Hogusra 9 - Winnebego Bible Portions 1907

¹ Egi Maura Noah egi hinig‐wahira washophi howe warogiguna egi wawagena: Wojawire, egi worohawire, egi mara hoixjiwine.

² Egi nanikawairekjanihawina egi naxirairekjena jarnaga ma hihagregi nagre, egi jarnaga ahuirassa wangregi herera, egi jarnaga ma hihagregi hixga‐xgankhi egi jarnaga hora tejanja khi, de‐e harnaj nabeja wornigishurawina.

³ Washara jarnaga hixga‐xgankhi niambanankhi, waraijanihawina, xawi‐ab xete jora hornik’uwira shesge, shige washara harnaj hornik’uwina.

⁴ Eshi warnira wankshighi‐ira hoshurnankhi inke rujwinianje.

⁵ Egi jasgegi wankshig‐hoi hashinira wa‐ira hagikarakjekjanena, wanoijge jagura hisha nab harnieja howaji waungi hakara‐kjekjanena, egi wankshig nab wauinegi, egi wankshig jagura khinub‐hirera nab harnieja howaji waungi, wangjega wankshig‐hoi harnira hagikarakjekjanena.

⁶ Higu peshe wankshig wa‐i xuhigi, waunjega wankshig wa‐i xuhirekjanena. Wankshigra Maura hoikawank wakhi waunge esge.

⁷ Egi ne wojawire egi worohawire egi ma hihagra hoixgawianje, egi worohawire.

⁸ Egi Maura Noah hokit’ena egi hinig‐wahira wakarakishu wawagena:

⁹ Egi ne, horuxujwire, rohira hikisge waki harnira hakishu nikerewina, egi shige su washiniwira wakishu haghowarehire.

¹⁰ Egi wanoijge niambra jarnagara wakishu harnikishu uinegi, ahuirassara, jera, egi wanoijgera jarnaga ma hihagregi harnikishu uinegi, jarnaga waj‐regi hihinabgi, jarnaga wanoijgera ma hihagregi uankhi.

¹¹ Egi rohira hikisge waki harnira hakishu unikerena, inke shige rora harnaj hinupahana maisinsh waharnikjanena nija hiu, inke shige hinupahana ni‐janaga mara maisinsh‐nikjanena.

¹² Egi Maura wena: De‐e woijantira herena rohira hikisge nikiwi hauna hojakena hihiwiregi egi wanoijge niambra jarnagara harnikishu uinegi, hokijhu rehikjanare.

¹³ Wipamakere harnira maxiwi‐regi hakerena, woijantira erekjanena rohira hikisge wakira Ne‐wineanaga egi managre hojakena‐hawiregi.

¹⁴ Egi waunkjanena, jaja managre wangeja maxiwi harniahigi, wipamakerera eja hajairekjanena.

¹⁵ Egi rohira hikisge waki harnira hakewe‐winkjanena hojakena hihiwiregi‐agre, egi wanoijgera jarnaga niambbakhi, egi inke hinupahana nira nijanaga rora harnaj maisinsh hiranikjanena.

¹⁶ Egi wipamakerera maxiwieja nihekjanena, egi hotuxuj hikjanena, hakewe‐winkjanena manegus rohira hikisge wakira Maura egi washa jagu niambbakhi rora harnaj ma hihagregi unankhi hojakenanegi.

¹⁷ Egi Maura Noah wagena: De‐e woijantira herena rohira hikisge wakira, e hojakenanegi hakerena Ne‐wineanaga egi rora harnaj ma hihagregi unagre.

¹⁸ Egi Noah hinig‐wahira e waj‐eja hihinab‐hirena, Shem, Ham egi Japhet hererena egi Kanaan Ham hianjhina.

¹⁹ De‐e Noah hitanike hinig‐wahina. Egi she‐e mara harnaj hoerairena.

²⁰ Egi Noah max‐hikishere jirena egi habsinsh max hisha hoshuna.

²¹ Egi nishuj rajgana egi jarnikshana egi nanoka jhi hojhieja‐kshana.

²² Egi Kanaan hianjra Ham hajarna hianjra nanokakhi egi wakhinubra hinuinke wawogiragshana jangejanankhi.

²³ Egi Shem egi Japhet wonashi hisha rus‐hirena, egi hinuinke hinej hakanag hirena, egi hakjopahi hokawairena egi hianj‐hirera nanokakhi hirarukainena, egi hakjamb‐nankshana egi hianj‐hirera nanokara inke hajairanina.

²⁴ Egi Noah hiperes‐shana nishuj hijarniganaga, egi hiperes‐shana hinigwahi xununa jagu giuinera.

²⁵ Egi wena: Kanaan washoshishig howekjena, wakhinubra ware warnira ware harninekjanena.

²⁶ Egi wena: Shem Hirukana Maura rajankjanena, egi Kanaan ware harnikjanena.

²⁷ Maura Japhet xete hikjanena egi Shem hojhieja jhikjanena, egi Kanaan ware harnikjanena.

²⁸ Egi Noah ni‐janaga hageja ma hogihi‐danianaga egi kerepana‐saja‐hashanaha wankshig‐ina.

²⁹ Egi Noah hamb warnira harnajra ma hogihi‐hishankijushguni‐anaga egi kerepana‐saja‐hashanahangaja, egi d’ena.