Hogusra 31 - Winnebego Bible Portions 1907

¹ Egi Jakob naxguna Laban hinig‐wahira jagu airera, wairena: Hianj‐hihiwira washara harnaj Jakob wagirus‐shana. Egi hianj‐hihiwira washa warnira e hitaje hikhinjena.

² Egi Jakob Laban hishja harnira hajarna, egi horuxujre, inke jorni hapahira jasge‐shunura shesgarnira.

³ Egi Jehowa Jakob wagena: Hianj‐waraga ma harnineja hakja howakarare egi washa‐waraija, egi harnikishu haunkjanena.

⁴ Egi Jakob rewagigina egi Raxel egi Lea wagigoirena gixaija hahirekjege, hornihe warnieja,

⁵ Egi wawagena: Hianj‐rawiga hishja harnira, inke jorni hapahira jasge‐shunura shesgarnira, eshi jajiga Mau harnira hinkishu unjena.

⁶ Egi hirapereswina homashja harnira harnaj hik’un hianj‐rawiga wagitena.

⁷ Egi hianj‐rawiga hingishjankena egi woirowe harnira kerepana‐haisha hijaingigina, eshi Maura inke higishana hingiginina.

⁸ Deshesge e‐gi: Kerekeresh‐nigra woirowe washinikjanena, hageja hornihera harnaj kerekeresh‐nig harninena, eshi deshesge e‐gi: Kirikirishra woirowe washinikjanena, hageja hornihera harnaj kirikirish harninena.

⁹ Deshesge Maura hianj‐rawiga wanoijge warnira wagirus‐anaga egi wawoik’una.

¹⁰ Egi herena jaja wanoijgera hikiruxera higirerera, wotuxuj‐shana egi hohanteja hajarna, egi horuxujre jharnaxwangra e wanoijgera wawikiruxena kirikirish, hokerekeresh‐xete egi kerekeresh‐nig wauinena.

¹¹ Egi Maura waxopiniwarajire harnira hohanteja hunkit’ena, wena: Jakob, egi wahena: Eegi hajena.

¹² Egi wena: Woruxujge egi jharnax‐wangra harnaj wajhara e wanoijgera wawikiruxarnaka kirikirishra, hokeresh‐xetera egi kerekeresh‐nig waunankshana. Laban washa jagu ningiura harnaj hajage esge.

¹³ Maura newinena Bethel‐eja janti‐ningikhira, hajinja wijantira wikini hashawaxura, egi hajinja washa manaj hisha mainagisharajra. Egi shegunegi nashine, ma‐tegi nige howakarare egi washa‐warara ma harnineja hakja howakarare.

¹⁴ Egi Raxel egi Lea hornihairena egi wagairena: Jasge hianj‐hawira hojhieja washa wau hajeshe? Egi washa hoishjane dusjanihawishe?

¹⁵ Jasge inke hijahi here wangaikarabnishe? Wangawiruwinge, egi shura wangiruwira shenahigaja.

¹⁶ Hojia, hianj‐hihira hoitaje harnira e Maura girusra neharniwigaja, egi ninkjangnig hiwarniwira. Egi shegunegi higu jagu Maura hinigegi, une.

¹⁷ Egi Jakob nashina, egi hinig‐wahira egi hijawiwahira, wanoijgehuxashog haminag‐wagigina.

¹⁸ Egi wanoijge warnira harnaj wakaranina egi washa warnira harnaj, jarnaga ruxurugra, wanoijge warnira e Mesopotamia‐eja waruxurugra, hianjra Isaak eja howakerena Kana‐an mainja.

¹⁹ Egi Laban Jhasga warnira hina wagirujgis rena. Egi Raxel mau uinera wamanuna hianjra warnira.

²⁰ Egi Jakob mankinuna Laban Sirian wankshig‐jera hawushiri hirena, she‐e inke hogiragnina giasra.

²¹ Washara jarnaga harnigi harnaj harnigias‐shana. Egi nashianaga egi nira hakurujena, egi Gilead xera hapahi kerena.

²² Egi Laban hogirag‐hirena hamb hidanihanegi, Jakob giasra.

²³ Egi Laban wakhinubra wakishu Jakob ruxairena hamb shagowiha hoikiware, egi Gilead xeja hoxarairena.

²⁴ Egi Maura Laban Sirian wankshig‐jega haheregi hohante hi’uanaga hirahina, egi wagena: Hirakara‐unge inke Jakob washinohire higarnianje.

²⁵ Egi Laban Jakob hoxerena. Jakob xeja hagijhinak’un, egi hishge Laban wakhinubra wakarakishu Gilead xeja jhi‐kik’una.

²⁶ Egi Laban Jakob wagena: Jagu‐u wash’ushe? Manakishunu hawushiri hinarna egi hinug‐wahara washiniranakshana, hokissaija hiniwarukosnisge?

²⁷ Jagu‐ungaja, nuxawa ragias‐she? egi nuinagixawa manakishunu, egi inke hunagisharagni, wogishawa kereningiginana egi nawa harni rexjajas harni egi nainawa rujiwijiwi harni?

²⁸ Jagu‐u inke hinig‐wahara egi hinug‐wahara i‐hokiwang wairagiginishe? Inke phinirana deshesge rare.

²⁹ Homashja harnina hinigishana duxurugwina, eshi hianj‐waraga Mau harninera xjarnane hahere hunkit’ena wena: Hirakara‐une, inke Jakob washinohire higarnianje.

³⁰ Egi rakaraginianaga, hianjraga hojhira roraguxjinge, egi jagu‐u mau kik’un warnira wamairagishunushe?

