Hogusra 27 - Winnebego Bible Portions 1907

¹ Egi herena, jaja Isaak shagkhi egi hishjara xijshana inke waja ruxurugnina, hinighi‐xetera Esau gigorna, egi wagena: Hinig‐haxji, egi Esau wagena: Horuxujre eegi hajena.

² Egi Isaak wena: Horuxujre shegunegi hinshag‐shana, inke hiaperesnina hamb hajinja jekjanegi.

³ Esge wakurusre ningitarna wapahi washinira, mawoshu hashinira egi majgu hashinira egi gixara howarare egi warni hungini rare.

⁴ Egi woruj phixji hingiune, jasge haiphira shesge, egi hingarni‐jiaje, haj‐jikjena, naxirag harnira najornijankjena kheni jharni.

⁵ Egi Rebekah naxguna jaja Isaak hinigra Esau hokit’egi. Egi Esau gixara howarena warni hogini egi hagarni hikjege.

⁶ Egi Rebekah hinigra Jakob hokit’ena, wena horuxujre naxguna hianjraga rakhinubra Esau hokit’era wena:

⁷ Warni hingagurare egi woruj pixji hingiune, wahaijena, egi Jehowa jowehieja najornijankjena kheni jharni.

⁸ Esge hinig‐haxji ho harnira hingiune jagu u‐nishire.

⁹ Wanoijge horniheja howararnane, egi eja jarnax‐ning phira nupiwi hagurare egi she‐e hianjraga woruj phixji wagiunkjena jasge giphira shesge.

¹⁰ Egi hianjraga she‐e haragashini rahikjena, rujharnaga egi naj‐hornijankjena kheni d’arni.

¹¹ Egi Jakob hiunira Rebekah wagena: Horuxujre hakhinubra Esau wang hinsheg hisha heregaja egi wang shara harnigaja.

¹² Jajiga nigete hinujgaige, egi waishjanke hirainaikjanegaja egi washa hoshishig howe hakinkjanena egi inke najhojaine.

¹³ Egi hiunira wagena: Hinig‐haxji washa hoshishig howe hashinira ne‐hinrusjena, ho harnira harnaigixgune, egi rarnaga waigagurare.

¹⁴ Egi rena egi waguhina egi hiunira wagarni‐kirina, egi hiunira woruj phixji una jasge hianjra giphira shesge.

¹⁵ Egi Rebekah hinig‐xetera Esau waini phixji warnira warussana e warnijegi jhieja egi hinig‐xunura Jakob hogiwaxugshana.

¹⁶ Egi jarnax‐ning hara nab‐eja wigiuna egi jashe hosharaija.

¹⁷ Egi woruj phixjira hok’una egi waisgab‐duj e hirushja wahira hinigra Jakob harni‐wagigina.

¹⁸ Egi hianjra hirahina egi wena: Jaji, egi Isaak wena: Eegi haunakshana, hajanga ninewishe hinighaxji?

¹⁹ Egi Jakob hianjra wagena: Esau newinena jorni jhuine hashinira. Hauna jagu uinashira kikawa‐ane ningitarna, minagkhe egi warni harnira rujre, naxirag hashinira naj‐hunjankjena.

²⁰ Egi Isaak hinigra wagena: Hinig‐haxji jasgegaja xapgenig hish’eshe? Egi wena: Jehowa Mau hashinira hingarnijige esge.

²¹ Egi Isaak Jakob wagena: Hiwusunshre ningitarna, nintujgakjena hinig‐haxji, jasge hinighara Esau neninearnaga nigeshge inke neninenigi.

²² Egi Jakob hianjra Isaak hiwusunsh hijena, egi rujgarna egi wena: Hoit’era Jakob herena, eshi nabra Esau nab‐warnira hererena.

²³ Egi inke higinina, nabra hinsheg‐hirege esge khinubra Esau nab warnira wikisgege, egi najhojana.

²⁴ Egi Isaak wena: Hisgexji hinighara Esau nineshe? Egi wena: Newinena.

²⁵ Egi Isaak wena: Hiwusunsh hingarnijire egi hinighara warni harnira haijena, naxirag harnira naj‐hornijankjena egi hiwusunsh hagarnihina egi rujshana, egi nishuj hagarnihina egi rajgana.

²⁶ Egi hianjra Isaak wena: Hiwusunsh jige egi i‐hunkiwangre hinig‐haxji.

