Hogusra 38 - Winnebego Bible Portions 1907

¹ Egi herena shejananegi Juda wakhinub‐eja rena, egi Adulamit hisha hirahina, rashra Hirah higairera.

² Egi Juda Kana‐anit hisha Shua higairera hinugra eja hajarna egi rus‐shana egi hijokewena.

³ Egi waujganagshana, egi hojinjinig hisha harnina, egi Juda rashra Er higena.

⁴ Egi shige waujganagshana egi hojinjinig hisha harnina egi rashra Onan higena.

⁵ Egi shige waujganagshana egi hojinjinig hisha harnina egi rashra Shelah higena, egi Juda Xesib‐eja nihena jaja harninegi.

⁶ Egi Juda Er joware harnira hinug‐khanag‐gigina Tamar rashra higairena.

⁷ Egi Er Juda joware harnira wowonk‐shana Jehowa jowehieja, egi Jehowa d’ehina.

⁸ Egi Juda Onan wagena, rakhinubra hijawira eja hokaware egi khanagre, egi rakhinubra ninkjang ragishukjena.

⁹ Egi Onan hiperes‐shana ninkjangra inke e‐warninikjanera, egi wauna, jaja khinubra hijawira eja hokewegi, mainja waxuna, e inke khinubra ninkjang hok’unikjege.

¹⁰ Egi washa de‐e une, Jehowa inke giphinina, esge hishge d’ehina.

¹¹ Egi Juda Tamar hinug‐jeg‐jabra wagena: Hikhanagit’ejane hianjraga hojhieja, hinighara Shelah xeteja hipa, hinighi de‐e hishge d’ege hirege wena, wakhinubra uinera shesge. Egi Tamar rarnaga egi hianjra hojhieja jhina.

¹² Egi hahi s’i‐regi Shua hinugra Juda hijawina d’ena. Egi jaja Juda xagra rashjangi jhasga‐hin wagirujgis warnieja howarena Timnath‐eja e hereanaga egi hijakorohira Hirah Adulamit wankshig‐hisha.

¹³ Egi Tamar hogirag‐hirena wairena: Horuxujre, hijokeraga Timnath eowarena, jhasga warnira hina wakurujgis‐rena.

¹⁴ Egi Tamar hikhanagit’e wainira wakurushorojshana, egi hishjaira‐rukaisha hirakirukhana egi washa hirokiwej‐anaga egi hogok‐eja minagshana, Timnath nagu hirakereja. Tamar hajarna Shelah xeteginira egi inke khanag‐gigiranige.

¹⁵ Jaja Juda hajagi, hinug‐wowonk hisha hereguni hirena, hishjara hakurukhange esge.

¹⁶ Egi Juda hinugnaka hirahina nagueja egi wena: Hure naixjina harnikishu haming‐sheshi (inke hiperesnina e hinug‐jeg‐jabra waunagra). Egi hinugnaka wena: Jagu hunak’unkjaneshe hinakishu ramingkhi?

¹⁷ Egi Juda wena: Jharnax‐ningra hisha hiningigikjena hornihe warnieja hisha. Egi hinugjega wena: Washanisha wiwagax higirakanakhi, hinagigigi epa.

¹⁸ Egi Juda wena: Jaguisha wipagax hornik’unkjeshe? Hinug‐jega wena: Nab‐hirushgij‐wijanti hashinira, egi aipa washinira egi hissagu hashinirajega. Egi Juda wawok’una, egi hakishu mingshana, egi waugijganakshana.

¹⁹ Egi hinug‐jega nashianaga egi kerena, egi hishjairarukara nige‐kanakshana egi hikhanagit’e wainira shige wokawa‐xugshana.

²⁰ Egi Juda hijakorora Adulamit hisha herera jharnax‐ningra harninegigina, hinug‐jega eja washa wawiwagaxra wagirusikjege, eshi inke hinugra hienina.

²¹ Egi wankshig‐eja herenanka wawigiwaxshana wena: Hinug‐wowongra hajinja jeshe, nagu hijejregi harusharani‐jera? Egi wairena: Inke hinug‐wowongra hisha ma‐egi janina.

²² Egi Juda hirakirina egi wagena: Inke hinugra hiaenina, egi wankshig ma‐eja herera wairena: Inke hinug‐wowongra hisha ma‐egi janina.

²³ Egi Juda wena: Shegu warnikjena, inke washa wangiraraj ruxurug hiranina, horuxujre, jharnax‐ning de‐e harnihi‐ningigina egi inke hinugra hish’enina.

²⁴ Egi wauna ejaxji hagregi wi danihanegi, Juda hogirag‐hirena, wairena: Tamar hinug‐jeg‐rajabra hinugwowonkjena, egi shige horuxujre, washa wowonk‐unaga ninkjang ujganagjena. Egi Juda wena: Hagurawire egi taxukjena.

²⁵ Egi jaja hagu hahiregi, hijokera eja howaregigirena, wairena: Wang‐jaguisha washa de‐e warnigi wa’uwagijganagshana. Egi hinug‐jega hishge wena: Naixjina washewesiwi sheshi de‐e peshe warnigi nab‐hirusgijwijantira egi aipara egi hissagura.

²⁶ Egi Juda wawigina egi wena: Hinug‐jane hiraijera phingaja ne hotujis. Inke Shelah hinig‐hara hinug‐jane wak’unige esge. Egi hagregi inke hinupaha hiperesnina.

²⁷ Egi herena jaja wakegrakera higiregi horuxujre warejawa ujganagnakshana.

²⁸ Egi herena jaja wakegju‐naingi hisha nabra haxebhina, egi ninkjang‐hornagra wirujag shuj‐isha rus‐anaga egi nab‐eja hirusgij‐shana, wena: de‐e jorni hihinabgaja.

²⁹ Egi wauna nabra hakja kurus‐gaja, horuxujre e khinubra hihinabshana. Egi wena: Jagu‐u rugasra rokana waragish’ushe rakijishere, esge rash harnira Phares higairena.

³⁰ Egi hageja khinubra hihinabshana, e wirujag shujra nabeja hirusgijra. Egi rash harnira Sarax higairena.