Hogusra 41 - Winnebego Bible Portions 1907

¹ Egi herena ma nupahanaga hagregi Pharaoh washi hantena, horuxujre ni‐jejeja nashinjena.

² Egi horuxujre ni‐eja je phira egi shinra shagowi anjinagwina, egi wokanainja wakanainena.

³ Egi horuxujre jera shagowi hageja ni‐eja anjinaghirena horuxuj shishigra egi hushawa, egi je hijanenanka ni‐hijejeja wakishu nashinena.

⁴ Egi je horuxuj‐shishignanka egi hushawananka, je horuxujphi egi shin shagowi‐hajega jeb‐wahirena. Shesgegaja Pharaoh hikhina.

⁵ Egi shige nana egi hinupahana shige washa hihantena, egi horuxujre wahura hishankiragi wohamb hoixji phira shagowi harnashina.

⁶ Egi horuxujre wohamb homanara shagowi hageja haxeb‐hirena egi wiaxebhu maintajehira hatat’eg‐wahina.

⁷ Egi wohamb homara shagowi‐hajega wohamb shagowi hoixji phira jeb‐wahirena. Egi Pharaoh hikhina egi horuxujre hohanteisha herena.

⁸ Egi herena haininegi naxirag harnira najgetegshana, egi rewagigina egi Egipt‐eja wowagax‐hiperesuankhi egi wangwanaiksabra harnaj gigo‐wawagigina egi Pharaoh hohante harnira wawogiragshana, eshi hinkisha hiroragra Pharaoh hogirag ruxurugnina.

⁹ Gajanga rajga woga hungra Pharaoh hokit’ena, wena: Hamb de‐e washa woishana warnira wakewewina.

¹⁰ Pharaoh ware warnira wogiteg hirena egi jhi hornaissena, jhi hornasse hojhi hirukanara hojhieja ne‐wineanaga egi waisgab‐duji hungra.

¹¹ Egi haheisha washa hiahantewina hinuwinke washara hishashana hiahantewina hohantenanka washara hishashana wagairena.

¹² Egi eja hojinjisha hakishu hauwina Hebraer hisha, herena, jhi‐wornasse hojhi hirukanara ware harnira, egi wagitagwina, egi hohante warniwira wawoigiragwina hohante warniwira jagushana wagairera hungiragwina.

¹³ Shesgena jagu hungiragwira wore harnira karak’u hingigirena, egi waisgab‐duji hungra hoijge kanag‐hirena,

¹⁴ Egi Pharaoh rewagigina egi Joseph gigo‐wagigina, egi xapge jhi‐wornasse hojhieja hihinab‐gigirena. Egi najura rujgiswagigina egi waini hijahi howaxugshana, egi Pharaoh hirahina.

¹⁵ Egi Pharaoh Joseph wagena: Hohanteisha hiahantena egi inke hisha hiroragra hungirag ruxurugnina, egi nanixguna jaja hohantera hisha nanaxguga hiroragra hosharag‐sashe hinigairena.

¹⁶ Egi Joseph Pharaoh hornigiharna egi wena: Inke ne shesgarni hajena, Maura naixjina Pharaoh hophi howekjera hogirag wausheshi.

¹⁷ Egi Pharaoh Joseph wagena: Hohante harnira, horuxujre ni‐jejeja nashina.

¹⁸ Egi horuxujre ni‐eja je phira egi shinra shagowi anjinagwina, egi wokanainja wakanainena.

¹⁹ Egi horuxujre jera shagowi hageja anjinag hirena hushawa egi horuxujra shishigji egi hororashana herere, shishig shesgera Egipt manegi inkaga hisha hajharnina.

²⁰ Egi je hushawara egi horuxuj shishigra, je shin jorni shagowi‐hajega jeb‐hirawina.

²¹ Egi jaja jeb‐wahirera, inke janti‐hiranina she‐e jeb‐wahirera, eshi higu horuxujra shishig‐nankshana jegeja jasgairera higu shegu‐nankshana. Shesgegaja hiakhina.

²² Egi washa hiahantena egi horuxujre, wahura hishankirara wohamb hoixji phira shagowi harnashina.

²³ Egi horuxujre, wohamb xununig egi homanara shagowi hageja haxeb‐hirena egi wiaxebhueja huhira hatategwahina.

²⁴ Egi wohamb homarna‐nanka, wohamb phi shagowinanka jeb‐wahirena. Egi wowagax‐hiperesra wawagitagshana eshi inke hisha hungirag ruxurugnina.

²⁵ Egi Joseph Pharaoh wagena: Pharaoh hohante harnira hishankiragaja, Maura jagu unkjanera Pharaoh hogirag‐wauna.

²⁶ Je phira shagowi‐hajega ma shagowihana, egi wohamb phira ma shagowihana, hohantera hishankirana.

²⁷ Egi je hushawa egi horuxuj shishig shagowi hageja anjinag hirega, ma shagowi‐hana egi wohamb homarna shagowi egi wiaxebhu maintajehi hatateg‐wahiga ma shagowiha mara dokewe‐hikjanena.

²⁸ Washa de‐e Pharaoh wagitag hajena, Maura jagu unkjanera Pharaoh hiperes‐hina.

²⁹ Horuxujre ma shagowiha Egipt managre harnaj wojakjanena.