²⁷ Egi hiwusunsh hina, egi iokiwankshana, egi Isaak wainira hopanara horupanana egi naj‐hojana egi wena: Horuxujre hinighara hopanara max hopana hikisge e Jehowa naj‐hojara.

²⁸ Esge Maura wangregi ruja howaji hornik’una egi managre hoshira, egi waisgabra roha egi nishujra.

²⁹ Wankshigra wanigirairekjanena egi wankshig hokirajra ningiwaku‐hirekjanana. Warakhinubra wawishurukanakjanena, egi hiuniraga hinig‐wahira ningiwakhuhirekjanena. Higu peshe washoshishig howenigi, washoshishig howekjanena. Egi higu peshe washophi howenigi, washophi howekjanena.

³⁰ Egi herena Isaak higu jaja Jakob naj‐hojara girashjangi egi Jakob higu hihinabgaja hianjra Isaak jowehieja unjera, khinubra Esau nakikarara kirina.

³¹ Egi hishge waruj phi giuna, egi hianjra hagarnihina egi hianjra wagena: Jaji kikawa‐ane egi hinigraga warni harnira rujre, naxirag hashinira naj‐hunjankjena.

³² Egi hianjra Isaak wena: Hajanga ninewishe? Egi wena: Hinigraga newinena Esau jorni jhuine hashinira.

³³ Egi Isaak gissassana rokanana egi wena: Peshe hereshe? Hajinja unjeshe warni hornihianaga egi hingarnijira, egi harnaj haj‐shana kheni rakirini, egi naj‐wajana? Hojia, egi hophi howekjanena.

³⁴ Egi jaja Esau hianjra hoit’e harnira naxgungi xagra rokana wena egi mashja xagshana egi hianjra wagena: Najhunjane hishge jaji.

³⁵ Egi Isaak wena: Rakhinubra wapakanag hajina, egi naj‐hojaine hashinira harnikerena.

³⁶ Egi Esau wena: Hisgexjina phi wagairegaja Jakob higairera sikanegi hojan de‐e hinupahana hinukosgaja. Jeg‐jhuine harnira hingirus‐shana, egi horuxujre naj‐hojaine harnira hingirus‐shana. Egi wena: Inke naj‐hojaine washa hinagashinini‐shanakshe?

³⁷ Egi Isaak horniharna egi Esau wagena: Horuxujre, hirukana hashinikje hauna, egi wakhinubra harnaj wawak’una ware warnikjege. Egi waisgab egi nishuj wak’una, egi hinig‐haxji jagu ningiunk’jeshe?

³⁸ Egi Esau hianjra wagena: Jaji jasge naj‐wirojara hishankirashe? Jaji nishge naj‐hunjane. Egi Esau xagjirena.

³⁹ Egi hianjra Isaak horniharna egi wagena: Horuxujre, horajhira inke managre hoshinra harninikjanena egi inke wangregi ruja howajini.

⁴⁰ Egi wigijgux hashinira hik’u nina‐aimbkjanena, egi rakhinubra waragi‐sherekjanena. Egi hahi herekjanena hirukana ranikjanena, egi winapinra ragishish‐hikjanena jashe hashiniejagra.

⁴¹ Egi Esau Jakob hosh’igshana naj‐hojainege hianjra naj‐hojara hawau. Egi Esau najge harnieja wena: Hamb jajiga hagixaigjera hiwusunsh hotagi, egi eja hakhinubra Jakob d’ehakje.

⁴² Egi Rebekah hogirag‐hirena hinig‐hi xetera Esau hoit’e de‐e waegi. Egi rewagigina, hinig‐hi xunura Jakob gigoirena, egi wagena: Horuxujre rakhinubra Esau winakewenina d’enikjane hirena.

⁴³ Esge hinig‐haxji, ho harnira harnaxgune, egi nashinge, hakhinubra Laban eja hogiasre, Haran eja.

⁴⁴ Egi hamb jarnahangi hakishu hiwushaje, rakhinubra wogitegra hoginikhi.

⁴⁵ Rakhinubra wogitegra hoginig‐harnaga egi jagu ragish’ura wakikununigi, egi rewagigianaga egi eja harnigu hahirekjena. Jagu‐u hamb hishankira hinuwinke nixawanikjawishe?

⁴⁶ Egi Rebekah Isaak wagena: Wankshig‐ra hinjgena, Heth hinugwahira hawau. Jakob Heth hinugwahira hisha khanakhi, managre eegi hinug hiranagre shesgera, wankshig‐hoi harnira jagu phi hingiunkjaneshe?