Hogusra 33 - Winnebego Bible Portions 1907

¹ Egi Jakob jambshana egi woruxujshana, egi horuxujre, Esau jina, egi wangra hogihi‐jop hakishu. Egi Jakob Lea ninkjangra wajogshu‐gigina egi Raxel egi hinug‐warera hinuwinka wajogshuirena.

² Egi hinug‐warera egi ninkjang warninera jowexjieja washurna, egi Lea egi ninkjang warnira hag‐hireja washurna egi Raxel egi Joseph hag‐jieja washurna.

³ Egi Jakob wajoginina, egi shagowiha wakhurna uwangu khinubra hiwusunsh hina.

⁴ Egi Esau nuwang hikipajina egi jashera nat’umbshana egi iokiwankshana, egi xag‐hirena.

⁵ Egi woruxujshana egi wajarna hinugra egi ninkjangnigra egi wena: Peshe hereshe warakishu shun‐shawangre? Egi Jakob wena: Ninkjang, e Maura ware hashinira wok’ura hererena.

⁶ Egi hinugwarera hiwusunsh hajirena, e ninkjangra wakarani, egi wakhuirena.

⁷ Egi Lea hishge ninkjangra wakarani hiwusunsh jina egi wakhuirena. Egi hageja Joseph hiwusunsh jina egi Raxel egi wakhuirena.

⁸ Egi Esau wena: Jagu hirare wash’ushe wanoijge hirawahas hiakipara? Egi Jakob wena: De‐e rewanigigina hirukana harnira jowehieja naj‐hojaine hiaekjege.

⁹ Egi Esau wena: Hijuanjena, hikhinubra, wakaranine jagu hashinigi.

¹⁰ Egi Jakob wena: Hinka‐a, ningitarna joweraregi naj‐hojaine hiakiegi, woga harnira waigirusre. Shesge hawau hishja hashinira hajharna, Maura hishja harnira haja hiakisgena egi phi hishurusge esge.

¹¹ Rusre, ningitarna, wi‐inab harnira, e warnigarni hakirina. Maura phi hingigige esge, egi washara harnaj hijunge. Egi hawehina, egi warus‐shana.

¹² Egi Esau wena: Higuana hinkoro‐arnaga egi hinkerekjawina egi jorniginikjena.

¹³ Egi Jakob wena: Hirukana harnixji hiraperesgaja ninkjangnigra howashgi‐nagra egi wanoijge xununigra ning was‐hok’un egi je ning was‐hok’un harni haumakshana egi e hamb hisha sagrexji wirawahas‐hiregi, wanoijgera harnaj d’airekjanegaja.

¹⁴ Hirukana harnixji, ningitarna, e ware harnira joginine, egi xerenig hironinaikjena, wanoijgera homanira jasgairegi e iagiunkjena, egi ninkjangnigra homanira jasgairegi, haumak’un hirukana harnieja hagikjena, Seir‐eja.

¹⁵ Egi Esau wena: Wakishu haumagre hota harnikishu uinekje hingigire. Egi Jakob wena: Jagu‐u de‐e? Hirukana harnira jowehieja naj‐hojaine rashana hiaekje roaguna.

¹⁶ Esge Esau hamb‐eja hakja Seir‐eja howakerena.

¹⁷ Egi Jakob Sukkoth ejhagiwena, egi eja jhisha giuinena, egi wanoijge warnira hoirawahasi wagiuna. Esge ma she‐e rashra Sukkoth higena.

¹⁸ Egi Jakob rashguni Shalem jhinag Shexem‐eja kirina, e Kana‐an mainja herena, jaja Mesopotamia eja howakirigi. Egi jhinag joweja jhi kik’una.

¹⁹ Egi ma‐nige hajinja jhira wakshura, she‐e ruwina, Hamor ninkjang warnira wagiruwina Shexem hianjra, shurara hogihisha hiuna.

²⁰ Egi eja nab‐horuxaj haura una egi Israel Mau mashjara higena.