Hogusra 30 - Winnebego Bible Portions 1907

¹ Egi jaja Raxel hajagi, Jakob inke ninkjang hagarninira Raxel hinug‐khinubra khiwassana, egi Jakob wagena: Ninkjang hunk’une, inke shesgarnigi jhekjanena.

² Egi Jakob wogitegshana egi Raxel najisgina, wena: Maura newineshe? e ninkjang‐hoshura hiwusha nigigira?

³ Egi Raxel wena: Horuxujre hinugware harnira Bilha hakishu jhire, egi e rejag hihag harninegi ninkjang hingishukjena, hishge ninkjang eja hotuisjena.

⁴ Egi Bilha hok’una hinugware harnira khanaikjege, egi Jakob hakishu jhina.

⁵ Egi Bilha waujganagshana, egi Jakob hojinjinig hisha hagarninena.

⁶ Egi Raxel wena: Maura hingijiregaja egi hishge hora naixgungaja, egi hojinjinig hisha hunk’ungaja, esge rashra Dan higena.

⁷ Egi Raxel hinugware harnira Bilha shige waujganagshana, egi Jakob hojinjinigra hinubra hagarninena.

⁸ Egi Raxel wena: Homashja Maura eja howaji hinughakhinubra hiakisgegaja egi parnana egi rashra Naphtali higena.

⁹ Jaja Lea hajagi ninkjang harnira rushjara, hinugware harnira Silpah rus‐shana egi Jakob hok’una khanaikjege.

¹⁰ Egi Lea hinugware harnira Silpah Jakob hojinjinig hisha hagarnina.

¹¹ Egi Lea wena: Horniheisha, egi rashra Gad higena.

¹² Egi Lea hinugware harnira Silpah Jakob hojinjinig hinubra hagarnina.

¹³ Egi Lea wena: Wogishawa harnigaja, hinug‐wahirera hophi howeisha hingairekjanegaja. Egi rashra Asser higena.

¹⁴ Egi Ruben waisgab hikishereja hina, egi Mandrak max‐eja hiena, egi hiunira Lea wagarnigina. Egi Raxel Lea wagena: Ningitarna hinigraga Mandrak warnira woik’une.

¹⁵ Egi Lea wena: Inke hininani‐rajeshe hikhanahara hinagishurusra, egi shige hinighara Mandrak warnira washuruisjaneshe? Egi Raxel wena: Hinigraga Mandrak warnira woirak’ungi, Jakob hahe de‐e harakishu ramingkjena.

¹⁶ Egi Jakob hoxjarnagi max‐eja guhena, egi Lea rarnaga hikipa‐hina, egi wagena: Jasgegi wajhiregi hokawaje, nituwina hinighara Mandrak warnira hiauanaga. Egi hahe eja hakishu mingshana.

¹⁷ Egi Maura Lea harnaxguna, egi Lea waujganagshana egi Jakob hojinjinigra hisajara hagarnina.

¹⁸ Egi Lea Wena: Maura woirowera hunkaraik’ungaja, hinugware harnira hikhanahara wak’ura esge. Egi rashra Issaxar higena.

¹⁹ Egi Lea shige waujganagshana, egi Jakob hojinjinigra hirakewera hagarnina.

²⁰ Egi Lea wena: Maura woga phi hunk’ungaja, shegunegi hikhanahara hinkishu jhikjanegaja, hojinjinigra hakewe hagarnige esge. Egi rashra Sebulon higena.

²¹ Egi hageja hinugnig hisha harnina, egi rashra Dinah higena.

²² Egi Maura Raxel wewina, egi Maura harnaxguna, egi ninkjang hojhura giruhas‐shana.

²³ Egi waujganagshana, egi hojinjinig hisha harnina, egi wena: Maura woiroshigesge harnira hingirusgaja.

²⁴ Egi rashra Joseph higena, egi wena: Jehowa hinig hijanera hisha hija hungikerekjanena.

²⁵ Egi herena, jaja Raxel Joseph harnigi, Jakob Laban wagena: Kere‐hingigire, ma‐wajabeja wawakerekjena, maharnieja.