³¹ Egi Jakob horniharna egi Laban wagena: Naxitege esge, deshesge hiarege: Nigete hinug‐waraga homashja hiu wanainashekjanege.

³² Higu peshe mau kik’un washinira warnija‐u hishegi inke niamb‐giginianje. Wakhinubregi horniwine jagura hisha hashinianaga harnihajegi, egi kurusre. Jakob inke hiperesnina Raxel she‐e wamanugi.

³³ Egi Laban Jakob hojhieja hokewena, egi shige Lea hojhieja egi hinug‐ware nup hajega hojhireja eshi inke washa hienina. Egi Lea hojhieja hihinabshana egi Raxel hojhieja hokewena.

³⁴ Egi Raxel mau kik’unaka warusanaga egi wanoijgehuxashog wak’in‐eja wawoshurna egi waminagshana. Egi Laban jhieja washara jarnagaki warujgarna, eshi inke wienina.

³⁵ Egi Raxel hianjra wagena: Hirukana harnixji inke wogitegnine inke joweraregi nashi‐duxurugnige, hinugra woshga uineshunura, shesgarnake esge. Egi Laban wornina egi mau kik’ura inke wienina.

³⁶ Egi Jakob wogitegshana, egi Laban najisgina. Egi Jakob horniharna egi Laban wagena: Jaguisha hiaishanashe, egi washa woishana jagu harnigaja? Nuwang hishuruxeshe?

³⁷ Egi washa warnira harnaj wairagi‐shurujgarna, jhieja woirokhu jaguisha hirak’eshe? Wakhinubra jowehireregi egi warakhinubra jowehiregi washure, hinuwinke hajanga phi‐hiwa’uanaga egi wowonk‐hiwa’ungi, e wangagiuhirekjena.

³⁸ Ma kerepana‐nupaha harnikishu ha’una. Jhasga hinug‐washinira egi jharnax‐hinug washinira inke ning warninera hisha xawarninina egi hornihe washinieja wangra inke hisha hajnina.

³⁹ Egi jarnaga wanoijge d’ewahirera inke warnigarni haginina, newaigi‐xawarnina, he hijawakere‐shununa, hambregi wamanu hiranaga shige haheregi wamanu hireshge.

⁴⁰ Deshesge harnihena, hambregi taixewena, egi haheregi jowe tassag jarna‐shununa egi inkaga harnaisgarnishununa.

⁴¹ Deshesge horajhieja ma kerepana‐nupaha harnihena. Ma kerepanaishanaga jop‐hashanaha warnigitena hinugwaraga hinuwinke waixewe, egi ma hakeweha wanoijge hashinira waixewena egi woirowe harnira kerepana‐haisha hija hinagigina.

⁴² Jajiga Mau harnira egi Abraham Mau harnira egi Isaak hisha nakewera inke hinkishu unijegi, jasgegi rokani kerehinagiginana. Hawera Maura hingijarna egi wore harnira, egi xjarnane hahere naj‐hinisgina.

⁴³ Egi Laban horniharna egi Jakob wagena: Hinughire de‐e ne hinug‐waharna, egi ninkjangnig de‐e ne ninkjang warnina, egi wanoijge de‐e ne wanoijge warnina, egi jarnaga washana hashja‐shanagre ne warnina. Egi hamb de‐e hinug‐waha de‐e jagu wagiunashe, shige ninkjang warninera, e wajhuinera.

⁴⁴ Esge hure, egi rohira horeishankira hinkinkjena ne wineanaga egi ne nine, egi e hojakena hihiregi wihohira herekjena.

⁴⁵ Egi Jakob inisha rus‐shana egi wijanti hiu eja kerena.

⁴⁶ Egi Jakob wakhinubra wawagena: Ini sto‐hiwire, egi ini rus‐hiranaga egi gikawa washuirena egi gikawanaka hihageja warujhirena.

⁴⁷ Egi Laban gikawara Jegar‐sa‐dutha higena eshi Jakob gikawa‐naka Gale‐ed higena.

⁴⁸ Egi Laban wena: Gikawa de‐e wihohira wangigirena hojakena hihiregi hamb de‐e, esge gikawa‐naka rashra Gale‐ed higena.

⁴⁹ Egi shige Mispah higena, wena: Jehowa hojakena hihiregi wangi‐rakarakjanena jaja hinkirujegi.

⁵⁰ Hinug‐wahara hawe wairagigigi shige hinug hijahi hirassa rakhanagkhi, inkisha wangakishu unijena, horuxujre Maura wihohira e herena hojakena hihiregi.

⁵¹ Egi Laban Jakob wagena: Horuxujre gikawa‐nagre, egi horuxujre wijanti de‐e e hojakena hihiregi hakerena.

⁵² Gikawa de‐e wihohira herena, egi wijanti de‐e wihohira herena, inke gikawa de‐e haixarnaga hirani‐hinikjanena egi ne inke gikawa de‐e egi wijanti de‐e haraixarnaga hinai‐shananikjanena.

⁵³ Abraham Mau harnira egi Naxor Mau harnira egi hianj‐wahirera Mau harninera, hojakena hihiregi hophira wangingekjanena. Egi Jakob hianjra Isaak hisha nakewera e wihohi hiuna.

⁵⁴ Egi Jakob nab‐hiruxajra d’ehina, xe hihageja, egi wakhinubra wagigorna waisgabduj ruj‐hirekjege, egi waisgabduj ruj‐hirena egi haiserej xe‐eja hiwushairena.

⁵⁵ Egi hainixji Laban kikawa‐ana egi hinig‐wahira iwokiwankshana egi hinug‐wahira, egi washophi howe warogiguna. Egi Laban wakirujena egi ma earnieja hakja howakerena.