi jarnaga naxgungi khorairena, egi wairena: Inke de‐e e herenishe Jerusalem‐eja hisha rash de‐e gikarajhirega maisinsh wahisashe airera, egi shesge wagiu eegi jina, e nabhoruxaj hirukana hungeja rusgij warnigikjege.

²² Eshi Saul homashjara hiraijera harena, egi Judra wowewiharej wahina Damaskus eja jhinanka, Kristus E herera wogisog horagjena.

²³ Egi hamb rohanaga hageja Judra haehirena d’ehirekjege.

²⁴ Egi Saul hirapenankhi hiperes‐hirena. Egi jhinag jhirobeja hambga egi hahega hirakaranankshana d’ehirekjege.

²⁵ Egi wironagra haheregi harnirarnaga egi napaisha wagina hiroishge hokanag ini‐nawajaggeja shibrehirena.

²⁶ Egi jaja Saul Jerusalem‐eja gigi, e wironagnanka wakishu unaina, eshi harnaj nankawairena egi inke wironag hisha hereni hiranainena.

²⁷ Eshi Barnabas Saul rusarnaga egi Apostel‐eja harnihina egi wawogiragshana houna jasgehianaga Hirukanara nagueja hahi hajagi, egi hokit’airegi egi Damaskus‐eja Jesus rash harnira inke nuwangni wawihokhungi.

²⁸ Egi e Jerusalem‐eja hokewe egi hihinab wakishu unjena.

²⁹ Egi e inke nuwangni Hirukanara Jesus rash harnira wirokit’ajena egi Hellenistra wakit’akshana, eshi d’ehinainena.

³⁰ Egi wakhinubra hiperes‐hiregi Kesarea eja harniahirena egi Tarsus eja howarehirena.

³¹ Egi hageja stora rashguni uinena Judea harnaj egi Galilea egi Samaria egi xetearahairena, egi Hirukanara nakewe maninankshana egi Naxirag Wakanjangra warukhegnankshana, egi roha harahairena.

³² Egi wauna, Peter harnaj wowarena egi shige Lidda eja wakanjang jhinagra wirahina.

³³ Egi eja wangisha hiena Aeneas higairena, e maharuangaha mingshana egi howasha ro‐t’eg una.

³⁴ Egi Peter Aeneas wagena: Jesus Kristus rushjanina, nashine egi homig hashinira phinkune egi higuana kikawa‐ana.

³⁵ Egi jarnaga Lidda‐eja jhiakhi egi Sarona hajairegi, egi Hirukanara eja hapahi nashinena.

³⁶ Egi Joppa‐eja wironag hisha jhina Thabitha higairena, e hironagra Dorkas higairena, hinug de‐e wore phira rokana una egi washa wogara.

³⁷ Egi wauna hambananka eja hinugjega howasharna egi d’ena, e jaja rushairegi jhiokohi wangeja t’umb‐hirena.

³⁸ Egi Liddara Joppa ashgenig herege, egi wironagra naxguinegi Peter eja unjegi, wangra nupiwi hijowaregigirena, e inke hiwusharni wirahikje roguinena.

³⁹ Egi Peter nashianaga egi wakishu rena. Jaja higi jhiakohi wangeja harniahirena, egi hikanagit’era harnaj hijarnashi‐rarnaga xagnankshana egi Dorkas wakishu uniharegi e wonashi egi wonashixete wagiungi wakawahairena.

⁴⁰ Eshi Peter harnaj hihinab wagigina egi huporo‐himinagshana egi gikaraj‐shana egi roaka eja hapahi jijena, wena: Thabitha kikawa‐ane. Egi hinuganka jambshana egi jaja Peter hajagi minagshana.

⁴¹ Egi Peter nabra giwaharna egi nashingigina egi jaja wakanjangra egi hikanagit’era wagigogi niamb wokaraikarna.

⁴² Egi Joppara harnaj hiperes‐hirena, egi Hirukanara roha harnaxguna.

⁴³ Egi wauna, hambra roha Joppa‐eja hiwusharna Simon waru’shawaisha herera hakishu.