Hogusra 34 - Winnebego Bible Portions 1907

¹ Egi Dinah, Lea hinugra, e Lea Jakob hagarnira, hinug ma‐eja herera wajarena.

² Egi jaja Shexem, Hamor hinigra Hewit wankshig hisha ma‐eja hungra Dinah hajagi, rus‐shana egi hakishu mingshana, egi shishig‐hina.

³ Egi najge harnira Dinah harusherej‐shana Jakob hinugra, egi hinugjega wogixetena, egi hinugjega hit’e phi higena.

⁴ Egi Shexem hianjra Hamor hokarakit’ena, wena: Hinug de‐e rusre hakhanaikjena.

⁵ Egi Jakob naxguna Dinah shishig‐hiregi hinugra. Egi hinigwahira je warnira wakana wagiginakshana, egi Jakob inke xabenijena hakirire hipa.

⁶ Egi Hamor Shexem hianjra Jakob hirahina egi hokit’ena.

⁷ Shejananegi Jakob hinig‐wahira max‐eja howakirirena, egi jaja naxguinegi najgerateg‐hirena, egi mashja wogiteg‐hirena, Shexem Israel wankshigra washa wowonk wagiunge esge, Jakob hinugra hakishu mingkhe, washa de‐e inke un‐phinige.

⁸ Egi Hamor wawokit’ena, wena: Hinig‐hara Shexem najge harnira hinugraga rogujena, naixjina horak’unsheshi khanaikjena.

⁹ Egi hinkishuwire, egi hinug‐warawiga woik’uwine, egi hinug‐wahawira wakhanagwire.

¹⁰ Egi hinakishu rajhikjawina egi mara nigi‐haisjena, rajhiarnaga egi wore‐shunkjena, egi eja washa rakishuruxuruikjena.

¹¹ Egi Shexem Dinah hianjra egi wakhinubra wawagena: Hijakoro hinkhiwine, egi jagu hinagawigi hornik’unkjawina.

¹² Egi hinug‐wikhanagra egi wogara jarnaga roraguwingi hinagawigi, hornik’unkjawina, eshi hinugra hunak’uwingi hakhanaikjena.

¹³ Egi Jakob hinig‐wahira Shexem egi hianjra Hamor waishjanke wairena Dinah hinugjab‐hirera Shexem shishighiga esge.

¹⁴ Egi wawagairena: Washan de‐e inke un‐duxurugwinina, hinug‐hajabwira inke majharnieja wogara, woiroshigesge wawawinage.

¹⁵ Eshi jasge roraguwina ningiuwinana, jaisge‐hajera shenisgawigi, wangra jarnaga raniwingi manijhairawigi.

¹⁶ Egi shejanagi hinug‐wahawira wornik’unkjawina, egi hinug‐warawiga wakhanaikjawina, egi harnikishu hajhikjawina egi wankshigra hishankira hinikjawina.

¹⁷ Eshi inke hinagish’uwinigi majhairera, hinug‐wahawira wakurus‐wianaga egi nige wawakerekjanihawina.

¹⁸ Egi hoit’e warninera giphinena Hamor egi Shexem Hamor hinigra.

¹⁹ Egi hojinjira washa de‐e inke waxurujnina, Jakob hinugra giphinge esge, egi e hiraijera gish’aghirena hianjra hojhieja herera harnaj worujis‐hirena.

²⁰ Egi Hamor egi Shexem Hamor hinigra jhinag harninera jhirobeja hahirena, egi jhinag harnineja wangra wawokit’airena wairena:

²¹ Wang de‐e rashguni wangakishu uinawina, esge managre egi jhiwagigiwire egi eja warairekjena, horuxujwire mara xetehinakshana hishge egi jhi phinena. Hinug‐wahirera waruswianaga hiwakhanaikjawina egi hinug‐hiwahiwira woga‐wagigiwire.

²² De‐shegungishana wang‐nagre wangagiuinekjanihawina, wangakishu jhi‐rawianaga egi wankshigra hishankira hiniwinana, wangra jarnaga hiniwingi hiwamakarajawigi, majhairanagra shesge.

²³ Egi je warninera egi higu washa warninera egi wanoijge warninera harnaj hiwarnikjanihawina, jagu roguinera hiuwingi, egi wangakishu jhirekjanihawina.

²⁴ Egi Hamor harnaxguinena egi hinigra Shexem, jarnaga jhinag jhirob harnieja higi, egi wangra harnaj wamajhairena jarnaga jhinag jhirob harnieja higi.

²⁵ Egi wauinena hambra danihangaja, teg‐hiregaja, Jakob hinig‐wahira nupiwi Simeon egi Lewi Dinah wakhinubra wigijguxra wakurus‐hiranaga egi jhinaganaka hirahirena washoshexji, egi wangra harnaj d’ewahirena.

²⁶ Egi Hamor d’ehirena egi hinigra Shexem, wigijgux hit’ewahirena, egi Dinah rus‐hiranaga Shexem hojhieja, egi hihinabshana.

²⁷ Egi Jakob hinig‐wahira d’era wirahirena egi jhinaganaka washara harnaj wagirus‐hirena, hinugjab‐hirera shishig‐hirege esge.

²⁸ Jhasga warninera warus‐hirena egi je warninera egi shungxete‐najawaxete warninera egi washa jagu jhinag ejaki, egi shige washa jagu max‐ejaki.

²⁹ Egi wiroku warninera egi ninkjang warninera harnaj egi hijawi‐wahirera hiniwarus‐hirena egi jhieja jarnaga washarananki harnaj warus‐hirena.

³⁰ Egi Jakob Simeon egi Lewi wawagena: Hoshishighowe hinawina, ma‐egi wankshignagre horogregi xuwi hinawina, Kana‐anitra egi Pheresitra horogregi, egi jarnagkhira harnina, sto‐khi‐hiranaga hikirairekjanena, egi d’ewinekjane, egi maisinsh‐harnikjane egi jhi‐wajhira.

³¹ Egi wairena: Jasge hinug‐hajabwira hinug‐wowonk hikisge hi‐hingigikjawishe?