Hogusra 48 - Winnebego Bible Portions 1907

¹ Egi herena, washa de‐e hageja, hisha Joseph hogiragshana, horuxujre hianjraga howasharna. Egi Joseph hinig‐wahira hinuwinke warninena Manasseh egi Ephraim.

² Egi hisha Jakob hogiragshana egi wagena: Horuxujre hinigraga Joseph hiranijina. Egi Israel mashjakhina egi homingeja minagshana.

³ Egi Jakob Joseph wagena: Mau homashjara harnaj harnira Lus Kana‐an mainja janti hingikhina egi najunjana,

⁴ Egi waigena: Horuxujre, wojarnikjanena egi worohaninkjanena, egi wankshigra hornihe xete niunkjanena, egi ma de‐e su hashinira wakunkjanena hag‐raregi manegus harninekjanena.

⁵ Egi hinig‐waraga hinuwinka Ephraim egi Manasseh, e Egipt manegi warnigarni hirera kheni Egipt manegi hiranijini she‐e ne‐warnina, Ruben egi Simeon wawikisgaire ne‐warnikjanena.

⁶ Egi hag‐hiraregi ninkjang harnigarninegi ne‐washinikjanena, egi worag‐hirekjanena wakhinub‐hirera rash warnineja wakishu hoishjaine earnineja.

⁷ Egi ne, jaja Mesopotamia‐eja hura, Raxel hingit’ena Kana‐an mainja naguregi haji, Ephrat hiwusunsh hajigaja, egi Ephrat nagu hirakereja haxena, Bethlehemra erena.

⁸ Egi Israel Joseph hinig‐wahira wajarna, egi wena: Peshe de‐e herewishe?

⁹ Egi Joseph hianjra wagena: Hinig‐wahara hererena, e Maura ma‐tegi wawoikuna. Egi Israel wena: Ningitarna waigarni‐jire egi washophi howe wahakjena.

¹⁰ Egi Israel hishjasura xijshana shag’ke esge inke wajaxjinina. Egi Joseph hiwusunsh wagarnihina, egi i‐wawoki‐wankshana egi warnat’umbshana.

¹¹ Egi Israel Joseph wagena: Hishja hashinira inke hajarnikjane hiaregajerena, egi horuxujre su washinira Maura hishge haja‐waigigigaja.

¹² Egi Joseph warussana huporo‐hihojake‐nainja‐nagra egi Joseph exji hishjara mainja herehi wakhuna.

¹³ Egi Joseph hinuwinke warussana, Ephraim a hoishoro e harnira Israel eja hapahi minagshana Israel hoirajge hieja egi Manasseh a hoirajge e harnira Israel eja hapahi minagshana Israel hoishoro‐hieja egi hiwusunsh warnihina.

¹⁴ Egi Israel a‐hoishorora wajig‐anaga egi Ephraim nassu harni‐eja hat’umbshana, e xununa herena, egi nab hoirajge harnira Manasseh nassu harnieja hat’umbshana, nabra she‐shegu wat’umbra hiperes wauna, Manasseh jeg jhuinera herena.

¹⁵ Egi Israel Joseph hophi howe rogiguna egi wena: Mau de‐e jowehieja hianj‐wahara Abraham egi Isaak maninena, Mau de‐e E jajaixji wankshig‐haira waruj hunk’una hamb‐de‐e hipa,

¹⁶ Waxopini‐warajirejega, E niambwina washoshishigra harnaj, washophi howawire hojinjinigwira, egi rash harnira ne‐harninigigirekjawina, egi hianj‐wahara rash warninera Abraham egi Isaak. Egi woroha‐ninekjani‐hawina ma hihagregi.

¹⁷ Egi jaja Joseph hajagi hianjra nab‐hoishoro harnira Ephraim nassu hihageja hat’umbgi inke giphinina, egi hianjra nabra girussana Ephraim nassu hihageja hat’umbra, Manasseh nassu harnieja hat’umbshana.

¹⁸ Egi Joseph hianjra wagena: Inke shesgarnina jaji, de‐e jeg‐jhuinera herena, nab hoishoro hashinira nassu earnieja hat’umbre.

¹⁹ Egi hianjra inke unina egi wena: Hiaperessana hinig‐haxji, hiaperessana, hishge wankshig howajehisha herekjanena, hishge rokanakjanena, eshi jasgegi e khinubxunura hiraijera rokanakjanena, egi su earnira wankshig howajehi hornihe xete jijekjanena.

²⁰ Egi hamb‐sheja washophi howe wahina, wena: Israelra hisha, hisha washophi howe‐hikjegi, deshesge ekjena: Maura Ephraim egi Manasseh hikisge ninkjanena. Egi Israel Ephraim jowera hokerena Manasseh hageja kerena.

²¹ Egi Israel Joseph wagena: Horuxujre, jhekjanena, eshi Maura harnikishu unkjanena, egi hianj‐waraga ma harnineja harnini‐gikjanena.

²² Hokiruje hisha hiraijera hornik’una warakhinubra wawirashana, she‐e Amorit nab harnineja hotusra wigijgux harnira hiau egi majgu harnira hiau.