³⁰ Egi she‐e hageja ma shagowiha mara dokewehi‐kjanena, egi Egipt manegi wojanihera wakikununi hirekjanena, egi dokewehira mara jeb‐ikjanena.

³¹ Egi wojanihera ma‐eja inke hiperes‐hiranikjanena, dokewehira hironag hajikjanege esge. Rokanaxjikjanena.

³² Egi hohantera Pharaoh nupaha hirajige, hiroragra erena: Washan de‐e Maura hisgexji ewauna, egi Maura xapgenig herehikjanena.

³³ Esge Pharaoh wang wouphi egi wanaiksabra hisha hokiruxujre egi Egipt mara hirakara‐kerere.

³⁴ Pharaoh washan de‐e une egi mara hirakara‐wagigire, egi Egipt mara ma shagowiha wojagi, hisajara girusaje.

³⁵ Egi ma phi hajirekjanega eja waruj sto‐hiaje, egi Pharaoh waisgab khirujgusre egi jhinagregi waruj shuirekjena.

³⁶ Egi waruj she‐e rujgus‐wiaje ma shagowiha mara dokewehikjanega eja hiuinekjege, e Egipt manegi waunkjanena, mara inke d’arni dokewehira hassanj axeb‐hirekjege.

³⁷ Egi washan de‐e Pharaoh phi hiranaina egi ware warnira harnaj.

³⁸ Egi Pharaoh ware warnira wawagena: Jasgajane shesgera hisha hie hinuxurug‐winashe e Maura naxirag harnira hojhijane?

³⁹ Egi Pharaoh Joseph wagena: Maura washan de‐e harnaj hiperes‐ninge, esge hinkisha wang wouwaruphi egi wanaiksab warniune shesgarnina.

⁴⁰ Jhi harnira hishurukana‐kjanena egi hoit’e jagu hishare wankshig warnira harnaj wawishuru‐kanakjena. Hung waminag harnira she‐eshana hiranishana hixetekjanena.

⁴¹ Egi Pharaoh Joseph wagena: Horuxujre Egipt mara harnaj hirukana‐ninkerena.

⁴² Egi Pharaoh nab‐hirusgijra nab‐eja kurushorojshana, egi Joseph nab harnieja hogiwaxugshana, egi waini seniba pixji hogiwaxugshana, egi shurasi hokiwaxug napingigina.

⁴³ Egi hiraruti hinub‐eja here harnigi haminag‐gigina egi jowehieja uwa‐nankshana: Huporo himinag hirekjege. Egi Egipt mara harnaj hirukana‐gigina.

⁴⁴ Egi Pharaoh Joseph wagena: Pharaoh ne‐winena, egi inke hiraranigi Egipt mara harnaj hinkisha nabra egi shige sira hixga hininana.

⁴⁵ Egi Pharaoh Joseph rash rajshana Saph‐nath‐paane‐ah higena. Egi Asenath khanag‐gigina Potipherah nab‐horuxaj hirukanaisha On eja hereisha hinugra. Egi Joseph Egipt mara harnaj howarena.

⁴⁶ Egi Joseph ma kerepana‐danihana Pharaoh Egipt hungra jowehieja nashinegi. Egi Joseph Pharaoh jowehieja nigehowarena egi Egipt mara harnaj houna.

⁴⁷ Egi ma shagowiha mara wojaga maxra ara hoixji haxebshana.

⁴⁸ Egi Joseph ma shagowiha waruj sto‐hina, Egipt mainja jarnagakhi, egi warujra jhinageja shurna, jhinagananka hogigix max hinanagankhi warujra jhinageja hosto‐wahina.

⁴⁹ Egi Joseph waisgab stohira tejainja pusake‐agra hikisge hina, rokana, hahi inke gikarabnina, inke gikarab phinige esge.

⁵⁰ Egi kheni mara dokewehini Joseph hojinjinigra nup hagarninena, e Asenath Potipherah nab‐horuxaj hirukanara On herera hinugra wagarnina.

⁵¹ Egi Joseph jorni hagarninera Manasseh rashra higena, wena: Hoshishig howe harnira harnaj Maura wakikununi hingigige esge, egi shige jajiga hojhira harnaj.

⁵² Egi hinubra rashra Ephraim higena, Maura woja winge esge ma hawe harninegi.

⁵³ Egi ma shagowiha mara wojara Egipt mainja hoshejana herena.

⁵⁴ Egi ma shagowiha jexira hereginina, Joseph jorni jagu era e herena. Egi ma‐nanka harnaj washana jexi hirena, eshi Egipt mara harnaj waisgabra juna.

⁵⁵ Egi jaja Egipt mara harnaj dokewehi hiregi, wankshigra Pharaoh waisgab gitairena. Egi Pharaoh Egipt wankshigra harnaj wawagena: Joseph e howarawire, jagu hinigawigi uwianje.

⁵⁶ Egi dokewehira managre harnaj howena. Egi Joseph waruj hoshura harnaj waruhas‐shana, egi Egipt wankshigra wawigiruwina. Egi dokewehira Egipt mara hiraijera rokanana.

⁵⁷ Egi ma hijahina harnaj Egipt eja hajirena Joseph waisgab giruwi hajire, dokewehira mara harnaj rokanainege esge.