Hogusra 26 - Winnebego Bible Portions 1907

¹ Egi shige hinupaha mara dokewehina, Abraham hamb warnieja jegjira mara dokewehira. Egi Isaak Gerar eja howarena Philistra hung harninera Abimelex.

² Egi Jehowa jantingi‐khina, egi wagena: Inke Egipt eja howaranine, ma‐nige hornigitaikjanera eja jhiaje.

³ Ma‐tegi wakuruxare egi harnikishu haunkjanena egi washophi howenikjanena, ne‐ninearnaga egi su hashinira ma de‐e harnaj wornik’unkjanena egi wiho hara hakark’unkjanena Abraham wiho hagigira hianjraga.

⁴ Egi su hashinira woroha wahakjanena wangregi wiragoshgenagre wawikhina. Egi su hashinira ma de‐e harnaj wak’unkjanena, egi su hashinieja howahi manegi wankshig howajehira harnaj washophi howairekjanena.

⁵ Abraham ho‐harnira harnaxgunge esge, egi wohokhu harnira hingiunge, egi u‐washi harnira, egi woshga harnira, egi woehi harnira hingiunge.

⁶ Egi Isaak Gerar eja jhina.

⁷ Egi wankshig ma eja herenanka hijawira higiwaxhirena, egi wena: Hinug‐hajabshana. Hijawiharna era nakewege wena. Deshesge hirege, wankshig ma eja herenagre d’ewinege Rebekah hawau, hinug haja phisha herege esge.

⁸ Egi herena, jaja s’i eja u‐anaga, Philistra hung harninera Abimelex hirohamb‐eja horuxuj rehina, egi hajarna, egi horuxujre, Isaak hijawira Rebekah karakishgajjena.

⁹ Egi Abimelex Isaak gigorna egi wagena: Horuxujre hisgexji hijawiragaja, egi jasgegaja washeshe hinugrajabgi? Egi Isaak wagena: Deshesge hiarege, ningete e hawau jege.

¹⁰ Egi Abimelex wena: Jagu‐u de‐e wairagish’uwishe? wankshig‐nagre hisha wogiwategnana hijawiraga hakishu mingra, egi woishana un hinagashini rajiwinana.

¹¹ Egi Abimelex wankshig warnira harnaj winakewe wahina, wawagena: Hisha wang de‐e hikiogi nigeshge hijawira, jasgegi d’ehirekjanena.

¹² Egi Isaak ma‐eja max‐hoshurna egi ma‐eja hogihisha hawinj rus‐shana, egi Jehowa washophi howehina.

¹³ Egi wang‐jega rokana jijena egi rokanara dirajena, e hahi hisgeja rokanana.

¹⁴ Egi jhasga hornihe harnina, egi je hornihe harnina, egi warera roha, egi Philistra khiwassainena.

¹⁵ Egi ni‐wagura harnaj e hianjra ware warnira wak’airera hianjra Abraham hamb warnieja, Philistra wornassairena, egi makaxra hoixji woshuirena.

¹⁶ Egi Abimelex Isaak wagena: Hijahi howakarare, hiraijera ne ronikanage esge.

¹⁷ Egi Isaak eja nigeowarena, egi Gerar hosunj‐eja jhiuna egi eja jhina.

¹⁸ Egi Isaak shige ni‐wagu k’ena, e hianjra Abraham hamb warnieja wak’arnihera, Abraham d’arnaga hageja Philistra wornassairera, egi ni‐wagu de‐e rash warninera warajshana e hianjra warajra warajshana.

¹⁹ Egi Isaak ware warnira hosunj‐eja k’airena, egi eja ni‐waguisha hierena ni‐wanaokewe xuisha.

²⁰ Egi wanoijge hirakara Gerar‐eja herera Isaak wanoijge hirakara warnira wakitag‐hirena, wairena: Nira ne‐harniwina. Egi ni‐wagujega rashra Hakikitagra higena, wakitag hirege esge.

²¹ Egi ni‐wagu hijaneisha k’airena egi shige wakitag hirena, egi ni‐wagu de‐e rashra Woshigra higena.

²² Egi eja gixauarena, egi ni‐wagu hijaneisha k’ena, egi she‐e inke wakitagnina, egi ni‐wagu she‐e rashra Hoixgan giphira higena, egi wena: Shegunegi Jehowa hokarage wanga‐gigiwina egi manegi wangawoja‐kjanihawina.

²³ Egi eja hiromahana howarena Be‐er‐sheba eja.

²⁴ Egi Jehowa hahe‐eja jantingi‐khina egi wena: Hianjraga Abraham Mau harnira newinena. Inke naxiranine, harnikishu hauanjege, egi washophi howenikjanena egi su hashinira roha harekjanena ware harnira Abraham hawau.

²⁵ Egi eja nab‐haruxaj haura una, egi Jehowa rash harnira rajshana, egi eja jhi kik’una, egi eja Isaak ware warnira ni‐waguisha k’airena.

²⁶ Egi Abimelex hirahina Gerar eja howahi, egi hijakorora Ahusath egi manape hornihe harnira manape hung xetera Phikol.

²⁷ Egi Isaak wawagena: Jagu‐u hirairajiwishe, hunash’igwige, egi hijahi u‐shawahais‐jege?

²⁸ Egi wairena: Hajawina Jehowa harnikishu unjera, esge wahawina, akhi wiho hihikjawina, hojakena hihiwiregi, egi rohira horeishankira hinkin‐kjawina.

²⁹ Inke washa hinai‐shganikjawige, inke hinikiowinira shesge, phingigi‐rashana ningiuwina, egi rashguni nigehowakere ningigina. Shegunegi Jehowa washophi howenijena.

³⁰ Egi woruj‐xete wagiuna egi waruj‐hiranaga egi rajgainena.

³¹ Egi haininegi hainixji kikawa‐ahirena, egi a‐akhi wihokhinena, egi Isaak kere‐wagigina, egi rashguni hakarairena.

³² Egi herena hamb‐eja, Isaak ware warnira hakirirena egi hogirag‐hirena e ni‐wagu k’arnankhi wagairena egi wairena: Ni hiaewina.

³³ Egi ni‐wagura Sheba higena, esge jhinag de‐e rashra Be‐er‐sheba higarnankshana hamb de‐e hipa.

³⁴ Egi Esau ma kerepana‐jopahangaja Judith khanagshana Be‐eri hinugra Hittit wankshig hisha egi shige Bashemath khanagshana Elon hinugra Hittit wankshig hisha.

³⁵ Hinuinke najgerategra rokana hirena Isaak egi Rebekah.