Hoixgara 11 - Winnebego Bible Portions 1907

¹ Egi Apostelra egi wakhinubhirera, e Judea‐eja unankhi naxguinena, hirarujeja herera hishge Mau hoit’era rus‐hiregi.

² Egi jaja Peter Jerusalem‐eja higi jarnaga eja majera uanki kitaghirena.

³ Wairena: Ne wang inke majairanieja rahina egi waruj warakishu sh’una.

⁴ Eshi Peter hirowajgus wogisog wogiragshana wena:

⁵ Joppa jhinag‐eja ha’unjera hagikarajshana, egi warnaina nige‐howarehajijena egi washanja hajharna, woshuisha harnukanag hurna, waiperi xetehi nige hereguni hirewahi wangregi howaji shibregigirena, hopasse hijopihike harukos‐hire, egi hiraijina.

⁶ Egi jaja wawotuxujra wajhara hiaperessana wanoijge hujop himani manegi here egi wanoijge hojaina horajera egi washa kikurutira egi ahuirassa wangregi herera wajharna.

⁷ Egi hit’et’era naxguna waigena: Nashine Peter egi d’ewahige egi warujre.

⁸ Eshi wahena: Inke shesgarnina Hirukanara inke washa hoinige shige washa warakanara hisha haga i‐harnineja howaji hurnina.

⁹ Eshi Hit’et’era wangregi shige howajina: Jagu Maura phiura, inke ne washa hoinige wigarnine.

¹⁰ Egi deshesge daniha hina, egi wangeja shige harnaj warni‐hajiakarairena.

¹¹ Egi horuxujre, higuana wangra dani jhi wauanjera eja hajiraginina Kesarea eja huwagigiregi hiraijirena.

¹² Egi Naxiragra wakishu rei’shina, inke khiba harnikje hingena. Shige wakhinub de‐e hakewehajane hinkishu hahirena, egi wangjega hojhieja wakawawina.

¹³ Egi hungiragwina, jasgehianaga waxopiniwarajireisha hajagi eojhieja, e nashianaga egi wagaireshe, Joppa eja wang howaregigire egi Simon gigore, e rash hinup harnira Peter higairena.

¹⁴ E hoit’era wornigiraikjanena eja howahi ne ninearnaga egi horajhira harnaj nina‐aimbkjanihawina higaireshe ena.

¹⁵ Egi hiat’et’e hajitegaja Naxirag Wakanjangra wirajina jeg hojikerehieja wanga‐uwina shesgairena.

¹⁶ Egi Hirukanara hoit’e harnira pewina jagu era: Johnga hisgexji ni‐wagiuna wawaxuna, eshi ne Naxirag Wakanjangra washawa‐xunkjanihawina.

¹⁷ Maura wanga‐wagiuwira wogara hikisge wagigigi, e Hirukanara Jesus Kristus harnaxguinegi, jagu harnigaja, Maura hakira duxuruikje?

¹⁸ Jaja washa de‐e naxguinegi inke xab‐hiranina, egi Maura rajankhirena, wairena: Egi hisgexji hirarujeregi herera hishge washa woishana najgekarateg egi wankshighoi Maura wogagaja.

¹⁹ Egi hoere hiranihera Stephan hawehirera she‐e hawau, Phoenike ejipa hikiwarera hahirena, egi Kiprus egi Antiox, hoit’era wihokhu hirena, Judrashana.

²⁰ Egi hota Kiprus eja here hirena egi Kirene eja, e jaja Antiox‐eja hajiregi, hishge Hellenitra wawokit’airena, Hirukanara Jesus wawi‐hokhuinena.

²¹ Egi Hirukanara nab harnira wakishu unjena egi worohaxji harnaxguna, egi Hirukanara eja hapahi‐nashinena.

²² Egi worag de‐e wohokhu‐hojhira naxguinegi Jerusalem‐eja nankhi egi Barnabas regigirena Antiox‐eja hipa hikjege.

²³ E jaja hijahigi egi Maura najwoja harnira hajarna, giphina egi jasgehirekjera harnaj wawogiragshana, najge mashja hiuinarnaga Hirukanara harusherej‐hirekjege.

²⁴ E wang phisha herena egi Naxirag Wakanjangra hoixji egi harnaxgura. Egi wankshigra rohaxji Hirukanara eja hornashina.

²⁵ Egi Barnabas Tarsus eowarena Saulga horni.

²⁶ Egi jaja hiegi Antiox‐eja harnikirina. Egi wauinena maisha eja stoirena hostora wakishu, egi wankshigra roha washa gigus‐hirena. Egi wironagra Kristianra wawigairena jegeja Antiox‐eja.

²⁷ Egi hambananka eja Jerusalem‐eja prophetra howajirena Antiox‐eja hajirena.

²⁸ Egi hisha nashina Agabus higairera egi Naxiragra hiuanaga wogiragshana, managre harnaj dokewehikjaneisha ena, e herena Klaudius Kaiser hamb‐harnieja.

²⁹ Egi wironagra jarnagaka jasgeshana hiruxurughirera uinena, wakhinubhirera Judea‐eja jhinanka wagijire rehirekje hirairege,

³⁰ Egi shesge hirena, egi xeteja howarewahirena Barnabas egi Saul harni‐rewagigirena.