Hogusra 25 - Winnebego Bible Portions 1907

¹ Egi Abraham shige hinug‐khanagra egi hijawira Ketura higairena.

² Egi Simran egi Jokshan egi Medan egi Midian egi Ishbak egi Shuah wagarnina.

³ Egi Jokshan Sheba hagarninena egi Dedan. Egi Dedan hinigwahira Asshurim egi Letushim egi Leummim hererena.

⁴ Egi Midian hinigwahira Epha egi Epher egi Hanox egi Abida egi Elda‐a hererena. De‐e harnaj Ketura ninkjang warnina.

⁵ Egi Abraham washara jarnaga harnigi harnaj Isaak hok’una.

⁶ Eshi hijawihira wakuruxera hinig‐wahirera e Abraham warnira Abraham washa woga wawok’una egi nigeowakere wagigina hinigra Isaak eja nagra, niambnagregi, sanig wiaxeb‐hueja wiaxebhu mainja.

⁷ Egi de‐e Abraham hamb warnira hererena wankshiginihegi ma hogihish‐anaga kerapana‐shagowi‐anaga‐sajahashanahana.

⁸ Egi Abraham naxirag harnira t’unena egi shagji d’ena, wangnunig, egi ma roha, egi wankshig‐warnieja t’umbhirena.

⁹ Egi hinig‐wahira Isaak egi Ishmael xairena Maxpelah nish‐hopoxeja, Hittitra Sophar hinigra Ephron max harnieja e Mamre joweja herena.

¹⁰ Max e Abraham Heth hinig‐wahira wagiruwina. Eja Abraham xairena egi hijawira Sarah.

¹¹ Egi herena Abraham d’arnaga hageja, Maura Abraham hinigra Isaak najojana. Egi Isaak niwagu niambra wajara higairera hijejeja jhina.

¹² Egi de‐e Ishmael hokiju harnira herena Abraham hinigra, Sarah hinug ware harnira Egipt wankshighisha Hagar higairera e Abraham hagarnira.

¹³ Egi de‐e Ishmael hinig‐wahira rashra hererena: Rash warninera hokiju warninera hirakiruxe hirena. Ishmael jorni hagarninera Nebaiot herena, egi Kedar, egi Adbe‐el egi Mibsam,

¹⁴ Egi Mishma egi Duma egi Massa,

¹⁵ Hadar egi Thema, Jetur, Naphish egi Kedema.

¹⁶ De‐e Ishmael hinig‐wahira hererena, egi de‐e rash warninera, jhinag warninera egi ma wawojhirera, hungra kerepanaishanaga nuphashana wankshig howajehiaka harninena.

¹⁷ Egi de‐e Ishmael ma wankshig‐hoi harnira herena, ma hogihish‐anaga egi kerepana‐danianaga egi shagowihashana egi naxirag harnira t’unena egi d’ena, egi wankshig warnieja t’umbhirena.

¹⁸ Egi Hawilah eja rera Shur eja hipa jhirena, Egipt joweja herena, e hahi howarnana Assiria eja howaregi. Egi d’ena wakhinubra harnaj hijarnank’u.

¹⁹ Egi de‐e Isaak hokiju harnira herena Abraham hinigra. Abraham Isaak hagarninena.

²⁰ Egi Isaak ma kerepana‐jopahangaja egi Rebekah khanagshana, Bethuel Sirian wankshig‐hisha Mesopotamia hajhisha hinugra, Laban Sirian wankshig‐hisha hinug‐jabra.

²¹ Egi Isaak Jehowa gitarna hijawira hawau, ninkjang jushgunisha herege esge. Egi Jehowa gitairera giuna, egi Isaak hijawira Rebekah waujganakshana.

²² Egi ninkjangnigra ujrogeja hakiwajanankshana, egi Rebekah wena: Deshesgarnagre, jagu‐u waiushe? Egi rarnaga egi Jehowa higiwaxshana.

²³ Egi Jehowa wagena: Wankshig howajehira nupiwi urajganakshana egi wankshigra nupiwi uj‐hashiniejananka khiruje hirekjanena, egi wankshignanka hisha hiraijera mashjakjanena wankshig hijanejega worujishikjanena, egi jowarajega xunura wagirekjanena.

²⁴ Egi jaja hamb hojura higiregi, horuxujre, warejawa ujganakshana.

²⁵ Egi jorni hihinabgi shujshana, harnaj hin‐hornashi nisgena egi rashra Esau higairena.

²⁶ Egi hageja khinubra hihinabshana, egi Esau sika harnieja harukos‐hankshana, egi rash earnira Jakob higairena. Egi Isaak ma kerepana‐hakewehana jaja Rebekah ninkjang hagarniga.

²⁷ Egi hojinjinigra xete harairena. Egi Esau nakikara waruphisha herena, wang gixaija hereisha herena. Egi Jakob wang wogisog hisha herena jhieja jhinakshana.

²⁸ Egi Isaak Esau wogixetena, jha girujnake esge. Eshi Rebekah Jakob wogixetena.

²⁹ Egi Jakob waruj unankshana, egi Esau gixaija howakirina egi hokikurushag.

³⁰ Egi Esau Jakob wagena: Waruj hunk’une ningitarna waruj shuj she‐e, wakikurushag hajege esge. Esge rash earnira Edom higairena.

³¹ Egi Jakob wena: Hamb de‐e wigiruwine jegjuine hashinira.

³² Egi Esau wena: Horuxujre jasgegi jekjanegaja egi jagu hituxuruikjeshe jegjuine de‐e.

³³ Egi Jakob wena: Hamb de‐e wiho hingigire, egi wihogigina, egi Esau jegjuine harnira Jakob wigiruwina.

³⁴ Egi Jakob Esau waisgabduj hok’una egi Lentilnipana, egi warujshana egi rajgana egi nashianaga egi kerena. Deshesge hina Esau jegjuine harnira inke washa hiranainina.