Hoixgara 14 - Winnebego Bible Portions 1907

¹ Egi wauinena Ikonium‐eja Judra wohokhu‐hojhi harnineja hinuinke hokawawina egi deshesge airanaga, Judra egi shige Hellenitra worohaxji harnaxguinena.

² Eshi Judra jarnaga inke harnaxgunira hirarujeja herera warapuru hirena egi khikhinubnanka warnai hirohire wogikanag warnagi‐inena.

³ Egi eja sixji hiwushairena, inke nuwangni Hirukanara horagnankshana. E hiraijera shja‐giginankshana hoit’e najwoja harnira, egi woijanti egi wowakanjang wagiuna nab warnineja howahi.

⁴ Eshi jhinageja worohanka nupihi‐khinena, hota Judnanka eja herekhinena egi hota Apostelnanka eja herekhinena.

⁵ Egi jaja warnijimb‐hirekjanegi hirarujeja herera egi shige Judra wakishu wauinekjanena egi washirukana warninera wakishu, washa waishgashga‐hirekjanena egi ini wawirojinekjanegi.

⁶ De‐e hiperes‐hiregi, Listra egi Derbe‐eja hogias‐hirena, Likaonia jhinag harnineja, egi ma hogigixnanka eja.

⁷ Egi eja woragphira wihokhu‐hirena.

⁸ Egi wang hisha minagnakshana Listra‐eja, sira inke shjani, manira rushaganakshana hiunira jhuneja, e inkaga maninina.

⁹ E Paulus hit’et’era naxguna egi Paulus horuxujinjena egi hiperessana wangnaka harnaxgura rushja‐hirekjanera.

¹⁰ Mashjaxji wena: Roja si hashinira hiranashine. Egi da’dampshana egi manina.

¹¹ Egi wankshigra hajairena Paulus jagu unga, mashja hit’at’airena, Likaonia hit’e wairena: Mau wangiraji hirawina wankshig‐khi.

¹² Egi Barnabas Jupiter higairena egi Paulus Merkurius higairena e hit’et’era herejege esge.

¹³ Egi Jupiter nabgiruxaj hirukanara e jhinag joweja jhinakshana, jera egi xawiwaxja‐horusgijra nawajag jhirobeja warni‐hahirena, egi wankshigra hahirena nabruxaj hirekjege.

¹⁴ Egi jaja Apostel Barnabas egi Paulus deshesge naxguinegi, waini warninera wakurugas‐hirena, egi uwa wankshig horogeja hornuwang‐hirena.

¹⁵ Egi wairena: Wangwira, jagu‐u wash’uwishe? Nishge wankshig jarnisge harajane, shesge harniwina egi hornikhu hajawina washa hoinigexjinagre washurushjawianaga, Mau niamb‐nagre hirarahikjawige, E maxihoshuagre egi mara egi tejara egi washara jarnaga hoshuakhi ura herera.

¹⁶ E wankshig‐hokirajra harnaj nagu warninera hokarawanank wagigina.

¹⁷ Shesgarnunige inke hokikarag rokani wangat’unawinina, eshi phi‐wangagigiwina wangregi nishu howaji wangok’uwina egi mara woja wangagigiwina, najge hiwarniwina warujra egi wogishawara hoixji‐wangahiwina.

¹⁸ Egi washa de‐e airegi wankshignanka hajangere nabgiruxajra inke giuinawinina.

¹⁹ Egi Antiox egi Ikonium‐eja Judra hisge howajirena, e wankshigra waraxurug‐hirena egi Paulus ini higissakwahirena, jhinag jangeja ruti hot’unairena, d’eguni hirairege.

²⁰ Eshi jaja wironagra hogigix nashinegaja kikawaana egi jhinageja kirina. Egi haininegi Paulus Barnabas hakishu Derbe‐eja howarairena.

²¹ Egi jaja jhinag she‐e woragphira hihokhunegi, egi roha washa gigus‐hirena, shige Listra egi Ikonium egi Antiox‐eja hakja hagirena.

²² Wironagra naxirag warninera himashjawahi egi wawigexjina harnaxgura unagikjege egi jasgegi washa wojexi howainekjanihawina Maura hungma harnineja hokewenaira.

²³ Egi jaja wohokhu‐jhinaka eja xetera injab‐wakeregi egi gikaraj‐hirena hantaginaj hirassa uinena Hirukanara ewarni ushirena E harnaxgunanke.

²⁴ Egi Pisidiara haxebhiregi Pamphilia‐eja hahirena.

²⁵ Egi jaja Perga‐eja hoit’era wihokhu hiregi Attalia‐eja hahirena.

²⁶ Egi eja Antiox howakarairena wajowe, hajinja regigirawira Maura najoja harnira hiu‐wagigira, wore uwashirera e uinege.

²⁷ Egi jaja hakiriregi, egi wohokhu‐hojhira stoirena, Maura jasgewagigira horaghirena, egi jasge Maura hounahianaga hirarujeja herera harnaxgura jhirobra wagiruhasgi.

²⁸ Egi eja sixji hiwushairena wironagra wakishu.