Hogusra 45 - Winnebego Bible Portions 1907

¹ Egi Joseph inke hanukixawa ruxurugnina jowehireja hijarnashi‐nankhi egi mashja ena: Wa‐uanjane egi harnaj hihinabwire. Egi wang hijanera inke hisha hijaunijena, Joseph wakhinubeja hokikaragregi.

² Egi mashja xagshana egi Egipt wankshigra egi Pharaoh hojhieja herera naxguinena.

³ Egi Joseph wakhinubra wawagena: Joseph newinena, jasge jajiga higu niambanakshe? Egi wakhinubra inke hornigiha ruxurug hiranina gissassa‐nake jowehieja.

⁴ Egi Joseph wakhinubra wawagena: Hiwusunsh jijewire ningitawina, egi hiwusunsh jijerena. Egi wena: Joseph rakhinubwira newinena, e Egipt‐eja wishuruwiwira.

⁵ Esge inke najgeteg‐winine, egi inke najikisgi‐winianje eegi wishuru‐wiwira, Maura jowerawiregi howa‐huingigina niamb‐wahi.

⁶ Ma nupaha mara dokewehina, egi higu shige ma sajaha hotana de‐shenaha inke manupuru hiranikjanena egi inke washara hisha haxeb‐nikjanena.

⁷ Egi Maura jowerawiregi howa‐huingigina d’aire hirotara manegi, egi niamb harninikjawige wakaraishe xete hiu.

⁸ Esge inke ne eegi howa‐huinagigi‐winina eshi Maura. Egi Pharaoh hianj‐hi hingigina, egi jhi e harnira harnaj hirukana hingigina, egi Egipt mara harnaj hirukana hingigina.

⁹ Xapge higiwige jajiga eja howakarawire egi wagawiaje: De‐shesge hinigraga Joseph ena: Maura Egipt mara harnaj hirukana hiuna, hiraijire inke hiwushanine.

¹⁰ Egi Goshen mainja rajikjena, egi hi’shuwusunsh sh’unkjena, ne‐nineanaga egi ninkjang washinira egi ninkjang washinira ninkjang warninera, egi jhasga washinira egi je washinira egi jarnaga washara hashinigi harnaj.

¹¹ Egi eja waruj hornik’unkjawina, higu shige ma sajaha hotagshana mara dokewehira. Ne‐nineanaga egi horajhira egi jarnaga washinigi harnaj inke d’airanikjege.

¹² Egi horuxujwire hishjasu washiniwira hirashjawina egi hakhinubra Benjamin hishjasu warnira hirajana i‐harnira hironikit’e hajena.

¹³ Egi jajiga hogirag‐wiaje Egipt manegi hoish’ag harnira harnaj, egi jarnaga washara hashjawire, egi xapge higiwige jajiga eegi hingarni jiwiaje.

¹⁴ Egi khinubra Benjamin natumbshana egi xagshana, egi Benjamin jashe‐hieja xagshana.

¹⁵ Egi wakhinubra harnaj i’wawokiwankshana, egi waxagshana. Egi she‐e hageja wakhinubra hokit’airena.

¹⁶ Egi washa de‐e Pharaoh hojhieja naxguinena, wairena: Joseph wakhinubra hajirena, egi Pharaoh giphina egi ware warnira.

¹⁷ Egi Pharaoh Joseph wagena: Warakhinubra wawaragekjena, de‐e uwine, wanoijge washiniwira wak’in wagigiwige egi karawire egi Kana‐an mainja howakarawire.

¹⁸ Egi hianj‐rawiga ruswige egi worajhiwira, egi hiraijiwiaje, egi Egipt ma hophi harnira hornik’unkjawina, egi mara hoshinra raijawina.

¹⁹ Unishina, de‐e uwine, Egipt manegi hiraruti harnikarawire xununig washiniwira egi hijawi‐warawiga wishuruti‐kjawira, egi hianj‐rawiga hakaraniwige egi huwire.

²⁰ Egi washa washiniwira inke waworuja‐winianje, Egipt manegi washa phira harnaj ne‐washiniwige.

²¹ Egi Israel ninkjangra shesge hirena, egi Joseph hiraruti wawogarna, Pharaoh jagu ushira shesge‐hina, egi waunegi wawogarna.

²² Jarnagaka harnaj wainira hinashana wawogarna, eshi Benjamin shurasgara hogihi‐dani hok’una egi waini hinara saja.

²³ Egi hianjra de‐e rewagigina: Shungxete‐najawaxetera kerepanaisha, Egipt‐eja washa phi‐nankhi k’inwagigi, egi shungxete‐najawaxete hinugra kerepanaisha wijawas egi waisgab k’in‐wagigi egi waruj hianjra unegikjera.

²⁴ Deshesge wakhinubra kere‐wagigina, egi hakarairegi, egi wawagena: Hirakara‐uwige inke hagi kikitagwinianje.

²⁵ Egi Egipt‐eja hihinab‐hirena egi Kana‐an mainja hagirena Jakob hianj‐hirera hiragirena.

²⁶ Egi hogirag‐hirena wairena: Joseph niambjena, egi Egipt mara harnaj hirukanara e herejena. Egi Jakob inke raksunsh hiranina inke warnaxgunige.

²⁷ Egi Joseph hoit’e warnira harnaj hogirag‐hirena, e jagu wawigera. Egi jaja hirarutira wajagi e Joseph huwahira hiruti hirekjera, Jakob hianj‐hirera naxirag harnira himashjana.

²⁸ Egi Israel wena: De‐e shenaga roaguna, hinighara Joseph niamb‐nihegaja, tarnaga hajhakjanena kheni jharni.