²⁶ Hijawiwahara woikaraik’une egi ninkjang warnira, watarnaga waixewera egi hingirushja‐rehire. Wore jagu ningiura hiraperes‐gaja.

²⁷ Egi Laban wagena: Naixjina hijakoro hinakhisheshi, hiaperessana Jehowa washophi howewina ne hawau.

²⁸ Egi Laban wena: Woirowera jani‐gisgekjegi hungiragre, hornik’unkjena.

²⁹ Egi Jakob wena: Hiraperes‐rajegaja worera jasge ningigira, egi wanoijge washinira wirakarara hiraperesshana roha harera.

³⁰ Jarnagkira hashinina kheni hajini, egi shegunegi rohana hornihe‐xetena, egi Jehowa washophi howenina hajira epa. Egi jajanagi nishge wajhira hakaraki‐koixjaneshe?

³¹ Egi Laban wena: Jagu hornik’unkjeshe? Egi Jakob wena: Inke washinjahi hunak’unikjanena, washan de‐e hinagish’ungi, shige hornihe washinira wakana‐wagigianaga egi wirakarakjena.

³² Hamb de‐e hornihe washinira harnaj howe waunkjena, egi jhasganing kerekeresh‐nigra egi hokeresh‐xetera harnaj injab waharnaga, egi jhasga‐ning shebra harnaj, jhasga horogeja nagra egi jharnax hokeresh‐xetera egi kerekeresh‐nigra harnaj jharnax horogeja nagra, she‐e woirowera hingirerekjena.

³³ Egi howogisog harnira wihohira hingirekjanena hambra hajiregi jaja woirowe warnira washjagi. Egi jarnaga inke kerekeresh‐nigi egi hokereshra‐xetenigi jharnax horogeja, egi jarnaga inke shebnigi jhasga horogeja, she‐e wamanu hinagi‐karaibjena.

³⁴ Egi Laban wena: Horuxujre naixjira shesge sheshi jasge waragera.

³⁵ Egi hamb‐eja injab‐wahina jharnax wangra jarnaga kirikirishgi egi kerekereshra, egi jharnax hinugra jarnaga kerekereshnikhi egi hokeresh‐xetera egi jarnaga nige sgairegi harnajra, egi jarnaga shebgi jhasga horogeja, egi hinigwahira harnaj harni‐wagigina.

³⁶ Egi hamb daniha hoikiware shejaixji washurna khiruje ereanaga egi Jakob hojakena hiwieja. Egi Laban hornihe warnira hirotara Jakob wakana‐wagigina.

³⁷ Egi Jakob hexu jho nanksig rusanaga egi huksigu egi wisebu, egi hirauni nigeshana waruxorona egi nanksig‐nanka sga jantinena.

³⁸ Egi nanksig waruxorora hornihenaka niorajga‐hireja woshurna, jaja hornihera rajga hakiriregi. Egi jaja nirajganank’u hikiruxairegi.

³⁹ Egi hornihe‐nanka nanksig‐nanka jowehireja waujganag‐hirena. De‐e hawau wanoijge hornihera kirikirish, kerekereshnig egi hokeresh‐xete harninena.

⁴⁰ Egi Jakob jhasga‐ning de‐e injab‐wahina. Egi hornihe‐naka hishja warninera higisornanka eja hapahi hirena, egi Laban hornihe harnira shebnanka harnaj. Egi Jakob hornihe warnira injab washurna, egi Laban wanoijge warnieja inke washunina.

⁴¹ Egi herena jaja wanoijge shinra hikiruxairegi, Jakob nanksig‐nanka wanoijge niorajgainja woshurna wanoijgenanka jowehireja, e nanksig‐nanka joweja waujganaghiekjege.

⁴² Eshi jaja wanoijgera hushawainegi inke hijawoshunina. E hushawara Laban warnikjege egi mashjara Jakob warnina.

⁴³ Egi wangjega worohaxji harena, egi wanoijgera roha harnira, egi hinug‐warera, egi wang‐warera egi wanoijge huxashogra egi shungxete‐najawaxetera.